Joswa nyi fahlii nyi zahban ma morcomzah'nan jinni
1 So Joswa ɗii Rubenien ne Gadien tǝkine raita ban Manasse ma morcomzah'nanne, 2 faa nyi ra: Awe byak ɓǝ mai daŋ Mosus dǝɓ yeɓ Masǝŋ mo faa nyi we, so we laa zah ɓe pǝ ɓǝ makẽne daŋ me faa nyi we ta. 3 Zah'nan pǝpãa ɓe, we soɓ wee pa ɓii ya, ŋhaa tǝ'nahko. So we gbǝ ɓǝ lai Dǝɓlii Masǝŋ ɓiiri. 4 Zǝzǝ̃ǝko Dǝɓlii Masǝŋ ɓii nyi 'yak nyi wee pa ɓii tǝgbana mai mo faa nyi ra ɓe. We pii soo ge yaŋ ɓii pǝ sǝr ma ɓii Mosus dǝɓ yeɓ Dǝɓlii mo nyi we kah el Yordan nǝfah morcomzah'nan o. 5 Sai we joŋ yella pǝlli, ka we gbǝ ɓǝ faa tǝkine ɓǝ lai mai Mosus dǝɓ yeɓ Dǝɓlii mo faa nyi we. We 'yah Dǝɓlii Masǝŋ ɓiiri, we syee mor ɓǝ ah ra. We gbǝ ɓǝ lai ahe, we mgbãa ko, we joŋ mor ah ne zahzyil ɓii tǝkine mazwãhsuu ɓii daŋ. 6 Joswa ẽe ra, so nyi fahlii nyi ra, kalra fah yaŋ ɓǝǝra. 7 (Mor Mosus nyi sǝr ɓo nyi raita morsǝ̃ǝ Manasse pǝ sǝr Basan, amma tǝcoŋ ɓǝǝ manyeeki laŋ Joswa nyi sǝr nyi ra ne wee pa ɓǝǝ tǝkee el Yordan nǝzakǝi nǝfah kǝmorcomlilli.) 8 Ne cok Joswa mo nyi fahlii nyi ra ka ga yaŋ ɓǝǝra, so ẽe ra, faa nyi ra: We pii soo ge yaŋ ɓii ne joŋ malii mai we lwaa ɓo tǝkine faɓalle, vãm solai, vãm kaŋnyeeri, vãm syẽ ne vãm fuu tǝkine mbǝro mai we lwaa ɓo pǝlli. We ge wom fan mai we lwaa zah sal nyee daŋ ne wee pa ɓiiri.
9 So ban Ruben ne ban Gad tǝkine raita ban Manasse urra gin wo za Israel yaŋ Silo pǝ sǝr Kanaan ka ga Giliat pǝ sǝr ma ɓǝǝ mo lwaara ɓo tǝgbana Dǝɓlii mo faa ɓǝ ah ne zah Mosus.
Vuura cok joŋ syiŋ kah el Yordan
10 Ne cok mo ge daira pǝ cok maki ah kah el Yordan pǝ sǝr mai Kanaan ye mo lwaa ɓo, wee Ruben ne wee Gad tǝkine raita ban Manasse ma morcomzah'nan vuura cok joŋ syiŋ gŋ kah el Yordan, cok joŋ syiŋ ah pǝ'manne, a pǝsãh no cam. 11 Za Israel laara ban Ruben ne ban Gad tǝkine raita ban Manasse vuura cok joŋ syiŋ ɓo kah el Yordan tǝ sǝr Kanaan nǝzakǝ mǝ za Israel. 12 Ne cok za Israel mo laara ɓǝ ahe, so pãa za Israel daŋ taira ki ge Silo mor ka ga ruu sal ne ra.
13 Za Israel peera pee ge wo ban Ruben ne ban Gad tǝkine raita ban Manasse pǝ sǝr Giliat. Peera Fineas we pa joŋzahsyiŋ Eleasar, 14 tǝkine za goŋ jemma, goŋ vaŋno vaŋno daŋ gera ɓo zahwaa ban yaŋ Israel. Koo zune kǝsyil ɓǝǝ daŋ ako ye dǝɓlii yaŋ ah matǝ za ujenere ujenere kǝsyil za Israel. 15 Gera wo ban Ruben ne ban Gad tǝkine raita ban Manasse pǝ sǝr Giliat, faara nyi ra: 16 Za Dǝɓlii daŋ faara sye: Ɓǝɓe' fẽe we so joŋ ɓo wo Masǝŋ Israel faɗa ne? Mor fẽe we so pii soo we soɓ syee mor Dǝɓlii ka we so vuu cok joŋ syiŋ ŋhaa ka we so ŋwookyaŋ ne ki tǝ'nah ne? 17 Faɓe' mai Peor mo joŋ kii na ya ne? Ŋhaa zǝzǝ̃ǝ nǝǝ gin wo man vǝr a, bone laŋ ge tǝ za Dǝɓlii mor ahe. 18 So tǝ'nah we pii soo ɓo kpǝ, we soɓ syee mor Dǝɓlii ɓe. We so ŋwookyaŋ ne ki ɓe faɗa. Tǝ'nan a ga ɓaŋ kpãh tǝ za Israel daŋ. 19 Amma sǝr ma ɓii mo ka daŋdaŋ yao ɓe, pǝram we yee ge kaa pǝ sǝr mǝ Dǝɓlii pǝ cok mai cok kal Dǝɓlii mo gŋ o, ka we yea ne sǝr kǝsyil ɓuuru, amma we ŋwookyaŋ ne Dǝɓlii ka, we woŋ ki ne ru laŋ ka ta, mor we tǝŋ joŋ ah ɓo ko we vuu cok joŋ syiŋ mai mo cok joŋ syiŋ ma wo Masǝŋ Dǝɓlii man ye ka. 20 We foo ɓǝ Akan we Zera, joŋ ɓǝɓe' ne lal woo fan mai Dǝɓlii mo soɓ ne tǝkẽawãk ka vǝrri, so kpãh Masǝŋ ge tǝ za Israel daŋ mor ahe, dǝɓ ah muŋ syak ah tǝ ɓǝ faɓe' ah mo joŋko ya.
21 Ban Ruben ne ban Gad tǝkine raita ban Manasse zyiira zah zaluu matǝ za yaŋ Israel ujenere ujenere faa: 22 Pa ma ne swah daŋ ako ye Masǝŋ, ako ye Dǝɓlii! Pa ma ne swah daŋ ako ye Dǝɓlii! Tǝ ɓǝ mai ru joŋ ɓe. Israel laŋ ga tǝ ta. Ru ŋwookyaŋ ɓo ne ki ɓe, wala ru zǝǝ tǝ ɓǝ lai ah ɓe, ka mo ǝ̃ǝko ru tǝ'nah ka. 23 Ru vuu cok joŋ syiŋ ɓo mor ka ru soɓ syee mor Dǝɓlii ɓe, wala ka ru tǝǝ syiŋ suŋwii tǝl ahe, koo ka joŋ syiŋ ma ne sum gŋ wala ka joŋ syiŋ ma nyi jam tǝl ahe, pǝram ka Dǝɓlii mo ŋgoŋko kiita tǝ ɓuuru. 24 Ɓǝ ah ka nai ya, amma ru ɗuu gal ɓo, ru foo ɗah maki tǝ'nah ɓe, wee ɓii ga faa nyi wee ɓuuru: Ɓǝ Dǝɓlii Masǝŋ Israel saaŋ we ɗǝne ne? 25 We ẽe ɗao, Dǝɓlii kan zahsyee ɓo kǝsyil man ne el Yordan, awe ban Ruben ne ban Gad we ka ne sǝr wo Dǝɓlii ya. Mo nai ɓe, wee ɓii ga kǝǝra wee ɓuu ka so ɗuura Dǝɓlii ya. 26 Mor ah ru faa pǝram na vuu cok joŋ syiŋrĩ, ka mor ka ru tǝǝ syiŋ suŋwii gŋ ya, ka mor ka ru ŋgoŋ fan joŋ syiŋ gŋ ne ya ta. 27 Amma a tǝgbana syedowal kǝsyil ɓuu ne we tǝkine kǝsyil wee ɓuu fahfal ɓuu ne wee ɓiiri, ka cuuni, ru joŋ yeɓ pel Dǝɓlii ne joŋ syiŋ suŋwii ɓuu tǝkine syiŋ ma nyi jam. Mor ka tǝ'nan ɓe, wee ɓii mo ge faara nyi wee ɓuu we ka ne faren wo Dǝɓlii ya ka. 28 Mor ah ru faa: Moo ga faara ɓǝ mai tǝ'nan nyi na nai ɓe, wala koo wee man fahfal mana, ru ga zyii zah ɓǝǝ faa: We ẽe foto cok joŋ syiŋ Dǝɓlii mai pa ɓuu mo joŋra ɗǝ, ru joŋ fan ah ɓo ka mor joŋ syiŋ suŋwii gŋn a, ka mor ka joŋ syiŋ maki ah gŋ ya ta. Amma mor ka mo yea na syedowal kǝsyil ɓuu ne we. 29 Masǝŋ mo cak ru ne ŋwookyaŋ ne Dǝɓlii ka ru soɓ syee mor ah ka so vuu cok joŋ syiŋ ka joŋ syiŋ suŋwii gŋ ne syiŋ sum tǝkine syiŋ maki ah mai mo ka pel tal mbǝro cok kal Dǝɓlii Masǝŋ ya.
30 Ne cok ah pa joŋzahsyiŋ Fineas ne za goŋ mai ara ye mo zaluu matǝ za yaŋ Israel mo ne ki, laara ɓǝ mai ban Ruben ne ban Gad tǝkine raita ban Manasse mo faara, ɓǝ ah 'nyah suu ɓǝǝ pǝlli. 31 So Fineas we pa joŋzahsyiŋ Eleasar faa nyi ban Ruben ne ban Gad tǝkine raita ban Manasse: Tǝ'nah ru tǝ ɓe, Dǝɓlii no kǝsyil mana, mor we joŋ faɓe' wo Dǝɓlii ya, ne mai we ǝ̃ǝ za Israel jol Dǝɓlii ɓe.
32 Fineas we pa joŋzahsyiŋ Eleasar ne za goŋ mai mo ne ki urra gin wo Rubenien ne Gadien ge pǝ̃ǝra pǝ sǝr Gilgal kalra ge wo za Israel sǝr Kanaan, so keera ɓǝ ah nyi ra. 33 Ɓǝ ah 'nyah suu za Israel pǝlli, so za Israel joŋra osoko nyi Dǝɓlii, so soɓra faa ɓǝ ga ruu sal ne ra ka ɓeɓ sǝr mai Rubenien ne Gadien mo kaara ɓo gŋ o.
34 Rubenien ne Gadien ɗiira cok joŋ syiŋ ah ne Syedowal, mor faara: Ako ye syedowal kǝsyil ɓuu ka cuu: Dǝɓlii ye Masǝŋ.
© Bible Moundang © Alliance Biblique du Tchad, 1996.
