1 Elihu syee ge pel ne ɓǝ, faa:
2 Joɓ, ɓǝ mai mo faa a ne cok ah no ne? Mo lǝŋ amo bai ɓǝɓe' pel Masǝŋ ne? 3 Mor mo so fii Masǝŋ, mo faa: Me joŋ faɓe', me joŋ faɓe' ya daŋ, reba ah wo ɓe ko fẽene? 4 Me ga zyii ɓǝ zah ɓo tǝkine bai ɓo ra daŋ.
5 Mo ẽe cok ge sǝŋ ɗao, swãh ka sǝŋ pǝɗǝk ya ne? 6 Mo joŋ faɓe', ka joŋ fan ki wo Masǝŋ ya, mo joŋ ɓǝɓe' pǝlli laŋ, ɓǝ ah a joŋ fẽe wol ah ne? 7 Njaŋ ɓo mo ne ko, ka gak gbah jol Masǝŋ ya, Masǝŋ ka ne 'yah fan ki jol ɓo ya ta. 8 Dǝfuu ma na mo ye tǝ laara bone mor faɓe' ɓo, mo so tǝ joŋ fan sãh ɓe, a gbah jol ɓǝǝ mgbaŋ.
9 Ne cok dǝfuu mo tǝ laara bone ɓe, a 'meera gŋ a yera yee kyeɓ dǝɓ ma wǝǝ ɓǝǝ pǝ bone ahe. 10 Amma ka zyii ginra wo Masǝŋ pa ma joŋ ɓǝǝ ne ɓǝ ah ka mo nyiko swah nyi ra ne cok bone ɓǝǝr a. 11 Ka zyii ginra wo Masǝŋ mai moo nyi fatan nyi na kal faɓalle, tǝkine juu ma zoo sǝŋ ya. 12 A yera yee fii gbah jol ne ko, amma Masǝŋ ka zyii ɓǝ ah zah ɓǝǝr a, mor yii suu tǝkine ɓǝɓe' dǝfuu. 13 A yera yee nai cẽecẽe, so Masǝŋ ma ne swah daŋ ka ɓaŋ syiŋ ɓǝǝ wala laa yee ɓǝǝr a.
14 Joɓ, mo faa mo ka gak kwan Masǝŋ ya, amma mo rõm kyaŋ ko, mor ɓǝ ɓo daŋ a wol ahe. 15 Mo lǝŋ Masǝŋ ka ŋgoŋ kiita ya, mor ka ɓaŋ syiŋ faɓe' ya. 16 Mor ah mo faa ɓǝ makol ah ga haihai ko. Ɓǝ ah a wat, mo ka tǝ tan mor ɓǝ mai mo tǝ faa ne zah ɓo laŋ ya.
© Bible Moundang © Alliance Biblique du Tchad, 1996.
