JOƁ 9 - Bible Moundang (MUA)

Joɓ gak ka zyii ɓǝ zah Masǝŋ ya

1 Joɓ zyii faa: 2 Oho, me tǝ ɓǝ ah daŋ ɓo daga kǝpel dai, amma dǝfuu gak joŋ suu ah na pa tǝ goŋga ka ur ɓǝ ne Masǝŋ ɗǝne? 3 Dǝɓ ma gak syesyel ne ki no ne? Masǝŋ a gak fifii kal ujenere, dǝɓ ma gak zyii zah ah kǝka. 4 Masǝŋ pa fatan o, a pǝswah pǝlli ta, dǝɓ ma gak ur ɓǝ ne ki kǝka. 5 Fiŋ waa gin pǝ cok kal ɓǝǝra, so muŋ ra ne kpãh ahe. 6 Masǝŋ coo sǝr ŋhaa ŋgǝ̃ǝre, hah wǝǝdǝǝ mai sǝr mo uu ɓo tǝl ah ge sǝŋ. 7 Masǝŋ a gak cak com ka mo zoo ka, a gak cak ŋwǝǝmǝŋgai ka mo gak sǝǝ cok ne suŋ ka ta. 8 Dǝɓ ma gbah jol ah ne byak coksǝŋ ga sǝŋ kǝka, dǝɓ ma gbah jol ah ne syee tǝ wea bii mabii kǝka ta. 9 Masǝŋ ako ye joŋ ŋwǝǝmǝŋgai ma ɗii ne Swãhtǝkeekee ne ŋwǝǝmǝŋgai ma ɗii ne Makãhneweere, ne mai mo ɗii ne Maŋwǝǝceltǝgyaŋne tǝkine ŋwǝǝmǝŋgai ma fah morkǝsǝŋ daŋ. 10 Na ka gak tǝ mor ɓǝ fan matǝ gǝriŋ ah mai mo tǝ joŋko ya, dǝǝbǝǝri ah laŋ ka ne zahsyee ya ta.

11 Koo Masǝŋ mo ge tǝ pǝ̃ǝ kah ɓe laŋ, me ka kwo ko ya. 12 Mo ɓaŋko fan mai ako mo ne 'yah ah ɓe, dǝɓ ma gak cak ko tǝl ah kǝka, dǝɓ ma faa nyi ko mo joŋ fẽe mai ne kǝka ta. 13 Kpãh Masǝŋ a pǝ'manne, a tǝr za syiŋ ah ra ne ko. Koo za mai mo tǝ gbahra jol fan malii ma mor bii ma ɗii ne Rahaɓ laŋ, a ga keara sǝŋ pel ahe. 14 Me ga lwaa ɓǝ ko kẽe ka gak zyii zah Masǝŋ ne? 15 Koo me foo me ka ne ɓǝɓe' ya laŋ, me 'yah zyii ɓǝ ki zah ah ya. Fan mai mee gak joŋ ako ye mai ka me pǝǝ Masǝŋ pa kiita ɓe ka mo kwoko syak tǝ ɓe. 16 Ne daŋ laŋ, koo mo soɓko me ka me faa ɓǝ laŋ, me ka nyiŋ sõone a ga laa ɓǝ faa ɓe no ya. 17 Masǝŋ pee zyak mǝǝzuwuŋ ma'man ah ge fok me, kan syim wo ɓe ne bai mor ba ta. 18 Ka soɓ me fee tǝ'yak ya, fan mai mo tǝ joŋko wo ɓe daŋ, ɓǝ ah joŋ me ɓo tǝ swaa ɓǝ pǝlli. 19 Me gak joŋ Masǝŋ ne swah no ne? Me ɗii ko ga kiita ne ne? Azu ye ga joŋ ko ga gŋ ne? 20 Koo me foo me ka ne ɓǝɓe' ya me njaŋ laŋ, amma ɓǝ faa zah ɓe ka pǝsãh ya, ɓǝ mai mee faa daŋ a nǝn pǝkoŋ ŋgoŋ kiita tǝ ɓe. 21 Ame ka ne ɓǝɓe' wo ɓe ya, amma me ka tǝ ẽe ɓǝ suu ɓe ya, me ka ne koŋ ka yea ne cee yao. 22 Dǝɓ ma bai ɓǝɓe' ne pa faɓe' gwa daŋ ka ne ɓǝ ya, Masǝŋ ga muŋ na daŋ. 23 Ne cok ɓeɓ mo ge lwaa dǝɓ ma bai ɓǝɓe' mo wǝ ne gwari nai sǝ ɓe, Masǝŋ a syak ɓǝ ah syakke. 24 Masǝŋ nyi sǝr ɓo nyi dǝɓ faɓe', rǝ̃ǝ nahnǝn ɓo nyi za lakaali ne lii ɓǝǝ daŋ. Masǝŋ ye mo ka joŋ ɓo ya ɓe, azu ye pa joŋ ah ne?

25 Zah'nan cee ɓe tǝ ɗuu kal ga ne swah tǝgbana dǝɓ mai mo tǝ ɗuɗuu, masãh ah kǝka gŋ ya. 26 Zah'nan cee ɓe a syee ga ne swah tǝgbana dah keeŋgai, a hǝǝ ga gwari gwari tǝgbana vak moo hǝǝ tan ga tǝ fanne. 27 Koo me syesyak me kyeɓ ka yaŋ tǝ ɓǝ nyee ɓe me tǝ kyãh laŋ, bone ɓe ra daŋ a ga pii soo ge tǝ ɓe kpǝ, 28 mor me tǝ ɓe, Masǝŋ gbǝ me ɓo na pa ɓǝɓe'. 29 Ko Masǝŋ mo gbǝ me ɓo na pa ɓǝɓe' nai ɓe, me so gaɓ suu ɓe tǝkol mor fẽe faɗa ne? 30 Tǝm ka gak vãh faɓe' ɓe ra ga lal a. 31 Masǝŋ ɓaŋ me maa ge ɓo pǝ lakre, fan wo suu ɓe daŋ ii ɓo, so tǝ ren swãa ɓe. 32 Kǝnah Masǝŋ mo dǝfuu ye ɓe, me ga zyii ɓǝ zah ahe, so ru ga pel kiita ru ga ŋgoŋ ɓǝ ɓuu gŋ. 33 Amma dǝɓ ma gak wahl tǝgǝǝ ɓuu ka yea ya, dǝɓ ma ŋgoŋ kiita ɓuu gwa daŋ ka yea ya ta. 34 Masǝŋ, mo soɓ bone mai mo tǝ cuu nyi me o. Mo ɓaŋ gal mai mo tǝ ren nyi me ge lal o. 35 Me ka ɗuu gal a. Me ga faa ɓǝ, mor me tǝ zahzyil ɓe ɓe.