Laa bone, toobii, ne ɓǝ 'nyah ma pelle
1 Ame ye dǝɓ ma laa bone fasyen mai Dǝɓlii moo lai dǝɓ ne ko.
2 Waa me ne swah ŋhaa me syee pǝ cokfuu.
3 So a in me cẽecẽe bai kwan syak tǝ ɓe.
4 Joŋ me ŋhaa me nyah soɓ tǝtǝl to,
So hah woiŋ ɓe.
5 Gaa me ge pǝ daŋgai ɓǝ foo tǝkine fasyenne.
6 Joŋ me ne swah ka me kaa pǝ cokfuu mai za wul mo gŋ.
7 Baŋ me ɓo ne celeelu,
Ame ye dǝɓ daŋgai,
Yella ka me ɗuu ǝ̃ǝ kǝka.
8 Me gaɓ ne dahgorre, me 'yah gbah jolle,
Amma Masǝŋ zyii laa yee ɓe ya.
9 Me tǝ syee ɓe, me laŋ geri geri,
Tǝsal maluu wea ryaŋ zah ɓe,
Me cii ne kǝǝ kẽne daŋ fahlii kǝka.
10 Dǝɓlii uu pǝzyil fãa 'yaŋ byak me na sǝǝ,
Lal fuu ɓe na ɓolle.
11 Nĩi me gin tǝ fahlii,
Pahl me kãkkãk so soɓ me myah gŋ.
12 Yil saŋ ahe,
So ɓaŋ guu lii jol ge tǝ ɓe ne ko.
13 Dǝ me ne guu dan ge gŋ ne zahkee daŋ.
14 Za daŋ a zokra com ne syak me.
Me ciŋ fan sǝǝ zahzyel ɓǝǝ ɓo.
15 Nyi fasyen magaɓ ɓo nyi me na farel tǝkine bii zwanne.
16 Gbǝ me cii zah ɓe ge tǝ sǝrri,
So hah syel ɓe ge tǝ tǝsalle.
17 A fẽe ye jam suu,
Ne kal tǝ jam tǝkine laa pǝ'nyah sye ne,
Me yaŋ tǝl ah ɓe.
18 Coŋ zah'nan ɓe ɓo ka wo sǝr pǝlli yao,
Fan byak ɓe gin wo Dǝɓlii kǝkao.
19 Ɓǝ fasyen mai mo tǝ syen me,
Ne ɓǝ kyãh ɓe me tǝ kyãh bai yaŋ,
Ɓǝ foo ah a wo ɓe na fawul mazwak ah dǝɓ moo renne.
20 Ɓǝ foo ah ka gak rwah gin ɓǝr ɓe kpee ya,
Ɓǝ ah pǝ̃ǝ swah ɓe ɓe.
21 Amma ɓǝ maki ah no vaŋno,
Me foo ɓǝ ah ɓe,
A joŋ mee kan nahnǝnni:
22 'Yah mai Dǝɓlii mo ne ko ka wuu kpee ya,
Kwan syak ah mo ne ko, a no 'wa ba.
23 Ɓǝ sãh Dǝɓlii a yea pǝfuu zah'nan daŋ,
Dǝɓlii, dǝɓ ma joŋ ɓǝ faa ah ga cok ah na mo kǝka!
24 Dǝɓlii ye zah fan ma ɓe,
Mor ah fan byak ɓe uu ɓo tǝl ahe.
25 Dǝɓlii a pǝ'nyah wo zune daŋ mo soɓ suu ah ɓo wol ahe.
26 Mor ah a pǝsãh ka na byak ka mo ǝ̃ǝko na,
A pǝsãh ka na rõm byakke.
27 A pǝsãh ka dǝɓ mo fee rõm mai ne cok ka a pǝlaŋ ba.
28 Ne cok dǝɓ mo tǝ laa bone ɓe,
Mo kyeɓko cok mai moo yeako gŋ syak ah ka mo kaako 'wa gŋ rõm fanne.
29 Mo ɗǝŋko ge sǝŋ ne wonsuu,
Ɗah maki Dǝɓlii gin gbah jol ah no ne?
30 Koo mo loɓra ko wala mo tǝǝra ko laŋ,
Mo nyiŋko ɓǝ ahe.
31 Mor Dǝɓlii a kwan syakke, ka ga soɓ na myah ga lal lii ya.
32 Koo mo joŋko na laa bone laŋ, 'Yah mai mo 'yahko na ɓo ne ko a pǝ'manne.
33 Ka laako pǝ'nyah ne joŋ naa swaa ɓǝ wala laa fasyen a.
34 Ne cok za moo joŋ za daŋgai pǝɓe',
Dǝɓlii tǝ ɓe.
35 Ne cok mai moo joŋra dǝfuu pǝɓe',
Dǝɓlii tǝ ɓe.
36 Ne cok za moo ɓeɓra ɓǝ kiita,
Dǝɓlii tǝ ɓe.
37 Azu ye gak faa ɓǝ vaŋno ka fan ah mo joŋ bai mai Dǝɓlii ye mo nyi fahlii ah nyi ne?
38 Dǝɓlii yee nyi fahlii ka ɓǝ ma'nyah ah wala maɓe' ah mo ge joŋ.
39 Ne cok Masǝŋ mo ŋgoŋ kiita tǝ man tǝ ɓǝ faɓe' man ɓe,
Na so ɓer zah mor fẽene?
40 Na lii ɓal syel man pǝsãhe,
Ka na pii soo ge wo Dǝɓlii.
41 Na gbǝr zahzyil man nyi Masǝŋ ma no sǝŋ,
Na juupelle, na faa:
42 Aru joŋ faɓe' ɓo, ru so ŋwookyaŋ, so Dǝɓlii,
Amo rõm ru ya.
43 Amo nĩi ru, mo so ik ru,
Kpãh ɓo mo ɓaŋ ɓo cak ɓǝ kwan syak ɓo mo ne ko.
44 Mor mo uu ɓo nǝn swãh bam mai zah yii ah mo pǝyǝkki,
Juupel ɓuu ka lwaa pǝ̃ǝ gŋ ga dai mo ya.
45 Mo joŋ ru ɓo na hal mai zah 'nahm daŋ moo tai ga tǝl ah kǝsyil za sǝrri.
46 Za syiŋ ɓuu daŋ a tǝǝra ru, tǝkine syak ru.
47 Ma ɓuu ru kaa ɓo pǝzyil ɓeɓɓe,
Ne zahzyil nǝǝni,
Ru kaa ɓo pǝzyil gaɓ ne ɗuu galle.
48 Nahnǝn ɓe a ɗuu mĩi ga sǝŋ na bii,
Jol yee mai me tǝ yee mor za ɓe mo ɓeɓra ɓo.
49 Nahnǝn ɓe a ɗuu mĩi yee gin lalle,
Ka ee ya,
50 Ŋhaa ka Dǝɓlii ẽe cok daga coksǝŋ ge sǝŋ,
So kwo ɓe,
51 Ne cok me kwo fan mai mo tǝ joŋ wo ŋwǝǝ yaŋ nyẽe ɓe,
Zahzyil ɓe a yeyee.
52 Za mai mo syiŋra me ɓo tǝkol 'wel,
Saara mǝmmǝǝ gbǝ me ne ko na juu.
53 Ɓoora me ge pǝ lak ne nahnǝnni,
So coora zah ɓe ge gŋ ne tǝsalle.
54 Bii tǝŋ sǝ̃ǝ me,
Me foo mai zah'nan wul ɓe ge ɓe.
55 Dǝɓlii, me dah yee mor lak ŋhaa ɗii mo gin ne ko.
56 So ne cok me pǝǝ mo ka mo laa yee ɓe,
Amo laa sǝ ta.
57 Amo zyii zah ɓe, mo faa nyi me,
Me ɗuu gal ka.
58 Amo ɗuu gor ge tǝ ɓe Dǝɓlii,
Mo ǝ̃ǝ me zah wulli.
59 Mo tǝ ɓǝɓe' mai mo joŋra wo ɓe ɓe,
Me 'yah mo ŋgoŋ kiita ah zyii ɓǝ ge mor ɓe ne ko.
60 Za syiŋ ɓe syiŋra me ɓo pǝlli,
Mo tǝ ɓǝ ah ɓe,
Tǝkine mai mo baŋra zah tǝ ɓe daŋ.
61 Mo laa tǝǝ ɓǝǝ mo tǝ tǝǝra me ne ɓe Dǝɓlii,
So mo tǝ ɓǝ baŋ zah ɓǝǝ mo baŋra ɓo belbel ɓe ta.
62 A zokra com wõi ne faa ɓǝ ɓe tǝkine foo yella mai ka rǝ joŋ me ne pǝɓe'.
63 Daga zah'nan ŋhaa suŋni,
A ɗǝǝra lǝŋ syak me ne ko.
64 Mo joŋ wo ɓǝǝ na mo joŋra wo ɓe ta Dǝɓlii.
65 Dǝɓlii, mo yer zahzyil ɓǝǝra,
Ka mo so ɓoo zahyee nyi ra.
66 Mo nĩi ra ne kpãhe,
Mo vǝr ra gin wo sǝrri!
© Bible Moundang © Alliance Biblique du Tchad, 1996.
