Elihu lai Joɓ
1 Zǝzǝ̃ǝ Joɓ mo syii sok mo laa ɓǝ faa ɓe me tǝ ga faa. 2 Ame tǝ ga faa ɓǝ ma syak ɓe me foo ɓo. 3 Ɓǝ faa ɓe daŋ a ne fahlii, ame faa goŋga. 4 Tǝ'yak Masǝŋ ye joŋ me, ako ye nyi cee nyi me.
5 Moo gak no ɓe, mo zyeɓ suu ɓo mo zyii ɓǝ zah ɓe. 6 Joɓ, amo ne me gwa daŋ na pel Masǝŋ zahki, ana gwa daŋ ako ye bǝǝ vuu joŋ na ne ko. 7 Mo ka gak ɗuu me ya, me ka kal mo ne swah ya ta.
8 Ɓǝ mai me laa zah ɓo ne sok ɓe mo faa a naiko. 9 Mo faa: Ame ka ne ɓǝɓe' ya, me joŋ faɓe' ya, ame bai ɓǝ ki, faɓe' ka wo ɓe ya. 10 Amma Masǝŋ kyeɓ ɓǝ ɓo tǝtǝl ɓe kpak ka joŋ me na pa syiŋ ahe. 11 Gaa ɓal ɓe ne ŋgǝyam, ɓal syel ɓe mee ɓaŋ daŋ a ẽere.
12 Amma me faa nyi mo Joɓ, amo ka faa goŋga ya. Mor Masǝŋ sye a pǝ'man kal dǝfuu ɓe. 13 Mor fẽe mo rǝk ɓǝ tǝ Masǝŋ ŋ ka fǝ̃ǝ ka zyii ɓǝ faa tǝ ɓǝ nyee mai za moo kyãh ya ne? 14 Masǝŋ a faa ɓǝ nyi za ne fahlii camcam, so dǝɓ ma syii sok laa ɓǝ faa ah kǝka. 15 Masǝŋ a faa ɓǝ nyi za ne lom ne suŋ ne cok mai za mo nwãhra nǝm ɓo. 16 A joŋ ka mo laara ɓǝ mai mo faako, so lai ah a ren gal ɓǝǝra. 17 A faa ɓǝ nyi ra ka mo soɓra faɓe' ɓǝǝra, so ka cak ra ka mo yiira suu ɓǝǝ ka. 18 Masǝŋ ka soɓ ra ka mo muŋra ya, a ǝ̃ǝ ra gin zah wulli. 19 A lai dǝɓ ne pee syem gin wol ahe, suu ah daŋ a laa bone. 20 Dǝɓ ma ne syem ɓe, koŋ farel ka syen ko ya, koo farel ah mo pǝsãh ɗǝne daŋ laŋ ka 'yah ya. 21 Suu ah a kal ne nyah kpǝkpǝ sǝ, ŋhaa mo kwan woiŋ wol ah ra. 22 A yea ma tǝ ga zah wul o.
23 Mo zyaŋko ne pa pee ma coksǝŋ vaŋno kǝsyil mapãa ah mo ge wol ah ɓe, a ga cuu fahlii masãh ah nyi ko. 24 Angelos Masǝŋ mo joŋ gboŋgboŋ wol ah ɓe, a ga pǝǝ Masǝŋ mor ah a faa: Mo soɓ ko ɓoo, ka mo ge ko pǝ pal ka, mor me lwaa ma soo tǝl ah ka wǝǝ ko ne ɓe. 25 Suu ah ga giŋ ga pel tǝgbana mǝ tǝbanna, a ga yea pǝswah faɗa. 26 Ne cok mo juupel wo Masǝŋ ɓe, a ga zyii zah ahe, a ga juupel wo Masǝŋ ne laa pǝ'nyahre. Masǝŋ ga zyeɓ fahlii fan daŋ mor ah pǝsãh faɗa. 27 A ga faa pel za pãa daŋ: Ame ye yea dǝɓ ɓe', me ka joŋ fan matǝ goŋga ya, amma Masǝŋ joŋ wo ɓe tǝgbana faɓe' ɓe me joŋ ɓo ya. 28 Masǝŋ cak me ka me ge pǝ cok mai za wul mo gŋ ka, mor ah ame ne tǝtǝl sǝŋ.
29 Masǝŋ a joŋ fan ma morãi wo dǝfuu zahlǝŋ pǝpãare. 30 A ǝ̃ǝ dǝɓ gin zah wul a so soɓ ko kaa ne laa pǝ'nyahre.
31 Joɓ, mo laa ɓǝ mai me tǝ faani, mo kaa 'wa mo soɓ me faa ɓǝ. 32 Amma ko mo no ne ɓǝ ka faa ɓe, mo faa zǝzǝ̃ǝ me laa, me ga laa pǝ'nyahre, me ga sãa mo. 33 Amma mo ka ne ɓǝ faa ya ɓe, mo syii sok laa ɓǝ faa ɓe, me ga cuu fan nyi mo ka mo tǝ fanne.
© Bible Moundang © Alliance Biblique du Tchad, 1996.
