Yaŋ mai ka za mo ɗuu zah mawul ge muŋ gŋ
1 Dǝɓlii faa nyi Joswa: 2 Mo faa nyi za Israel sye: We kyeɓ yaŋ mai wee ga ǝ̃ǝ suu ɓii gŋ tǝgbana me faa ɓǝ ah nyi we ne zah Mosus. 3 Ka dǝɓ mo zyak i dǝɓ ki pǝ wul ɓe, mo ɗuuko zah ma wul ge muŋ gŋ. Yaŋ ah ga ǝ̃ǝ we jol dǝɓ ma kyeɓ ka faŋ val wul tǝ ɓiiri. 4 Ka pa in wul mo nǝǝ yaŋ rai vaŋno mo ɗuu ge gŋ, ka mo geko ɓe, mo uuko zahfah yaŋ ahe, mor ka mo keeko ɓǝ fan mai mo joŋko daŋ pel zaluu yaŋ ahe. So zaluu rai ga zaŋra ko ga wo ɓǝǝ tǝgǝǝ yaŋ ne ko, a ga nyira cok kal nyi ko ka mo kaako wo ɓǝǝra. 5 Ka dǝɓ ma faŋ val wul mo ge ɓe, za yaŋ ah mo soɓra pa in wul nyi ko ka, mor dǝɓ ah i jǝk ah ɓo ka kee ya, syiŋ ko laŋ pǝtãa ɗǝ ya. 6 Ka dǝɓ ah mo kaako yaŋ moo ŋhaa cok mai moo ga uuko pel za pãa ka ŋgoŋ kiita, ŋhaa ka dai zah'nan wul pa joŋzahsyiŋ malii mai mo tǝ joŋ yeɓ ne cok ahe. Ka fahfal ah pa in wul mo pii sooko ge yaŋ ɓǝǝ ka mo ge kaako ɓǝr yaŋ syak ah mai mo ɗuuko gin gŋ soɓɓe.
7 Ne cok ah nǝǝra Kedes ma sǝr Galile tǝ waa Naftali ne Sikem tǝ waa Efraim, ne Kirjat-Arba, tǝgba faa: Hebron, tǝ waa Yuda rǝk mor yeɓ ahe. 8 Ma Yordan nǝzakǝŋhaa nǝfah kǝmorcomzah'nan laŋ syenra Bezar ma kǝsyicok tǝbǝǝ mǝ ban Benyaamin, ne Ramot pǝ sǝr Giliat mǝ ban Gad, ne Golan ma pǝ sǝr Basan mǝ ban Manasse. 9 Yaŋ mai mo syenra mor za Israel tǝkine za gwǝǝ mai mo kaara ɓo kǝsyil ɓǝǝ daŋ ko raiko. Koo zune daŋ mo i dǝɓ ɓo ka kee ya ɓe, mo ɗuuko ge gŋ ka mo wǝko ne jol dǝɓ ma faŋ val wul ka, ŋhaa ka mo ge uuko pel za pãa ka ŋgoŋ kiita ahe.
© Bible Moundang © Alliance Biblique du Tchad, 1996.
