Joɓ faa ɓǝ gaɓ ma ne cok ahe
1 So zǝzǝ̃ǝ za mai mo daira me ne syii ya tǝ syakra me o! Kǝpel koo pa ɓǝǝ daira goo pii fan ɓe ya. 2 Ne cok moo ara pǝtǝtǝ̃ǝre, ka gak joŋra yeɓ laŋ mor ɓe ya. 3 A yeara ne koŋne, a kaara kǝsyicok a renra sǝ̃ǝ kpuu ne suŋni. 4 A ciira gǝ̃ǝre, a ŋhǝǝra goo kpuu, fan marai ciŋra farel ɓǝǝ ɓo. 5 Za a nĩira ra, a dahra gor mor ɓǝǝ tǝgbana nyinni. 6 A kaara pǝ yii ne gbyaŋ pǝzyil waare. 7 A ŋwaara ɓǝ kǝsyicok tǝgbana fan cok moo joŋni. A tai cwãara mor kpuu. 8 Za a syẽa ra, nĩira ra pǝ sǝr ɓǝǝ myah ge lalle.
9 So zǝzǝ̃ǝko gera wo ɓe, a syakra me, me ciŋ fan syẽa ɓo. 10 A kwanra me na fan kolle, a kwanra suu ɓǝǝ pǝyǝk kal me ɓe, a tǝɓra tǝsǝ̃ǝ ga wo ɓe. 11 Mor Masǝŋ jok me ɓo ko tǝ cuura syak nyi me ko. 12 Za maɓea mai urra ne me, cwǝǝra me ne ɓalle, a kyeɓra ka muŋ tǝtǝl ɓe. 13 Ge saŋra tǝtǝl ɓe, so dǝɓ ma gbah jol ɓe kǝka. 14 Me tǝ kyeɓ ka yea zah ɓǝǝ wo ɓe ga lalle, so ge ryaŋra zah ɓe. 15 Gal re me pǝlli, yǝk ɓe tǝkine joŋ ɓe daŋ kalra soɓ me tǝgbana zyak moo ɓaŋ swãh kal ne ko.
16 Zah'nan Masǝŋ daŋ me tǝ laa bone, me zah wulli. 17 Ne suŋni, woiŋ ɓe swǝ̃ǝ me, suu syen me cẽecẽe. 18 Masǝŋ nyen jol gbǝ me ne mbǝro wo suu ɓe, me tǝ fer suu ɓe tǝ faswul ɓe, fan koo suu ɓe a kim me. 19 Masǝŋ ɓoo me ge pǝ vãi, ame ciŋ sǝr ne sãhe.
20 Me tǝ yeyee ɗii mo Masǝŋ, mo ka zyii zah ɓe ya. Ne cok me tǝ juupelle, mo ka ɓaŋ syiŋ ɓe laŋ ya ta. 21 Mo tǝ cuu syak nyi me, mo tǝ ruu sal ne me ne swah ɓo daŋ. 22 Mo tǝ soɓ zyak ɓaŋ me kal ne pǝɗǝkki, mo laŋ me ne kuu zyak bamme. 23 Ame sye me tǝ ɓe, mo tǝ ga zah wul ne me, pǝ cok wul za ma ne cee ga yea gŋ daŋ. 24 Ame ye dǝɓ mai swah ah mo vǝr ɓe, amo so ur tǝ ɓe mor fẽene? Ame ka ne ɓǝ ki ya, sai mo ɗuu gor tǝ ɓe . 25 Me kwo za mo tǝ laara bone ɓe, me ka yeyee tǝ ɓǝǝ ya ne? 26 Me byak ɓǝ 'nyah tǝkine cokfãi mo ge, so bone tǝkine cokfuu ge daira me. 27 Zahzyil ɓe ka swan ga sǝŋ ya, bone ye pel ɓe to. 28 Me tǝ syee pǝ cokfuu, dǝɓ ka gbah jol ɓe ya. Me ur uu ɓo kǝsyil za pãare, me tǝ fii gbah jolle. 29 Yee mai me tǝ yee pǝ bone ɓe jur yee sǝgoi ɓo ne yee mafukki. 30 Waksuu ɓe foo ɓo pǝfuu, suu ɓe lǝǝ ɓo pǝcwakke. 31 Laa pǝ'nyah ɓe me yea tǝ laani ciŋ ɓǝ swaa ɓe.
© Bible Moundang © Alliance Biblique du Tchad, 1996.
