1 Mo gak gbǝ Leviatan wala baŋ zah nyi ne sal no ne? 2 Wala mo gak gbǝ zah nyi ne kǝṽǝl ne? 3 A ga pǝǝ mo ka mo soɓ zye ɓoo kal no ne? A ga syea mo ka mo kwo syak tǝ 'min no ne? 4 A ga zyeɓ ɓǝ ne mo ka mo gbǝ zah ne ki ka joŋ yeɓ nyi mo no ne? 5 Mo gak joŋ ko na we juu malaŋ ah ka joŋ kyẽm ne ki no ne? 6 Za ma gban syiŋ a gbǝra ko ka lee fan ne no ne? Za ma joŋra fillu a ŋgomra nǝǝ ah lea fan ne no ne? 7 Mo gak gee wak ciciifal ah ne kǝpẽe no ne? Wala mo gak swǝ ne zǝǝ gin tǝtǝl gee no ne? 8 Mo juu jol ge wol ah na fan kyeɓ tǝnyee ne ki ɗao, mo ka so fǝ̃ǝ juu ah yao.
9 Koo zune mo kwo Leviatan ɓe, swah suu ah a vǝr tǝɗe' a lee ga sǝŋ sǝ. 10 Ne cok Leviatan mo ur ɓe, a ẽe cok mgbõo, dǝɓ ma gak uu pel ah kǝka. 11 Azu ye gak ruu sal ne ki ka pah ah mo so yea jam ne? Pa ma gak joŋ ah kǝka wo sǝr vaŋno laŋ ya. 12 We soɓ me faa ɓǝ ɓal Leviatan ne 'man ah tǝkine swah ah nyi we. 13 Dǝɓ ma gak wǝǝ mbǝro wol ah kǝka, wala dǝɓ ma gak gee wak ah kǝka. 14 Azu yee gak joŋ ko ka gbǝr zah tǝkine syel ah ma ren gal dǝɓ ko ne? 15 Ciciifal ah a tǝgbana bal ma ruu salle, cwãa ɓo ge wo ki mbaŋmbaŋ, a pǝyak tǝgbana tǝsalle. 16 Tǝzyee fal ah daŋ mgbãara ki ɓo, zyak laŋ ka gak pǝ̃ǝ tǝgǝǝ ah ya. 17 Daŋ cwãa ɓo wo ki mbaŋmbaŋ, fan ma gak syel ga lal kǝka. 18 Mo syetǝsyem ɓe, cokfãi sǝǝ zǝrai, nahnǝn ah a sãh tǝgbana com moo zooni. 19 Paŋwii pǝ̃ǝ gin pǝ zah ahe, so wii myah gŋ gin lal kwiŋkwiŋ. 20 Suŋwii pǝ̃ǝ gin pǝ zah ahe, tǝgbana suŋwii suŋ ciiri. 21 Tǝ'yak zah ah a syen wii, paŋwii pǝ̃ǝ gin zah ahe. 22 Sol ah pǝswah no cam, koo zune mo zyaŋ ne ki daŋ gal ren ko. 23 Cok tǝtǝ̃ǝ ka wo waksuu ah ya, a pǝyak tǝgbana vãmme. 24 Gǝǝzyii ah pǝyak tǝgbana tǝsalle, ka ɗuu gal fan ki ya. 25 Ne cok mo ur uu sǝŋ ɓe, gorom laŋ ɗuura gal ahe, suu ɓǝǝ daŋ a yea pǝtǝtǝ̃ǝ ne galle. 26 Kafahe ka gak gee ko ya, koo guu ne zǝǝ ne kǝkahle daŋ ka joŋ fan ki wol ah ya. 27 Vãm a wol ah zahki ne fãa tǝɗe', vãm syẽ a wol ah tǝgbana kpuu mai mo sõo ɓo sõo. 28 Ka ɗuu gal guu ya, tǝsal garviŋ a wol ah tǝgbana zahwom mai fan moo dah ne ɓalle. 29 Kǝndaŋ a wol ah na kǝsyiiri. Ne cok za mo 'nǝǝ ko ne zǝǝ ɓe, a syak ɓǝ ah syakke. 30 Fyãh ah ra a tǝgbana kpẽe daceryaŋne, mo tǝ syee ɓe, a dan ga mor sǝr kpǝrim kpǝrim. 31 Mo tǝ syee mor bii ɓe, a joŋ bii laŋ tǝgbana tǝ zǝzǝǝre, a laŋ tǝgbana nǝm pǝ tǝgulli. 32 Mo tǝ syee mor bii ɓe, cok syel ah a ɗee pǝfãi. 33 Fan ma zahki ne ki kǝka wo sǝr a, ka ɗuu gal fan ki tǝ sǝr nyee ya. 34 A syẽa nǝǝ cok maluu syẽa daŋ, ako ye dǝɓlii tǝ fafyãh daŋ.
© Bible Moundang © Alliance Biblique du Tchad, 1996.
