Ɓǝ lai tǝ ɓǝ syimmi
1 Dǝɓlii faa nyi Mosus: 2 Mo faa nyi Aron ne wee ah tǝkine za Israel daŋ, ɓǝ lai mai ka we syee mor ah a naiko: 3-4 Dǝɓ Israel vaŋno mo ŋgoŋ ŋgǝǝri, wala mo pǝsãhm yo, mo sǝgwii yo, ma joŋ syiŋ wo Dǝɓlii pǝ cok maki ah hai, mo ge zahfah tal mbǝro ma tai ne ya ɓe, ka joŋ faɓe' ma nen pǝkoŋ wul ɓo. Mor dǝɓ ah ciŋ pa in wul ɓo, mo yeako kǝsyil za Masǝŋ kao. 5 Ɓǝ lai mai mo kan ɓo sye, mor ka za Israel mo ɓaŋra faɓal mai moo ŋgoŋra lal hai ge pel Dǝɓlii ne ka. Amma zǝzǝ̃ǝko, sai mo gera nyi pa joŋzahsyiŋ ne zahfah tal mbǝro ma taini, ka mo joŋra syiŋ ma nyi jam gŋ. 6 Pa joŋzahsyiŋ mo meeko syim ah ge wo cok joŋ syiŋ mai mo zahfah tal mbǝro. Ka mo so tǝǝko nǝm ah tǝ wii, Dǝɓlii laa fuŋ ah pǝ'nyahre. 7 Za Israel mo joŋra ɓǝɓe' wo Dǝɓlii ne ŋgom faɓal ɓǝǝ lal hai joŋ syiŋ ne wo coksyiŋ sǝgwii ka. Za Israel mo syeera mor ɓǝ lai mai ga lii ga lii.
8 Dǝɓ Israel makẽne daŋ, wala mo dǝɓ gwǝǝ ye mo ge kaa ɓo kǝsyil ɓǝǝra, mo 'yah nyi fan ma joŋ syiŋ suŋwii, wala mo fan joŋ syiŋ maki ah cam yo, 9 amma mo ge zahfah tal mbǝro ma tai ne ka joŋ syiŋ ne wo Dǝɓlii ya ɓe, ka dǝɓ ah mo yea kǝsyil za Masǝŋ kao.
10 Mo dǝɓ Israel o, wala mo dǝɓ gwǝǝ ye mo ge kaa ɓo kǝsyil za Israel, mo re nǝǝ ne syim ah mo pǝzyil ah daŋ ɓe, Dǝɓlii ga joŋ ɓǝ ne ki, a ga muŋ tǝtǝl dǝɓ ah gin kǝsyil zan ahe. 11 Mor fan mai Masǝŋ mo joŋ ɓo ne suu daŋ, cee ah a pǝzyil syim ahe. Mor ah Dǝɓlii nyi fahlii ka we ŋgoŋ fan tǝ cok joŋ syiŋrĩ, ka syim ah mo ɗuu, ka ɓaŋ faɓe' za ga lalle. Mor cee a pǝzyil syimmi, mor ah syim a gak ɓaŋ faɓe' ga lalle. 12 Mor ah Dǝɓlii faa nyi za Israel ne za gwǝǝ mai mo kaara ɓo kǝsyil ɓǝǝ daŋ, ka mo rera nǝǝ ne syim ah daŋ ka.
13 Mo dǝɓ Israel o, wala mo dǝɓ gwǝǝ ye mo ge kaa ɓo kǝsyil za Israel, mo gbǝ nǝǝ cok mai za moo renne, wala mo juu yo, sai mo ŋgoŋko kyaŋ ah ka syim ah mo ɗuu ge lalle, ka mo so kpǝ̃ǝko sǝr ge tǝ syim ahe. 14 Mor fan mai Masǝŋ mo joŋ ɓo ne suu daŋ, cee ah a pǝzyil syim ahe. Mor ah Dǝɓlii faa nyi za Israel, ka mo rera nǝǝ ne syim ah daŋ ka. Dǝɓ mo kal re syim ɓe, ka dǝɓ ah mo yea kǝsyil za Masǝŋ kao.
15 Mo dǝɓ Israel o, wala mo dǝɓ gwǝǝ mai mo ge kaa ɓo kǝsyil za Israel o, mo re nǝǝ cok mai mo wǝ suu ahe, wala fafyãh cok ye mo gbǝ, sai dǝɓ ah mo vãhko fan wo suu ah ra, mo so erko bii. So dǝɓ ah ga yea ne 'nahm pel Dǝɓlii, ŋhaa a dai lilli. 16 Mo joŋko nai ya ɓe, a ga lwaa kiita.
© Bible Moundang © Alliance Biblique du Tchad, 1996.
