1 So Dǝɓlii faa nyi Mosus: 2 Dǝɓ mo joŋ faɓe' wo Dǝɓlii ne fahlii mai mo zyiiko ka nyi fan mai zum ah dǝɓ Israel mo kan ɓo wol ah nyi ko ya, wala fan mai mo kiŋko ɓo ne nyinni, wala mai mo nyiŋko ɓo jol ah ne swahe, 3 wala mo lwaa fan mai mo muŋ ɓo jol dǝɓɓi, mo so gwah ber tǝ ɓǝ ah ne haa zah faa, zye lwaa ɗǝ ya, 4-5 dǝɓ mo joŋ faɓe' ne fahlii ma morãi ɓe, sai mo sooko soo tǝ ɓǝ fan mai daŋ mo lwaako ɓo ne vǝrvǝrri. Com mai ɓǝɓe' ah mo joo ge lalle, sai mo jinko fan ah daŋ nyi pah ahe, ka mo so sooko soo ge gŋ nǝn jemma gwa ma pǝzyil temere. 6 Mo gbǝko pǝsãhm wala sǝgwii matam ah mai suu ah mo ka pǝɓe' ya, ge wo pa joŋzahsyiŋ ne ko, ka joŋ syiŋ ma soo tǝ faɓe' ah ne ko, lak lee gwii ah mo yea nǝn lak mai mo cuura ɓo. 7 Ka pa joŋzahsyiŋ mo joŋko syiŋ ne mor faɓe' dǝɓ ahe, so faɓe' dǝɓ ah ga rwah ga lalle.
Syiŋ suŋwii
8 Dǝɓlii faa nyi Mosus: 9 Mo faa nyi Aron ne wee ah sye: Ɓǝ lai ma mor joŋ syiŋ suŋwii a naiko: Sai fan ma joŋ syiŋ suŋwii mo swǝ tǝ cok joŋ syiŋ ŋhaa cee zah'nanne, so wii mai mo tǝ cok joŋ syiŋ laŋ, mo yea gŋ nooko, wii ah mo rum ka. 10 So pa joŋzahsyiŋ mo ɓooko mbǝro pǝfãi, mo saako oosãh pǝfãi ta, so ka mo gbǝǝko sãhwii joŋ syiŋ mai mo tǝ cok joŋ syiŋrĩ, ka mo wooko rǝk kah cok joŋ syiŋrĩ. 11 So ka mo wǝǝko mbǝro wo suu ah ge lalle, mo so ɓaako maki ahe, ka mo so wooko sãhwii ah ge fahfal zahjul lal ne pǝ cok mai mo nǝǝra ɓo. 12 Wii mai mo tǝ cok joŋ syiŋ mo yea gŋ nooko, wii ah mo rum ka. Zah'nan mo cee ɓe, pa joŋzahsyiŋ mo rǝkko zahwii ge tǝ wii ahe, mo so zyeɓko fan ma joŋ syiŋ suŋwii ge tǝl ahe, ka mo tǝǝko nǝm fan ma joŋ syiŋ ma nyi jam tǝl ah ta. 13 Wii mo yea ne syen tǝ cok joŋ syiŋ cẽecẽe, mo rum kpee ka.
Fan nyi ma farelle
14 Ɓǝ lai tǝ ɓǝ fan nyi ma farel a naiko: Pa joŋzahsyiŋ ma morsǝ̃ǝ Aron mo ɓaŋko fan nyi ma farel ge wo Dǝɓlii ne pel cok joŋ syiŋrĩ. 15 So ka mo fõoko sum ma suuki ne nǝm baa jolle, tǝkine ɓǝrdi daŋ, ka mo tǝǝko syiŋ ne tǝ cok joŋ syiŋrĩ, ka cuu, fan ah daŋ nyi ɓo mor Dǝɓlii. Dǝɓlii laa fuŋ fan nyi ah pǝ'nyahre. 16 Ka za ma joŋzahsyiŋ mo rera tǝcoŋ ahe, mo joŋra paŋgasso ma bai fan mbǝ̃ǝ ne ko, ka mo rera pǝ cok mai Dǝɓlii mo nǝǝ ɓo zahpiicel tal mbǝro ma taini. 17 Mo joŋra farel ah ne fan mbǝ̃ǝ ka. Dǝɓlii nyi zah faren ma ɓǝǝ ɓo nyi ra pǝzyil fan nyi ma farel mai moo nyira nyi ko. Fan ah nǝǝ ɓo mor Dǝɓlii, a tǝgbana fan joŋ syiŋ ma mor ɓaŋ faɓe' ga lalle, ne ma joŋ syiŋ ma soo tǝ faɓe'. 18 Ɓǝ ah ɓǝ lai ye mor zahŋhǝǝtǝ̃ǝ ɓii ma pel daŋ. Koo zune mo pǝwor mor morsǝ̃ǝ Aron daŋ mo reko fan ahe, zah faren ma ɓii pǝzyil fan mai moo nyira nyi Dǝɓlii yo. Koo mo zune yo, wala mo fẽene yo, mo juu farel mai moo nyira nyi Dǝɓlii ɓe, ka ɓǝ no.
19 Dǝɓlii nyi ɓǝ lai marai nyi Mosus, 20 mor ka kan pa joŋzahsyiŋ ma morsǝ̃ǝ Aron tǝ yeɓ ahe, faa: Com mai mo kanra ko tǝ yeɓ ahe, sai mo geko nyi Dǝɓlii ne fan nyini, sum mo yea tahsah vaŋno, mo geko ne raita ah ne zah'nanne, mo geko ne raita ah maki ne lilli. Ɓǝ sum ah mo yea tǝki vaŋno ne ma nyi mor farel zah'nan daŋ. 21 Sum ah mo suuki ne nǝmmi, ka mo kǝǝko tǝ wii pǝ tahsah, ka mo so jakko pǝnyeere, so ka mo tǝǝko tǝ wii. Dǝɓlii laa fuŋ ah pǝ'nyahre. 22 Pǝ zahŋhǝǝtǝ̃ǝ ma pel moo ga ge daŋ, dǝɓ morsǝ̃ǝ Aron mo tǝ ga joŋ yeɓ pa ma joŋzahsyiŋ daŋ, sai mo joŋko syiŋ mai ɗǝ. Fan nyi ah a mor ka joŋ syiŋ suŋwii ne wo Dǝɓlii. 23 Fan nyi ma farel mǝ pa joŋzahsyiŋ mo nyi, mo rera ka, sai mo syakra nǝǝ ah ne wii.
Syiŋ ma mor ɓaŋ faɓe' ga lalle
24 Dǝɓlii faa nyi Mosus: 25 Mo cuu ɓǝ lai ma mor joŋ syiŋ ma ɓaŋ faɓe' ga lal nyi Aron ne wee ahe. Sai mo ŋgoŋra faɓal ma mor joŋ syiŋ ma ɓaŋ faɓe' ga lal kah cok joŋ syiŋ nǝ fahkǝsǝŋ ahe, pǝ cok mai moo ŋgomra faɓal ma joŋ syiŋ suŋwii gŋ. Fan joŋ syiŋ ah nǝǝ ɓo mor Dǝɓlii. 26 Pa joŋzahsyiŋ mai mo joŋ syiŋ ne faɓal ahe, mo reko nǝǝ ah pǝ cok mai Dǝɓlii mo nǝǝ ɓo zahpiicel tal mbǝro ma taini. 27 Koo mo zune yo, wala mo fẽene yo, mo juu nǝǝ ah ɓe, ka ɓǝ no. Syim nǝǝ ah mo ge wo mbǝro dǝɓ biŋ ɓe, sai dǝɓ ah mo vãhko ge lal pǝ cok mai Dǝɓlii mo nǝǝ ɓo. 28 Pa joŋzahsyiŋ mo kǝǝko nǝǝ faɓal ah pǝ cii vuu ɓe, sai ka mo so dahko cii ah ge lalle, amma mo kǝǝko pǝ cii vãm ɓe, sai mo fõoko cii ah fõo, ka mo so vãhko ge lal ne bii. 29 Za wǝǝ ma morsǝ̃ǝ Aron daŋ a gak rera nǝǝ ahe, nǝǝ ah a mor Dǝɓlii. 30 Amma pa ma joŋzahsyiŋ mo ɓaŋ syim fan ah ge pǝ tal mbǝro ma tai ne mor ka ɓaŋ faɓe' ga lal ɓe, ka mo rera nǝǝ fan ah ka, sai mo syakra nǝǝ ah ne wii.
© Bible Moundang © Alliance Biblique du Tchad, 1996.
