Ɓǝ byak suu ŋwǝǝ ma bem weere
1 Dǝɓlii faa nyi Mosus: 2 Mo faa nyi za Israel sye: Ne cok mawin mo byaŋ we pǝwor ɓe, a ga yea ne 'nahm pel Dǝɓlii zah'nan rǝŋ, ɓǝ ah tǝgbana cok ŋwǝǝ saŋ ah ta. 3 Ne zah'nan patǝ nama ah ɓe, mo daara kan nyi wel ahe. 4 Fahfal ah ka mawin ah mo kaako byak zah'nan jemma sai tǝtǝl sai, ŋhaa ka syim ah ɗuu vǝr ɓe, mo juuko fan mai mo nǝǝ kan ɓo mor Dǝɓlii koo mafẽene ah ka, wala mo danko ge ɓǝr tal mbǝro Dǝɓlii ka ta, ŋhaa ka zah'nan byak suu ah mo cuu ɓo vǝr ɓe.
5 Amma mo byaŋ mǝlaŋ win ɓo ɓe, a ga yea ne 'nahm pel Dǝɓlii tǝgǝǝ zah'nan jemma tǝtǝl nai, tǝgbana ma ne cok ŋwǝǝ saŋ ah ta. Fahfal ah mo so kaako byak zah'nan jemma yea tǝtǝl yea, ŋhaa ka syim ah ɗuu vǝr ɓe.
6 Ne cok zah'nan byak suu ah mo cuu ɓo mo vǝr ɓe, mo we wor o, wala mo mǝlaŋ win o, sai mo ɓaŋko we pǝsãhm mawor ma joŋ syii tǝ vaŋno ge wo pa joŋzahsyiŋ ne zahfah tal mbǝro ma taini, mor ka joŋ syiŋ suŋwii ne ko, ne matǝvaawandala vaŋno, wala matǝvaakol vaŋno, mor ka joŋ syiŋ ma ɓaŋ faɓe' ga lal ne ko. 7 Pa joŋzahsyiŋ ga woo fan joŋ syiŋ ah mawin ah mo nyi ɓo ge pel Dǝɓlii ne ko, a ga joŋ syiŋ ne mor ka vãh ɓǝ 'nahm ah ga lal ne ko, so ka mawin ah mo yea pǝsãhe. Madǝwin daŋ mo byaŋ ɓe, mo joŋko fahfal byaŋ ah naiko.
8 Mawin ah mo lwaa we pǝsãhm ya ɓe, ka mo wooko matǝvaawandala ge ne gwa, wala matǝvaakol gwa, vaŋno mor ka joŋ syiŋ suŋwii, maki ah laŋ mor ka joŋ syiŋ ma ɓaŋ faɓe' ga lal ne ko, so pa joŋzahsyiŋ ga joŋ syiŋ ne mor ka vãh ɓǝ 'nahm ah ga lal ne ko, ka mawin ah mo yea pǝsãhe.
© Bible Moundang © Alliance Biblique du Tchad, 1996.
