Daŋdaŋ za joŋzahsyiŋrĩ
1 Dǝɓlii faa nyi Mosus: Mo faa nyi za joŋzahsyiŋ ma morsǝ̃ǝ Aron sye: Pa joŋzahsyiŋ mo ɓeɓko suu ah ne ɓǝ wul dǝɓ mai mo wǝ ɓo kǝsyil zahzum ah ka, 2 sai ka mah ah ye ne pah ahe, wala wel ah maworre, mǝlaŋ ah mawinni, wala naa mah ah maworre, 3 wala ka naa mah ah mawin mai mo ɓah kan wor a ba yo. 4 Mo ɓeɓko suu ah ne ɓǝ wul zahzum mawin ah ka .
5 Pa joŋzahsyiŋ mo sõoko tǝtǝl ah ka, mo saŋko pyaŋ ah soɓ pǝcõo ka, mo ɗeako suu ah ne nyah mor ka cuu zye tǝ yeyee wul ka ta. 6 Sai mo yeako daŋdaŋ, mo ɓeɓko tǝɗii ɓe ka, mor a joŋ syiŋ ma farel wo ɓe. Mor ah sai mo yeako daŋdaŋ. 7 Pa joŋzahsyiŋ mo kanko mawin mai mo yea ciŋ matǝkoi ɓo ka, wala ne mawin mai mo tǝ za wǝǝ ɓe, ne mawin mai mo syel ki ɓo ne dǝɓ ki ka, mor ako ye dǝɓ mai me nǝǝ ɓo. 8 Sai za daŋ mo kwora pa joŋzahsyiŋ daŋdaŋ, mor a joŋ syiŋ farel wo ɓe. Ame Dǝɓlii me daŋdaŋ, me joŋ za ɓe ɓo daŋdaŋ ta. 9 Mǝlaŋ pa joŋzahsyiŋ mo ciŋ matǝkoi ɓe, ka cuu swãa pah ah ɓo, mo syakra ko ne wii.
10 Pa joŋzahsyiŋ malii mai mo syeera nǝm ge tǝtǝl ahe, mo ɓoora mbǝro za ma joŋzahsyiŋ nyi nyi, mo ɓaŋra kan pa joŋzahsyiŋ malii ɓo ne ko, mo soɓko rĩi tǝtǝl ah tǝkol ka, mo ŋgǝ̃ǝko mbǝro wo suu ah ka cuu zye tǝ yeyee wul ka ta. 11-12 Mor nǝǝ kan ɓo mor yeɓ ɓe, mo ɓeɓko suu ah tǝkine tal mbǝro ɓe ne dan ga yaŋ mai wul mo wǝ ɓo gŋ ka, koo mo pam ne mam ye laŋ, mo geko gŋ ka.
13 Sai mo kanko woi mai mo ɓah tan za wǝǝ ya ba. 14 Mo kanko mawin wul ka, mo kanko mawin mai mo syel ki ɓo ne dǝɓ ki, wala mawin mai mo yea ciŋ matǝkoi ɓo ka. Sai mo ɓaŋko woi mai mo tǝ za wǝǝ ya ba mo kǝsyil zahzum ah kanne. 15 Mo ka nai ya ɓe, morsǝ̃ǝ ah ga yea ne 'nahm pel ɓe. Ame ye Dǝɓlii, me ye nǝǝ ko kan pa joŋzahsyiŋ malii ɓo ne ko.
16 Dǝɓlii faa nyi Mosus: 17 Mo faa nyi Aron sye: Koo zune mo kǝsyil morsǝ̃ǝ ɓo, mo ne ɓeɓ wo suu ah ɓe, mo geko pel ɓe ne fan nyi ma farel ka. Ɓǝ lai mai a mor zahŋhǝǝtǝ̃ǝ ɓii ma pel daŋ ga lii ga lii. 18 Dǝɓ mai mo ne ɓeɓ wo suu mo geko pel ɓe ne fan nyi ma farel ka: rǝ̃ǝ, lemme, dǝɓ mai võo ah mo ŋgǝ̃ǝ ɓo, wala dǝɓ mai fan suu ah mo pee ki ɓo, 19 wala dǝɓ mai ɓal ah wala jol ah mo hao ɓo, 20 wala dǝɓ mai mo ne golwǝǝre, wala dǝɓ macõo tǝlat ahe, wala dǝɓ mai nahnǝn ah mo kaa fan ɓo, dǝɓ mai tǝgbiŋ mo gbǝ ɓo, ne dǝɓ mai mo syẽer o daŋ. 21 Dǝɓ morsǝ̃ǝ Aron mo ne ɓeɓ wol ɓe, mo geko pel ɓe ne fan nyi ma farel ka. 22 Dǝɓ ma morãi a gak re fan nyi ma farel mai mo nyira ɓo me daga pǝzyil fan nyi ma farel mai mo daŋdaŋ, ne mai mo daŋdaŋ pǝlli. 23 Amma mo geko wo cok ma cee ah mai mo ɓǝr yaŋ ɓe gwari ka, wala wo cok joŋ syiŋ gwari ka, mor a ne ɓeɓ wo suu, mo ɓeɓko fan matǝdaŋdaŋ rai ka. Mor ame Dǝɓlii me ye joŋ fan ah ra ɓo daŋdaŋ.
24 Mosus faa ɓǝ ah nyi Aron, ne wee Aron, ne za Israel daŋ.
© Bible Moundang © Alliance Biblique du Tchad, 1996.
