1 Dǝɓlii faa ɓǝ nyi Joɓ faɗa, faa: 2 Pa syesyel ne Masǝŋ ma ne swah daŋ, mo ga soɓ faa ɓǝɓe' tǝ Masǝŋ o ne? Wala mo ga zyii fii mai me tǝ ga fii mo ne ne? 3 Joɓ zyii zah Dǝɓlii faa: 4 Ame ye ka fan ki ya, me gak zyii ɗah ɓǝ fẽe ga zah ne? Me ga coo jol ga zahe, me ka faa ɓǝ yao. 5 Me faa ɓǝ pǝ̃ǝ kal vaŋno, koo gwa ɓe, me ka tǝ ga fǝ̃ǝ faa ah yao. 6 So Dǝɓlii faa ɓǝ daga pǝzyil zyak ge nyi Joɓ faɗa, faa: 7 Mo ur uu sǝŋ tǝgbana dǝworre, ka mo zyii fii mai me tǝ ga fii mo ne ko. 8 Mo kyeɓ ka cuu me ye ka dǝɓ tǝ goŋga ya, mo faa ɓǝɓe' tǝ ɓe, ka soɓ suu ɓo uu ga pǝ cok dǝɓ sãhe, ka nai ya ne? 9 Joɓ, amo pǝswah tǝgbana me no ne? Kyaŋ ɓo gak cii pǝ'man tǝgbana ma ɓe no ne? 10 Mo no nai ɓe, ka mo ur mo zyeɓ suu ɓo ne fazyee goŋ ɓo tǝkine yǝk ɓo. 11 Mo ẽe za mai moo yiira suu ɓǝǝra, mo ɓaŋ kpãh tǝ ɓǝǝ ka mo tǝr ra ne ko. 12 Oho, mo ɓaŋ nahnǝn ẽe ra ka mo gbah ra ɓaa ge sǝŋ, mo dah ra ge gŋ ne ɓalle. 13 Ka mo so cii ra daŋ ge mor sǝrri, ka bam ra rǝk pǝ cok mai za wul mo gŋ. 14 Nai ɓe, me ye ga tǝŋ yii mo kǝpelle, ka mo ye kaa kacella ɓo ne swah suu ɓo.
15 Mo ẽe zom ɗǝ, ame ye joŋ ko na me joŋ mo ta, so a ren fãa tǝgbana dǝǝ. 16 Amma suu ah pǝswah no cam, zahsǝ̃ǝ suu ah ra pǝswah pǝlli ta. 17 Mo ɓaŋ sǝ̃ǝ ge sǝŋ ɓe, a uu tǝgbana kpuu masãhe, sǝ̃ǝ ɓal ah ra laŋ pǝswah no cam. 18 Woiŋ ah ra a pǝyak tǝgbana vãmme, ɓal ah ra pǝyak na kǝndaŋ vãmme.
19 Ako ye fan matǝ gǝriŋ ah mai mo kal fan joŋ ɓe ra ɓo daŋ. Sai ame pa ma joŋ ah me ye gak kaa kacella tǝl ah to. 20 Farel ah a ur gin tǝwaa pǝ cok mai nǝǝ cok moo joŋra kyẽm gŋ ginni. 21 A swan sǝŋ mor kpuu ganne, a muŋ suu ah pǝzyil tahn pǝ cok mai bii mo gŋ. 22 Goo gan a ɓuu gin tǝl ah a rii cee tǝl ahe. 23 Bii mo tǝ gin ɓe laŋ, ka ɗuu gal ah ya. Ne cok bii mo tǝ ɓaa gin nyi nahnǝn laŋ, a kaa 'wa. 24 Azu yee gak coo nahnǝn ah ga tǝki ka so gban ko ne? Azu yee gak gbǝ ɓee võo nyi ka gban ne sal joŋ kyẽm ne ne?
© Bible Moundang © Alliance Biblique du Tchad, 1996.
