Fĩi camcam
1 Dǝɓlii faa nyi Mosus: 2 Mo faa nyi za Israel sye: Zah'nan joŋ fĩi mai za Israel moo ga taira ka juupel ne a naiko: 3 Zah'nan yea we joŋ yeɓ ɓii ne ko, amma zah'nan rǝŋ ah zah'nan 'yak yo. Ne zah'nan ah we joŋ yeɓ ne ka, amma we tai juupel ne ko. Zah'nan com 'yak mǝ Dǝɓlii yo, koo we kaa ɓo kẽne daŋ. 4 We lai ɓǝ joŋ fĩi ah ra ne cok ah mo cuu ɓo.
Fĩi Paska ne tǝwaa ma bai fan mbǝ̃ǝre
(KeeZ 28:16-25)5 Ne zah'nan jemma tǝtǝl nai pǝzyil fĩi patǝ vaŋno ahe, com mo dan ɓe, we tǝŋ joŋ fĩi Paska ne ka yii Dǝɓlii. 6 So ne zah'nan jemma tǝtǝl dappe ah ɓe, we tǝŋ joŋ fĩi ma ne tǝwaa ma bai fan mbǝ̃ǝ ne ko. Zah'nan rǝŋ we re tǝwaa ma joŋ bai fan mbǝ̃ǝ ne to. 7 Ne zah'nan patǝ vaŋno ah we tai juupel ne ko, we joŋ yeɓ ne ka. 8 Pǝ zah'nan tǝ rǝŋ daŋ, we joŋ syiŋ camcam wo Dǝɓlii. Ne zah'nan patǝ rǝŋ ah we tai ne ka juupelle, we joŋ yeɓ ne ka.
9 So Dǝɓlii faa nyi Mosus: 10 Mo faa nyi za Israel sye: Ne cok we ge dan pǝ sǝr mai Dǝɓlii mo tǝ ga nyi nyi we ɓe, we tǝ cen sor ɓii ɓe, ka we ɓaŋ baŋ sor ma kǝpel ah ge nyi pa joŋzahsyiŋ ne ko, 11 ka mo ɓaŋko yim pel Dǝɓlii, ka Dǝɓlii mo nyiŋ we. Pa joŋzahsyiŋ mo joŋko fan ah nai ne zah'nan ma fahfal zah'nan com 'yakke. 12 Com mai we ge ne sor mai we bam ɓo, so we joŋ syiŋ suŋwii ne we pǝsãhm mawor ah ma joŋ syii tǝ vaŋno mai suu ah mo ka pǝɓe' ya. 13 So we joŋ syiŋ ma farel ne sum mai mo suu ɓo ne nǝmmi, tahsah gwa. Dǝɓlii laa fuŋ fan nyi ah pǝ'nyahre. So we ge ne fan joŋ syiŋ ma sǝsǝǝ ta: bii lee kpuu vin nǝn liitǝr vaŋno ne raita. 14 We re tǝwaa sor ɓii mafuu ah ka, koo sor ah ma rǝraa wala mai we kǝǝ gǝr ɓo gǝr ka, ŋhaa sai ka we ɓaŋ fakpãhpǝǝ ɓii ma kǝpel ah ge nyi Masǝŋ ne ɓe. We syee mor ɓǝ lai mai ne morsǝ̃ǝ ɓii ma fahfal ɓii daŋ ga lii ga lii.
Fĩi ma joŋ tǝ ɓǝ tai fagwahlle
(KeeZ 28:26-31)15 Tǝ'nan ah fahfal zah'nan com 'yak mai we ge pel Dǝɓlii ne sor mai we bam ɓo, sai we kee com 'yak rǝŋ. 16 Pǝ zah'nan patǝ jemma dappe ah fahfal com 'yak matǝ rǝŋ ko, we so joŋ syiŋ mafuu ah wo Dǝɓlii ne fakpãhpǝǝ ɓiiri. 17 Zahtǝgǝǝɓel daŋ mo gera ne tǝwaa zahtǝfah gwa gwa, ka mo ge nyira nyi Dǝɓlii. Zahtǝfah wol ah vaŋno daŋ, sum ma zoo ah mo yea tahsah gwa gwa, so mo yea ne fan mbǝ̃ǝre, ka we joŋ syiŋ tai fagwahl ɓii ma joŋ kǝpel ah wo Dǝɓlii ne ko. 18 So za tai mo gera ne wee pǝsǝ̃ǝ ma joŋ syii tǝ vaŋno vaŋno ah rǝŋ, ne ŋgǝǝri gŋ vaŋno, ne sǝgwii gwa, fan rai daŋ suu ɓǝǝ mo yea pǝɓea ka, ka we joŋ syiŋ suŋwii pel Dǝɓlii ne ko, ne syiŋ ma joŋ ne sorre, tǝkine ma joŋ ne bii lee kpuu vin. Dǝɓlii laa fuŋ fan nyi ah ra pǝ'nyahre. 19 Sai we joŋ syiŋ ma ɓaŋ faɓe' ga lal ne kǝdai vaŋno, so ne wee pǝsǝ̃ǝ mawǝǝ ma joŋ syii tǝ vaŋno vaŋno ah gwa, mor ka joŋ syiŋ ma nyi jam ne ko. 20 Pa joŋzahsyiŋ mo ɓaŋko tǝwaa ah ne wee pǝsǝ̃ǝ matǝ gwa, ka mo joŋko syiŋ ne wo Dǝɓlii mor ka nyi nyi za joŋzahsyiŋ renne. Fan nyi ah ra a daŋdaŋ. 21 Ne zah'nan ah we joŋ yeɓ ne ka, amma we tai juupel ne ko. Morsǝ̃ǝ ɓii daŋ mo syeera mor ɓǝ lai mai ga lii ga lii, koo mo kaara ɓo kẽne daŋ.
22 Ne cok we tǝ joŋ fakpãhpǝǝ 'wah ɓii ne gwahl ɓe, we cee sor ma kah 'wah ah ra ka, we pii soo ge fyak mai mo soɓ ɓo gŋ ka ta, we soɓ mor za masyak ah ne za gwǝǝre. Dǝɓlii ako ye Masǝŋ ɓiiri.
Fĩi ma joŋ ne syii mafuu
(KeeZ 29:1-6)23-24 Ne zah'nan vaŋno ma pǝzyil fĩi patǝ rǝŋ ahe, zah'nan 'yak yo, ne cok kokõorĩi mo ul ɓe, ka we tai juupel ne ko. 25 We joŋ yeɓ com ah ka, we nyi fan nyi ɓii ma farel nyi Dǝɓlii.
Zah'nan ma ɓaŋ faɓe' ga lalle
(KeeZ 29:7-11)26-27 Ne fĩi patǝ rǝŋ, ne zah'nan jemma ah zah'nan ma ɓaŋ faɓe' za ga lal o. Ne zah'nan ah we re farel ka, we tai juupel ne ko, so we joŋ syiŋ ma farel pel Dǝɓlii. 28 We joŋ yeɓ ne zah'nan ah ka, mor zah'nan ah zah'nan ma ɓaŋ faɓe' ga lal o. 29 Koo zune mo re farel ne zah'nan ah ɓe, ka ga yea kǝsyil za Masǝŋ ya. 30 Koo zune mo kal joŋ yeɓ com ah ɓe, Dǝɓlii ne suu ah a ga i ko pǝ wulli. 31 Ɓǝ lai mai morsǝ̃ǝ ɓii daŋ mo syeera mor ahe, koo mo kaara ɓo kẽne daŋ. 32 Zah'nan ah zah'nan 'yak malii ah yo, tǝŋ daga ne zah'nan doraŋ ah ne lilli, ŋhaa dai zah'nan jemma ah ne lil ahe, ne cok ah we re fan ki ge zah ka.
Fĩi Julli
(KeeZ 29:12-40)33-34 Ne zah'nan jemma tǝtǝl dappe, pǝzyil fĩi patǝ rǝŋ, we tǝŋ joŋ fĩi jul ne ko, we joŋ fĩi ah ŋhaa dai zah'nan rǝŋ. 35 Ne zah'nan joŋ fĩi ah patǝ vaŋno ahe, we tai juupel ne ko, we joŋ yeɓ ne ka. 36 Pǝ zah'nan tǝ rǝŋ daŋ we joŋ syiŋ ne fan nyi ɓii ma farel wo Dǝɓlii. Ne zah'nan patǝ nama ah we tai juupel ne faɗa, we so joŋ syiŋ fan nyi ma farelle. Zah'nan ah zah'nan juupel o, we joŋ yeɓ ne ka.
37 Ɓǝ lai joŋ fĩi mai Dǝɓlii mo faa ɓǝ ah ɓo nyi we ka we gbǝ ɓǝ ah yo. We tai juupel ne ko, we joŋ syiŋ ma farelle, ne syiŋ suŋwii, ne syiŋ ma joŋ ne sorre, ne syiŋ ma ŋgoŋ fan joŋ ne ko, tǝkine syiŋ ma joŋ ne bii lee kpuu vin zah'nan vaŋno vaŋno daŋ. 38 Fĩi marai ka cak com 'yak mai wee joŋ ɓaa ya, so fan nyi marai ka cak fan nyi ɓii mai wee nyi ɓaa, ne fan nyi ma baa ɓǝ gbanzah ɓii tǝkine fan nyi mai wee nyi ne zahzyil wo Dǝɓlii ya.
39 Ne zah'nan jemma tǝtǝl dappe, pǝzyil fĩi patǝ rǝŋ ahe, ne cok we joŋ fagwahl ɓii ɓe, ka we joŋ fĩi zah'nan rǝŋ. Ne zah'nan patǝ vaŋno ah zah'nan 'yak yo. 40 Ne zah'nan ah we woo lee syẽm kpuu ɓii masãh ah ra, we so cee goo mǝnǝǝ ne goo kpuu manyeeki ahe, ka we woo joŋ fĩi ne ka yii Dǝɓlii Masǝŋ ɓiiri. 41 We joŋ fĩi ah zah'nan rǝŋ. Morsǝ̃ǝ ɓii ma fahfal ɓii daŋ mo syeera mor ɓǝ lai mai ga lii ga lii. 42 Pǝ zah'nan tǝ rǝŋ ko, za Israel daŋ mo kaara pǝ julli. 43 Nai ɓe, morsǝ̃ǝ ɓii ma fahfal a ga tǝra, ne cok mai Dǝɓlii mo zaŋ za Israel pǝ̃ǝ gin sǝr Egiɓ ne ko, soɓ ra kaa pǝ julli. Ako ye Dǝɓlii Masǝŋ ɓiiri.
44 Mosus cuu ɓǝ lai mai ka za Israel mo syeera mor ah ka joŋ fĩi yii Dǝɓlii ne naiko.
© Bible Moundang © Alliance Biblique du Tchad, 1996.
