1 Ne cok magwiiŋgaɓ moo byaŋra cokki, mo tǝ ɓǝ ah ɓe ne? Mo kwo nǝǝmin ne byaŋ we taa ɓe ne? 2 Mo gbǝ ɓil ɓe, mo gak kee fĩi ah ka tan zah'nan byaŋ ah no ne? 3 Mo tǝ cok mai moo keara ne bem wee ɓǝǝ ɓe ne? 4 Wee ɓǝǝ a giŋra kǝsyicokki, a yeara pǝswahe, mo kalra ge lal ɓe, ka jinra gin dǝ̃ǝ yao.
5 Azu ye joŋ ka korro cok mo yeara ne tǝtǝl ɓǝǝ ne? Azu ye wǝǝ dalla ɓal ɓǝǝ ka soɓ ra kyãh ne? 6 Ame ye nyi kǝsyicok ɓo nyi ra ka mo ciŋ yaŋ ɓǝǝra, ka mo swahra pǝ cok mai lǝǝ mo gŋ, 7 ka mo byakra suu ɓǝǝ lal mo laara cii fan ma joŋ tǝgǝǝ yaŋ ge sok ka. Dǝɓ ma gak lim ra ka gban ra joŋ yeɓ kǝka. 8 A kyãhra pii suu ɓǝǝ tǝwaare, a kyeɓra fan mapǝ̃ǝ ah gŋ ka renne.
9 Mo lǝŋ sǝǝ zyii joŋ yeɓ nyi mo no ne? A zyii swǝ pǝ jol yaŋ ɓo ŋhaa ka zah'nan mo cee ne? 10 Mo gak gbǝ ne sal saa ka mo so pǝpǝǝ nyi mo 'wah no ne? 11 Mo gak gbǝ yǝk ɓǝ ah kaa ne ko ŋ a pǝswah pǝlli, ka mo so joŋko yeɓ ɓo magaɓ ah nyi mo ne? 12 Mo gak gbǝ yǝk ah kaa ne ka mo ɓaŋko sor gin cok gee mo yaŋ ne ka rǝk ga cel ne?
13 Majuulii pǝhah no cam, amma ka gak zoo tǝgbana makãhgoŋ ya. 14 Majuulii a ɓoo pãa ah soɓ tǝ sǝrri, mor ka cok cwak ah mo lǝǝ cok wo pãa ahe. 15 A yaŋ ɓǝ mai ɓal ga dahe, wala mai nǝǝ cok moo ga dahe, a yaŋni. 16 A joŋ pãa ah tǝgbana mǝ ah ye ka, ka foo sõone yeɓ 'min a yea tǝkolle ya ta. 17 Ame ye joŋ ko ɓo pǝ tǝgwĩi naiko, me nyi yella nyi ko ya. 18 Amma mo tǝŋ ɗul ɓe, a syak pǝr ne dǝɓ ma yee tǝl ah daŋ syakke.
19 Joɓ, amo ye joŋ pǝr ɓo pǝswah nai ne? Amo ye nyi kãhm nyi ra ne? 20 Amo yee joŋ ra zwǝǝ ga sǝŋ na tǝzyee tǝkine fee za ne võo fǝrfǝr ne? 21 A kǝ̃ǝra sǝr ne ɓal pǝ cok ma tǝforoŋ ahe, a laara pǝ'nyah ne swah ɓǝǝra, a gara zah sal ne swah suu ɓǝǝ daŋ. 22 Tǝra fan ma ɗii ne gal a, fan sal ka gak yee zah ɓǝǝ soo nǝfal a. 23 Fan sal mai za ma yee pǝr mo woora ɓo a ciini, a sãh com pǝfãi rakkǝkǝ. 24 Ne cok lagaita mo ul pǝr mo laara cii ah ɓe, ka gak uura yao, a nǝǝ ɗul ne swahe. 25 Ne cok mai mo ulra lagaita ɓe daŋ, pǝr a ɓyaŋ zyii ah ne ko. A hǝǝ laa fuŋ sal kǝpel ka ɓah ga wol ah gwari ya ba, a laa kyaŋ ɓyaŋ ɓǝ zaluu sal tǝkine cii salle.
26 Amo yee faa nyi matǝkwak mo zoo raŋ ɓoo tǝtǝl ge fah morkǝsǝŋ ne ne? 27 Vak a byak ɓǝ faa zah ɓo ɗao ko a zooni, wala a ga syii kol ah tǝwaa mawah ah ba ne? 28 Zyeɓ yaŋ ah ɓo pǝ cok mayak ah tǝlǝǝ waa sǝŋ kǝraɓ. 29 A kaa gŋ ŋhaako, a kwan cok kah ah gwari ne ma lal pǝɗǝk daŋ mor ka ga in fan ka renne. 30 Wee vak a zwahra syim fanne, pǝ cok mai wul fan mo gŋ, vak a yea gŋ ta.
© Bible Moundang © Alliance Biblique du Tchad, 1996.
