Zah'nan ma ɓaŋ faɓe' ga lalle
1 Dǝɓlii faa ɓǝ nyi Mosus fahfal wul wee Aron matǝ gwa, mai Dǝɓlii mo ik ra pǝ wul ne cok mo ɓaŋra wii mai mo ka tǝgbana mai Dǝɓlii mo 'yah ya ge pel ah ne ko. 2 Faa: Mo faa nyi naa ma ɓo Aron, mo danko ge pǝ cok matǝdaŋdaŋ tǝɗe' nǝn godel mai mo cee ɓo ɓe, sai mo danko ge gŋ ne cok mai cok ah mo cuu ɓo to, mor me ga cuu suu ɓe gŋ pǝzyil swãh bam mai mo tǝ sunduku gbanzahe. Mo syeeko mor ɓǝ ah ya ɓe, a ga wuu. 3 Ne cok mo tǝ ga danko ga pǝ cok matǝdaŋdaŋ tǝɗe' ɓe, sai kǝpel ah mo gbǝko ŋgǝǝri joŋ syiŋ ma mor ɓaŋ faɓe' ga lal ne ɗǝ, ne kǝbǝr ma mor joŋ syiŋ suŋwii daŋ.
4 So Dǝɓlii faa: Kǝpel ka Aron ɓah ka dan ga pǝ cok matǝdaŋdaŋ tǝɗe' ya ba, sai mo erko bii ɗǝ, so ka mo ɓaako fan yeɓ pa joŋzahsyiŋrĩ: mbǝro mafãi, ne oosãhe, ne zyim baŋ haŋne, ne zyim zahtǝtǝlli.
5 Za Israel mo nyira kǝdai nyi Aron gwa, mor ka joŋ syiŋ ma ɓaŋ faɓe' ga lal ne ko, ne kǝbǝr gŋ vaŋno, ka joŋ syiŋ suŋwii ne ko. 6 Mo joŋko syiŋ ma mor ɓaŋ faɓe' suu ah ga lal ne ko, ne mǝ za yaŋ ahe. 7 So ka mo wooko kǝdai matǝ gwa ge pel Dǝɓlii zahfah tal mbǝro ma tai ne ko. 8 Ka mo iko cahcah tǝtǝl ɓǝǝ ne tǝsal gwa, vaŋno mor Dǝɓlii, vaŋno laŋ mor Azazel . 9 So ka Aron mo ɓaŋko kǝdai mai cahcah mo re ɓo mor Dǝɓlii, ka mo joŋko syiŋ ma mor ɓaŋ faɓe' ga lal ne ko. 10 Amma kǝdai mai cahcah mo re ɓo mor Azazel, ka mo ɓaŋko ge pel Dǝɓlii ne ko ne nahnǝnni, fahfal ah ka mo so soɓra kal ge wo Azazel kǝsyicokki, mor ka ɓaŋ faɓe' za ga lalle.
11 Ne cok Aron mo tǝ joŋ syiŋ ma ɓaŋ faɓe' suu ah ga lal ne mǝ za yaŋ ah ne ŋgǝǝri ah ɓe, 12 sai mo wooko yakwii mai mo tǝ cok joŋ syiŋ baa ɓǝr fan tǝǝ ɓǝrdi, so ka mo fõoko ɓǝrdi pǝzyil kpuu baa jol gwa daŋ, ka mo danko ge pǝ cok matǝdaŋdaŋ tǝɗe' ne ko. 13 Ka mo ge rǝkko ɓǝrdi ah ge tǝ wii pel Dǝɓlii gŋ ŋhaako, mor ka suŋwii ah mo rii cok rwah faɓe' mai mo tǝ sunduku gbanzahe. Mo joŋko nai ɓe, ka ga wǝ ya. 14 So mo saŋko syim ŋgǝǝri ne tǝwee jol biŋ, ka mo meeko ge pel cok rwah faɓe', fahfal ah ka mo so meeko ge pel sunduku gbanzah zahlǝŋ rǝŋ.
15 Ka fahfal ah mo so ŋgoŋko kǝdai ma mor joŋ syiŋ ma ɓaŋ faɓe' ga lalle, ka mo ɓaŋko syim ah dan ge pǝ cok matǝdaŋdaŋ tǝɗe' ne ko, ka mo meeko ge tǝ cok rwah faɓe', so ka mo meeko ge pel sunduku gbanzah zahlǝŋ rǝŋ, tǝgbana mai mo joŋko ne syim ŋgǝǝri ta. 16 Ne fahlii mai a ga vãh cok matǝdaŋdaŋ tǝɗe' ne ko gin jol 'nahm za Israel ne faɓe' ɓǝǝra. Mo joŋko wo tal mbǝro ma tai naiko, mor a no kǝsyil ɓǝǝ pǝ cok 'nahm ɓǝǝra. 17 Aron mo danko ge pǝ tal mbǝro ma tai pǝ cok matǝdaŋdaŋ tǝɗe' ka joŋ syiŋ ma ɓaŋ faɓe' ga lal ɓe, ne cok ah dǝɓ ki mo dan ge gŋ ka, ŋhaa mo pǝ̃ǝko ne sõo. Fahfal ah mo joŋko yeɓ ɓaŋ faɓe' suu ah ga lal ne mǝ za yaŋ ah tǝkine za Israel daŋ ɓe, 18 sai ka mo so pǝ̃ǝko mo geko wo cok joŋ syiŋrĩ, ka mo joŋko syiŋ suŋwii ka vãh cok joŋ syiŋ ne ko. Mo ɓaŋko syim ŋgǝǝri ahe, ne syim kǝdai ah biŋ, ka mo tahko ge wo ciŋ mai mo pǝ cok joŋ syiŋrĩ. 19 So ka mo meeko syim ah ne tǝwee jol ge wo cok joŋ syiŋ zahlǝŋ rǝŋ. Ne fahlii mai a ga vãh cok joŋ syiŋ ne ko gin jol faɓe' za Israel ka mo yea pǝsãhe.
Kǝdai ma ɓaŋ faɓe' ga cok ne ko
20 Ne cok Aron mo vǝr joŋ syiŋ ma vãh cok matǝdaŋdaŋ tǝɗe' ne ko, ne tǝcoŋ tal mbǝro ma taini, tǝkine cok joŋ syiŋ daŋ ɓe, sai mo gbǝko kǝdai mai mo ne cee ge pel Dǝɓlii ne ko, kǝdai ah ye mai mo mor Azazel. 21 Ka mo rǝkko jol ah gwa daŋ ge tǝtǝl ahe, so ka mo keeko ɓǝ faɓe' mai za Israel mo joŋni, ne ɓǝɓe' ɓǝǝ tǝkine ɓǝ ŋwookyaŋ ɓǝǝ daŋ ge tǝtǝl ahe. Ka mo so faako nyi dǝɓ ki mo nĩiko kal ge cok ne ko. 22 Kǝdai ah a ga woo faɓe' ɓǝǝ daŋ kal ga kǝsyicok mai dǝfuu mo ka gŋ ya ne ko.
23 So ka Aron mo danko ge pǝ tal mbǝro ma taini, mo wǝǝko mbǝro yeɓ pa joŋzahsyiŋ mo ɓaako kǝpel ka ɓah dan ga pǝ cok matǝdaŋdaŋ tǝɗe' ya ba ge lalle, ka mo so soɓko gŋ ŋhooko. 24 Ka mo so erko bii pǝ cok mai Dǝɓlii mo nǝǝ ɓo, mo so wooko mbǝro mǝ ah ɓaare. Fahfal ah ka mo pǝ̃ǝko, mo ge joŋko syiŋ suŋwii ka ɓaŋ faɓe' ah ga lal ne ko, ne mǝ za pãa daŋ. 25 Mo tǝǝko syiŋ tǝ cok joŋ syiŋ ne nǝm faɓal mai mo ŋgoŋra mor joŋ syiŋ ma ɓaŋ faɓe' ga lal ne ko. 26 Dǝɓ mai mo nĩiko kǝdai ah kal ge cok ne ko, mo vãhko fan wo suu ah ra, ka mo so erko bii, ka mo geko zahjul ba. 27 Ŋgǝǝri ne kǝdai mai mo ŋgomra ka joŋ syiŋ ma ɓaŋ faɓe' ga lal ne ko, mai mo ɓaŋra syim ɓǝǝ dan ge pǝ cok matǝdaŋdaŋ tǝɗe' ne ko ka ɓaŋ faɓe' ga lalle, sai mo woora ge fahfal zahjul lal ne ko, ka mo syakra wak ah ne nǝǝ ah tǝkine fan ɓǝr ah daŋ ne wii gŋ. 28 Dǝɓ mai mo ge syak fan ah ge lal ne wii, ka mo vãhko fan wo suu ah ra, mo so erko bii, ka mo geko zahjul ba.
Ɓǝ lai tǝ ɓǝ zah'nan ma ɓaŋ faɓe' ga lalle
29 Ɓǝ lai ah ra mai ka we syee mor ah ga lii ga lii a naiko: Pǝ zah'nan jemma ma pǝzyil fĩi patǝ rǝŋ ah awe za Israel ne za gwǝǝ mai mo kaara ɓo kǝsyil ɓii daŋ we syẽe fanne. We joŋ koo yeɓ mafẽene ah com ah ka. 30 Ne zah'nan ah pa joŋzahsyiŋ ah mo ɓaŋko faɓe' ɓii ge lalle, mo vãhko we jol ɓǝɓe' mai daŋ we joŋ ɓo wo Dǝɓlii. 31 Zah'nan ah zah'nan 'yak mai mo nǝǝ ɓo mor Dǝɓlii yo, we syẽe fan ne ko, we joŋ yeɓ ne ka. We gbǝ ɓǝ lai mai ga lii ga lii. 32 Pa joŋzahsyiŋ malii, mai mo syeera nǝm ge tǝtǝl ah mo ɓaŋra ko kan ɓo tǝ yeɓ pa joŋzahsyiŋ ne pǝ cok pamme, ako ye mo vãh we, mo ɓaŋko faɓe' ɓii ge lalle. Sai mo ɓaako mbǝro pa joŋzahsyiŋrĩ, 33 so ka mo vãhko cok matǝdaŋdaŋ tǝɗe', ne tǝcoŋ tal mbǝro ma taini, cok joŋ syiŋrĩ, za joŋzahsyiŋrĩ, tǝkine za Israel mapãa ah daŋ. 34 We syee mor ɓǝ lai mai ga lii ga lii. Pǝzyil syii daŋ pa joŋzahsyiŋ mo vãhko faɓe' za Israel daŋ ge lal gŋ ɓal vaŋno.
Mosus joŋ tǝgbana mai Dǝɓlii mo faa.
© Bible Moundang © Alliance Biblique du Tchad, 1996.
