Ɓǝ lai tǝ ɓǝ swan ne ŋwǝǝre
1 Dǝɓlii faa nyi Mosus: 2 Mo faa nyi za Israel sye: Ame ye Dǝɓlii Masǝŋ ɓiiri. 3 We syee mor zah fan joŋ za sǝr Egiɓ mai we yea kaa ɓo gŋ ka, we syee mor ɓǝ zah fan joŋ za sǝr Kanaan mai me zaŋ we ge ɓo gŋ zǝzǝ̃ǝ ne ka ta. 4 We syee mor ɓǝ lai ɓe, we joŋ fan mai me faa ɓǝ ah ɓo nyi we. Ame ye Dǝɓlii Masǝŋ ɓiiri. 5 We syee mor ɓǝ cuu ɓe ra, tǝkine ɓǝ lai ɓe mai me nyi ɓo nyi we. We tǝ joŋ nai ɓe, we ga yea ne cee. Ame ye Dǝɓlii.
6 Koo zune mo swǝko ne zahzum ah mawin ka. Ame ye Dǝɓlii. 7 Mo joŋ ɓǝɓe' wo pa ɓo ka swan ne ma ɓo ka, mo joŋ ɓǝ ren swãa mai wo ma ɓo ka. 8 Mo joŋ ɓǝɓe' wo pa ɓo ka swan ne mawin ah maki ah ka. 9 Mo swǝ ne naa ma ɓo mawin wala naa pa ɓo mawin ka, koo ma byaŋ piicel pa ɓo, wala mai mo byaŋ ɓo ka gŋ ya daŋ. 10 Mo swǝ ne mǝlaŋ we ɓo mawor wala mǝlaŋ mǝlaŋ ɓo ka. Mo joŋ nai ɓe, ka mo cuu swãa suu ɓo ɓo. 11 Mo swǝ ne mǝlaŋ naa pa ɓo mawor ka, mor naa pa ɓo mawin o. 12 Mo swǝ ne ma ɓo laŋ ma zahzum pa ɓo ka, mor naa mah pa ɓo yo. 13 Mo swǝ ne ma ɓo laŋ mai mo ye naa mah ma ɓo ka ta, mor naa mah ma ɓo yo. 14 Mo joŋ ɓǝɓe' wo naa pah pa ɓo ka swan ne mawin ah ka, mo kwo mawin ah na naa pah pa ɓo mawinni. 15 Mo swǝ ne gor ɓo mawin na ɓo ka. 16 Mo swǝ ne mawin naa pa ɓo ka. 17 Mo swǝ ne mǝlaŋ ɓǝr mawin mai mo kan ɓo ka, koo we ɓǝr mǝlaŋ ah laŋ, mo swǝ ne ki ka. Maki zahzum ɓo yo, mor ah a pǝrenswãare. 18 Mo ɓaŋ naa mah wala naa pah mawin ɓo mawin kan ne cok mai mawin ɓo mo no sǝŋ ka.
19 Mo swǝ ne madǝwin ne cok mai mo saŋko ɓo ka, mor a ne 'nahmme. 20 Mo swǝ ne mawin dǝɓ ki ka, mor ɓǝ ah a ga joŋ mo yea ne 'nahm pel Dǝɓlii. 21 Mo ɓaŋ we ɓo maki ah vaŋno ka joŋ syiŋ suŋwii ne wo masǝŋ Molok ka, mor ɓǝ ah a ga ɓeɓ tǝɗii Masǝŋ. Ame ye Dǝɓlii. 22 Dǝwor mo swǝ ne dǝwor ki ta ka, Masǝŋ syiŋ ɓǝ ah ɓo syiŋ. 23 Dǝworre, wala madǝwinni, mo swǝ ne faɓal ka, ɓǝ ah ga joŋ mo yea ne 'nahm pel Dǝɓlii, ɓǝ maɓe' ah yo.
24 We ɓeɓ suu ɓii ne joŋ yeɓ marai ka, mor za mai mo yea kaara ɓo pǝ sǝr mai kǝpelle ɓeɓra suu ɓǝǝ ne joŋ fan ma morãiko, mor ah Dǝɓlii tǝ ga nĩi ra ka we ge kaa pǝ sǝr ahe. 25 Yeɓ ɓǝǝ joŋ sǝr ah ɓeɓ ɓo pel Dǝɓlii, mor ah Dǝɓlii ŋgoŋ kiita ɓo tǝ sǝr ahe, so sǝr ah zwǝǝ za ma kaara gŋ ge lalle. 26-27 Joŋra faɓe' marai daŋ, ɓeɓra sǝr ah ne ɓǝɓe' ɓǝǝra. Amma awe, we syee mor ɓǝ lai Dǝɓlii ne ɓǝ cuu ah ra. Mo dǝɓ Israel o, wala mo dǝɓ gwǝǝ ye mo ge kaa ɓo kǝsyil ɓiiri, mo joŋko fan ma morãi ka. 28 Nai ɓe, sǝr ah ka ga zwǝǝ we ga lal tǝgbana mai mo zwǝǝ za mai mo yea kaara ɓo gŋ kǝpel a. 29 Koo zune mo joŋ fan ma morãi ɓe, pah ah ka ga yea kǝsyil za Masǝŋ yao.
30 So Dǝɓlii faa: We syee mor ɓǝ cuu ɓe mai me nyi ɓo nyi we. We syee mor zah fan joŋ za mai mo yea kaara ɓo pǝ sǝr ah kǝpel ɓii ka. We ɓeɓ suu ɓii ne joŋ fan ma morãi ka. Ame ye Dǝɓlii Masǝŋ ɓiiri.
© Bible Moundang © Alliance Biblique du Tchad, 1996.
