Elihu sãa Masǝŋ
1 Elihu syee ge pel ne ɓǝ, faa: 2 Awe za fatanne, we syii sok we laa ɓǝ faa ɓe me tǝ faani. 3 Ne cok we laa farel pǝ zah ɓe, we gak faa farel mai a pǝ'nyahre, mor fẽe we laa ɓǝ ma ne fatan ah ɓe, we ka gak faa ya ne? 4 Sai na nǝǝ fan matǝ goŋga ahe. Na kyeɓ fan masãh ah kǝsyil mana. 5 Joɓ faa azye bai ɓǝɓe', Masǝŋ zyii nyiŋ goŋga 'min a kee, 6 azye ne goŋga, ne daŋ laŋ zye so ciŋ pa ber ɓo. Zye ka ne faɓe' ya, so nwãh mai mo wo 'min ka ruŋ ya.
7 Awe lwaa dǝɓ ma na Joɓ taa ɓe ne? Ka ɗuu Masǝŋ ya syaŋsyaŋ. 8 A gban zah ne za ma joŋ ɓǝɓe', a syee ne za ma joŋ faɓe'. 9 Mor faa: Syee mor Masǝŋ ka ne yeɓ ya.
10 Awe za ma ne fatanne, we laa ɓǝ faa ɓe. Masǝŋ ma ne swah daŋ a joŋ ɓǝ maɓe' ah no ne? 11 A soo za tǝgbana yeɓ ɓǝǝ mo joŋra, a joŋ wo ɓǝǝ tǝgbana fahlii fan joŋ ɓǝǝra. 12 Masǝŋ ma ne swah daŋ ka joŋ faɓe' ya, ka joŋ fan joŋ ma bai goŋga wo dǝɓ ya ta. 13 Masǝŋ ɗǝǝ swah mai mo ne gin jol dǝɓ ki ne? Wala dǝɓ ki ye nyi dunia nyi ka mo byakko ne? 14 Masǝŋ mo ɓaŋ tǝ'yak ma ne cee ɓe, 15 koo zune mo wo sǝr nyee daŋ a ga wuu, a so ga ciŋ vuu sǝr faɗa.
16 Mo ne tǝtǝl no ɓe, mo laa ɓǝ faa ɓe. 17 Masǝŋ mo syiŋ goŋga ɓe a gak kaa swah tǝ fan daŋ suu ɗǝne? Amo ŋgoŋ kiita tǝ Masǝŋ matǝ njaŋ ne? 18 Ne cok za goŋ ne zaluu mo joŋra fan joŋ tǝgwĩi wala ɓǝɓe' ɓe, Masǝŋ a ŋgoŋ kiita tǝ ɓǝǝra. 19 Masǝŋ ye joŋ za daŋ, ka zyii ɓǝ ga mor zaluu wala joŋ 'yah pa joŋ kal pa syak ya. 20 Dǝfuu gak wun ne suŋ nai sǝ, Masǝŋ a waa dǝfuu ɓaa ga sǝŋ a muŋra, a in dǝɓ ma ne swah pǝ wul bai jol dǝfuu mo juu ge wol ahe. 21 A ẽe ɓal syel mai za moo syee vaŋno vaŋno daŋ. 22 Koo cokfuu mo pǝfuu ɗǝne ɗǝne daŋ, za faɓe' ka gak ɗuura muŋ suu ɓǝǝ gŋ ka Masǝŋ mo kwo ra ka ya. 23 Masǝŋ ka ne 'yah ka cuu cok com mai ka dǝfuu mo gera pel ah ne ka ga ŋgoŋ kiita tǝ ɓǝǝr a. 24 A nǝǝ zaluu ga lal bai fii mor ɓǝ ɓǝǝra, 25 mor tǝ fan joŋ ɓǝǝ moo joŋra ɓe. Mor ah a fer ra ne suŋ a cuu bone nyi ra. 26 A cuu bone nyi za faɓe' ne nahnǝn za daŋ ka mo kwora, 27 mor ka tǝ zyii syeera mor ah ya, soɓra ɓǝ lai ah myah ɓo. 28 A joŋra za syak ne swah ka mo yera yee ɗii Masǝŋ, so Masǝŋ a laa yee ɓǝǝ mo tǝ yeera fii gbah jol ne ko. 29 Masǝŋ mo faa zye kaa, zye ka joŋ fan ki ya laŋ, dǝɓ ma faa nyi ko ka fẽene kǝka. Masǝŋ mo muŋ zahpel ah ɓe, dǝfuu daŋ a ga yeara pǝtǝtǝ̃ǝre, 30 dǝfuu ka gak cakra za ma joŋra pǝɓe' ne kaa goŋ tǝ ɓǝǝr a.
31 Joɓ, amo kee faɓe' ɓo ra nyi Masǝŋ ka so faa nyi zye ka fǝ̃ǝ joŋ faɓe' faɗa yao ɓe ne? 32 Amo fii Masǝŋ ka mo cuuko ɓǝɓe' ɓo ra nyi mo ɓe ne? Amo zyii ɓe, mo i zah joŋ faɓe' o ne? 33 Mo 'yah Masǝŋ mo joŋko wo ɓo tǝgbana ɓǝ foo ɓo mo 'yah ne? So amo laŋ, mo tǝ kyãh ɓǝ nyee tǝ fan mai Masǝŋ mo joŋ ɓo. Mai ɓǝ ɓo yo, amo yee nǝǝ, ɓǝ ɓe ye ka. Mo cuu ɓǝ ah nyi ru sa, ka ru tǝ ɓǝ foo ɓo ra.
34 Za ma ne tǝtǝl ne za ma ne fatan mo laara ɓǝ faa ɓe daŋ, a nyiŋra, a ga faara: 35 Joɓ a faa ɓǝ faa dǝɓ bai tan fanne, ɓǝ mai mo faako daŋ ka ne mor a. 36 We foo ɓǝ tǝ ɓǝ mai Joɓ mo faa daŋ ɗao, we ga kwo gŋ sǝ a faa ɓǝ na ɓǝ faa dǝɓ ɓe' ryakryakke. 37 Zyii ka soɓ faɓe' ah mo tǝ joŋ ya, faa ɓǝɓe' pel Masǝŋ tǝkine tǝǝ ko pel man daŋ.
© Bible Moundang © Alliance Biblique du Tchad, 1996.
