Faɓal mai wee gak re nǝǝ ahe
(CuuƁ 14:3-21)1 Dǝɓlii faa nyi Mosus ne Aron: 2 We faa nyi za Israel sye: Faɓal mai mo wo sǝrri, 3 mai fyãh ɓal ah mo sǝǝ ɓo, so moo guu wom daŋ, we gak re nǝǝ ahe. 4-6 Amma we re njoŋnjoŋ ka, we re tǝkpiiwa tǝkine cõi ka. We kwo ra tǝgbana a ne 'nahm wo Dǝɓlii. A guura wommi, amma fyãh ɓal ɓǝǝ sǝǝ ya. 7 We re bil ka, we kwo tǝgbana a ne 'nahm wo Dǝɓlii. Fyãh ɓal ɓǝǝ sǝǝ ɓo, amma ka guura wom ya. 8 We re nǝǝ fan marai ka, wala we juu wul ɓǝǝ laŋ ka, a pǝɓea wo Dǝɓlii.
9 We re zahban syiŋ mai daŋ mo ne kãm tǝkine tǝzyeere. 10 Amma fan mai daŋ mo pǝ bii, mo ka ne kãm ne tǝzyee ya daŋ, we re ka. 11 We kwo fan ah ra tǝgbana a ne 'nahm wo Dǝɓlii. We re nǝǝ fan marai ka, we juu wul ɓǝǝ laŋ ka ta. 12 Fan mai daŋ mo pǝ bii, mo ka ne kãm ne tǝzyee ya daŋ, we re ka.
13-19 We re juu marai ka: matǝrri, woŋguu, markwakke, tǝkelle, mavakmǝrrĩ, vakke, tǝmgbuuri, majuulii, mandahtǝfoofoo, makãhgoŋe, makǝrãhmo, weeweero, majuurãhsyiŋ, kyaŋsyiirǝŋ, ne kǝcwakdahɗǝ.
20 So fan manyee ah ra mai moo zwǝǝ ne yee daŋ a ne 'nahm wo Dǝɓlii, 21 sai fan mai mo ne ɓal ne zahrõm moo gak zwǝǝra zwǝǝre. 22 We gak re tǝzyeere, madahkahlle, ne tǝvãare. 23 Amma fan manyee ah ra mai mo ne yee, moo so keker daŋ, we kwo fan ah ra tǝgbana a ne 'nahm wo Dǝɓlii.
24-28 Koo zune mo juu wul faɓal marai ɓe, ka dǝɓ ah a ga yea ne 'nahm wo Dǝɓlii, ŋhaa a dai lilli, koo zune mo ɓaŋ wul ɓǝǝ ɓe, sai ka mo vãhko mbǝro wo suu ah ra ɗǝ, ka dǝɓ ah a ga yea ne 'nahm wo Dǝɓlii, ŋhaa a dai lilli: faɓal mai daŋ mo ne fyãh ɓalle, so fyãh ɓal ah mo sǝǝ ya, so mo ka guu wom ya, ne fan ma ne ɓal tǝ nai ah ra mai moo kerra tǝ sǝrri.
29-30 Ɗaŋwaare, gee, sonne, ne dǝwee daŋ, we kwo na a ne 'nahm wo Dǝɓlii. 31 Koo zune mo juu suu ɓǝǝ wala wul ɓǝǝ ɓe, ka dǝɓ ah a ga yea ne 'nahm wo Dǝɓlii, ŋhaa a dai lilli. 32 Wul ɓǝǝ mo kal lee ge tǝtǝl fẽene daŋ, ka fan ah ɓeɓ ɓe. Ɓǝ ah nai ne fan ma zyeɓ ne kpuu, mbǝro, wakke, wala sakke, fan mai dǝfuu moo joŋ yeɓ ne daŋ, sai we maa ge pǝ bii, amma ka fan ah a ga yea ne 'nahm wo Dǝɓlii, ŋhaa a dai lilli. 33 Wul ɓǝǝ mo lee ge tǝ fan ma na cii vuuri, fan mai mo ɓǝr ah daŋ, a ga yea ne 'nahm ta, sai we dah cii ah ge lalle. 34 Dǝɓ mo rǝk bii mai mo pǝ cii ah ge pǝ farel mafẽene daŋ, ka farel ah ɓeɓ ɓe. Koo fazwan mafẽene daŋ mo pǝ cii ahe, ka ɓeɓ ɓe ta. 35 Koo fẽene daŋ, wul fan marai mo kal lee ge tǝl ahe, ka fan ah a ga yea ne 'nahmme, mo cii yo, wala mo syea ma joŋ farel o, sai ka we dah ge lalle. 36 Amma biikyaŋ, wala lak bii, ka ga ɓeɓ ya, sai fan manyeeki ah ra, mai mo juu wul ɓǝǝra, a ga yea ne 'nahmme. 37 Pǝzyil fan marai vaŋno wul ah mo lee ge tǝ nah fan mai mo tǝ ga ruura ɓe, ka nah fan ah ga yea pǝsãh na matãa, ka ɓeɓ ya. 38 Amma dǝɓ mo faŋ nah fan ah ɓo ne bii, so wul fan marai vaŋno mo lee ge tǝl ah ɓe, ka nah fan ah ka pǝsãh yao.
39 Faɓal masãh ah mai dǝɓ moo gak re mo wǝ ɓe, dǝɓ mo juu wul ah ɓe, dǝɓ ah ga yea ne 'nahm wo Dǝɓlii, ŋhaa a dai lilli. 40 Koo zune mo re nǝǝ fan maki ah vaŋno kǝsyil fan marai ɓe, ka mo vãhko mbǝro ma wo suu ahe, amma dǝɓ ah ga yea ne 'nahm wo Dǝɓlii, ŋhaa a dai lilli. Koo zune mo ɓaŋ wul ah ɓe, sai mo vãhko mbǝro wo suu ah ra, amma dǝɓ ah ga yea ne 'nahm ŋhaa dai lilli.
41 We re nǝǝ fan manyee ah ra mai moo ker tǝ sǝr ker ka, a pǝɓe'. 42 Fan mai moo kerra tǝ sǝrri, wala fan ma ne ɓal tǝ nai, wala fan mai ɓal ɓǝǝ mo pǝpãare daŋ, 43 we ɓeɓ suu ɓii ne ren nǝǝ fan marai koo vaŋno ka. 44 Ame ye Dǝɓlii Masǝŋ ɓiiri, sai we yea daŋdaŋ, mor ame daŋdaŋ. 45 Ame ye Dǝɓlii mai me zaŋ we gin sǝr Egiɓ pǝ̃ǝ ne ko, mor ka me yea Masǝŋ ɓiiri. Sai we yea daŋdaŋ, mor ame daŋdaŋ.
46 Ɓǝ lai mai me nyi ɓo nyi we tǝ ɓǝ faɓalle, juu, ne fan mai mo pǝ bii, wala ne fan ma ker tǝ sǝr daŋ a koiko. 47 We joŋ yella, ka we woŋ tǝgǝǝ fan mai mo ka ne 'nahm ya, ne fan mai mo ne 'nahmme, tǝgǝǝ nǝǝ mai wee gak re, ne mai we ka re ya.
© Bible Moundang © Alliance Biblique du Tchad, 1996.
