1 Pa 'yah ɓe Teofilus: Za pǝlli kyeɓra ka ŋwǝǝ ɓǝ mai mo joŋ ɓo kǝsyil mana. 2 So za ki keera ɓǝ fan mai mo kwora daga tǝtǝŋ ah nyi ru, cuura ɓǝ ah nyi ru ne suu ɓǝǝra. 3 Mor maiko, ame laŋ me kwo ɓǝ ah pǝsãhe, me kyeɓ mor ɓǝ ah njaŋ ka me ŋwǝǝ nyi mo dǝɓ masãhe. 4 Me joŋ nai mor ka mo so tǝ mor ɓǝ ah mai mo fee ɓo ge pel pǝsãhe.
Ɓǝ byaŋ Yohana ma joŋ baptisma
5 Ne cok mai Herodes mo kaa goŋ sǝr Yudea ɓo, pa joŋzahsyiŋ ki no a kǝsyil kul za mǝ pa joŋzahsyiŋ Abia, a ɗii ne Zakarias. Mawin ah morsǝ̃ǝ Aron pa joŋzahsyiŋ malii yo a ɗii ne Elizabet. 6 Ara ye za tǝ njaŋ pel Masǝŋ gwa daŋ, a syeera mor ɓǝ lai Dǝɓlii tǝkine fahlii ah ra daŋ pǝsãhe. 7 Amma ara ka ne wel a, mor Elizabet masoor o, so ara gwa daŋ tamra ɓe.
8 Comki Zakarias tǝ joŋ yeɓ zahsyiŋ pel Masǝŋ, mor cok yeɓ ah moo joŋko ne kul za mǝ ah kiŋ ge dai ɓe. 9 Tǝgbana zahsyiŋ za joŋzahsyiŋ moo joŋra, a peara kǝsyii nǝǝ dǝɓ ah ne ko ka ga tǝǝ ɓǝrdi pel Dǝɓlii pǝ yaŋ Masǝŋ. 10 Ne cok Zakarias mo tǝǝ ɓǝrdi, za Masǝŋ daŋ cwãara ɓo lal tǝ juura pel tǝgbana mai moo joŋra. 11 Angelos Dǝblii ge cuu suu ah nyi Zakarias, uu ɓo jokǝsãh cok tǝǝ ɓǝrdi. 12 Ne cok Zakarias mo kwo ko, zahzyil nǝǝ ko, gal re ko pǝlli. 13 Amma angelos faa nyi ko: Zakarias, mo ɗuu gal ka, mor Masǝŋ laa juupel ɓo ɓe, mawin ɓo Elizabet ga byaŋ we wor nyi mo ka mo ɗii ko ne Yohana. 14 Mo ga laa pǝ'nyahre, suu ga 'nyah mo tǝ ɓǝ ahe, za pǝlli ga laa pǝ'nyah ne ɓǝ byaŋ ahe. 15 A ga yea pǝyǝk pel Masǝŋ, ka ga zwǝ bii lee kpuu vin wala fazwan ma kiŋ tǝtǝl laŋ ya, Tǝ'yak Matǝdaŋdaŋ ga baa pǝ zahzyil ah daga byaŋ ah sǝ. 16 A ga fer za Israel pǝlli ka gin syeera mor Dǝɓlii Masǝŋ ɓǝǝra. 17 Ako laŋ, a ga syeeko pel Masǝŋ ne tǝ'yak Elias tǝkine swah ah daŋ ka zyeɓ kǝsyil pah wee ne wee ɓǝǝra, ka fer za maɓea ka mo foora ɓǝ mai za sãh ye moo fooni, ka mo so zyeɓko za nyi Dǝɓlii.
18 Amma Zakarias zyii zah angelos faa: Me so ga tǝ ɓǝ mai goŋga yo ɗǝne? Mor me tam ɓe, mawin ɓe laŋ joŋ syii pǝpãa ɓe ta. 19 So angelos zyii faa nyi ko: Ame ye Gabriel, me uu ɓo pel Masǝŋ ka joŋ yeɓ ahe, ako ye pee me ka faa ɓǝ ma'nyah mai nyi mo. 20 Mo laa ɓe ne? Mo ga lǝrri, mo ga ciŋ dǝɓ bai gak faa ɓǝ ŋhaa dai cok fan ah mo ga joŋ, mor mo nyiŋ ɓǝ faa ɓe mai me faa nyi mo fan ah mo tǝ ga joŋ ga cok ah ryakryak ya.
21 Ne cok ah za ma lal kŋ tǝ byakra Zakarias gin pǝ yaŋ Masǝŋ, so kaara ɓo tǝ ɓǝ ah gǝriŋ, mor kaa ɓo gŋ pǝlli. 22 Amma ne cok mo pǝ̃ǝ ge wo ɓǝǝ lal o, ka gak faa ɓǝ ya, za tǝ ɓǝ ah gin gŋ a kwo fan ma pǝ yaŋ Masǝŋ ɓe. A haɓ ra ne jolle, so kaa na lǝrri.
23 Ne cok zah'nan joŋ yeɓ Zakarias mo vǝr o, jin kal fah yaŋ ahe. 24 Fahfal zah'nan ah nje, mawin ah Elizabet gbǝ ɓilli. Amma Elizabet muŋ suu ah dai fĩi dappe faa: 25 Eẽ ɗǝ, Dǝɓlii joŋ ɓǝ 'nyah mai wo ɓe ɗii ne! Wǝǝ ɓǝ ren swãa wo ɓe tǝgǝǝ za ge lal ɓe.
Ɓǝ byaŋ Yesu
26 Ne patǝ yea fĩi ah Masǝŋ pee angelos Gabriel ge yaŋ maki ah pǝ sǝr Galile, a ɗii ne Nazaret, 27 ge wo woi maki ah mai dǝɓ morsǝ̃ǝ David ma ɗii ne Yuseɓ mo tǝ kyeɓɓe, a ɗii mǝlaŋ ah ne Maria. 28 Angelos ge wol ah faa nyi ko: Me haozah wo ɓo, Masǝŋ ẽe mo ɓe, Dǝɓlii no ne mo. 29 Ne cok Maria mo laa ɓǝ faa ah zahzyil nǝǝ ko tǝ ɓǝ ahe, so tǝŋ fii suu ahe: Haozah wol mai 'yah cuu ɓǝ fẽene? 30 Amma angelos faa nyi ko: Mo ɗuu gal ka Maria, mor Masǝŋ joŋ gboŋgboŋ ɓo wo ɓo. 31 Mo ga gbǝ ɓil byaŋ we worre, ka mo ɗii ko ne Yesu. 32 A ga yea pǝyǝkki, a ga ɗiira ko ne We Masǝŋ Mayǝkki. Dǝɓlii Masǝŋ ga kan goŋ ne ki tǝgbana mo joŋ ne pamlii David. 33 A ga kaa goŋ tǝ za Israel ga lii ga lii, goŋ ah ka vǝr kpee ya.
34 So Maria faa nyi angelos: Ɓǝ mai gak joŋ ɗǝne? Mor me ye woi ba. 35 Angelos so zyii faa nyi ko: Tǝ'yak Matǝdaŋdaŋ ga ge tǝ ɓo, swah Masǝŋ Mayǝk ga gbǝ cee tǝ ɓo, wel ah mo ga byaŋ a ga ɗiira ko ne Dǝɓ Matǝdaŋdaŋ tǝkine We Masǝŋ. 36 Mo ẽe ma ɓo laŋ Elizabet ɗǝ, makǝcwak yo, za faa ka byaŋ yao, amma a ne ɓil we wor ɓǝr fĩi yea zǝzǝ̃ǝko. 37 Mor fan ma gaɓ Masǝŋ kǝka.
38 So Maria faa: Ame ye mabyak Dǝɓlii, fan ah mo joŋ wo ɓe tǝgbana ɓǝ faa ɓo. Angelos so ur gin wol ah kalle.
Maria ge haozah wo Elizabet
39 Fahfal ah gwari sǝ Maria hǝǝ ur ɓaŋ fahlii kal ge yaŋ maki ah no pǝzyil waare, a pǝ sǝr Yudea. 40 Kal ge yaŋ Zakarias ge haozah wo Elizabet gŋ. 41 Ne cok mai Elizabet mo laa haozah wol Maria, we ɓǝr ah ur gai suu. So Tǝ'yak Matǝdaŋdaŋ ge baa pǝ zahzyil Elizabet. 42 So Elizabet ɓyaŋ ɓǝ ge sǝŋ faa: Masǝŋ ẽe mo kal ŋwǝǝ ɓo daŋ, we mai mo tǝ ga byaŋ, ẽe Masǝŋ ga yea tǝl ahe. 43 Ame ko ye zu ka mah Dǝɓlii ɓe mo ge wo ɓe kpee ko ne? 44 Mo ẽe ɗǝ, ne cok mo tǝ haozah wo ɓe, we ɓǝr ɓe laa pǝ'nyahre, ur ne gai suu ne pel sǝ. 45 Ɓǝ ah pǝ'nyah wo ɓo, mor mo nyiŋ ɓǝ mai Dǝɓlii mo faa nyi mo a ga joŋ.
Lǝŋ Maria
46 Maria faa:
Zahzyil ɓe yii Dǝɓlii.
47 So mazwãhsuu ɓe laa pǝ'nyah ne pa ǝ̃ǝ ɓe Masǝŋ.
48 Mor kwo syak mabyak ah mo tǝ cuu ko ɓe,
Daga tǝ'nah tǝkine pel daŋ za ga faara kal ɓe ɓǝ 'nyah joŋ wo ɓe ɓe.
49 Mor Masǝŋ Mayǝk joŋ yeɓ ma'man ah ɓo wo ɓe,
Tǝɗii ah a daŋdaŋ.
50 A kwan syak tǝ za mai moo ɗuura ko pǝ zahŋhǝǝtǝ̃ǝ daŋ.
51 Cuu swah ah ne yeɓ jol ahe,
Myah za ma yii suu ne ɓǝ foo zahzyil ɓǝǝ ge lalle.
52 Waa za goŋ tǝ fakal ɓǝǝ ge sǝŋ,
So yii za ma wonra suu.
53 Kǝ̃ǝ za ma ne koŋ ne fan 'nyahre,
Soɓ za ma ne joŋ kalra ne jol kolle.
54 Ɗuu gor ge tǝ za Israel za yeɓ ah ra,
Mor yaŋ ɓǝ gbanzah ah mai mo gbǝ ɓo ne ra kǝpel a.
55 Tǝgbana mo foo ɓǝ kwan syak ah mo kwo ɓo tǝ Abraham tǝkine morsǝ̃ǝ ah daŋ ga lii.
56 Maria kaa wo Elizabet tǝgbana fĩi sai so jin kal fah yaŋ ahe.
Byaŋ Yohana ma joŋ baptisma
57 Cok byaŋ Elizabet ge dai, byaŋ we pǝworre. 58 Jǝk Elizabet tǝkine zahzum ah daŋ mo laara ɓǝ gboŋgboŋ malii mai Dǝɓlii mo joŋ ɓo wol ahe, so tai laara pǝ'nyah ne ki daŋ.
59 Ne cok wel ah mo joŋ tǝgǝǝ com 'yak vaŋno ge ka daara kan nyi ko, a 'yah ka ɗiira ko ne tǝɗii pah ah Zakarias. 60 Amma mah ah faa: Ka nai ya, a ɗii ne Yohana. 61 So faara nyi ko: Zahzum ɓo ma ɗii ne tǝɗii mai kǝka. 62 So fiira pah ah ne cuu fan nyi ko ne jolle, a 'yah ka za mo ɗii wel ah ɗǝne? 63 Zakarias fii ɗerewol ŋwǝǝ fan gŋ: Ɗii ah ye Yohana. So kaara tǝ ɓǝ ah gǝriŋ. 64 Ne pel sǝ Zakarias kal ne faa ɓǝ, tǝŋ yii Masǝŋ ne kyaŋ lii. 65 Gal re jǝk ah ra daŋ tǝ ɓǝ ahe, faara ɓǝ ah pǝzyil waa sǝr Yudea ne lii ah daŋ. 66 Za mai mo laara ɓǝ mai daŋ a foora ɓǝ ah tǝkine fifii: We mai ga joŋ we fẽene? Swah Dǝɓlii no ne ki.
Lǝŋ Zakarias
67 Tǝ'yak Matǝdaŋdaŋ baa zahzyil Zakarias pah Yohana cyõ, tǝŋ faa ɓǝ fan mai moo ga joŋ, faa:
68 Osoko Dǝɓlii Masǝŋ Israel,
Mor ɓaŋ syiŋ zan ahe, so wǝǝ ra.
69 Mor ge ne pa ǝ̃ǝ maswah ah mor man kǝsyil za morsǝ̃ǝ dǝɓ yeɓ ah goŋ David.
70 Tǝgbana mo faa ɓǝ ah ne zah profetoen ah ra matǝdaŋdaŋ ɓaaɓe,
71 Faa ɓo ka gin wǝǝ na jol za ma ruu sal ne na,
Tǝkine jol za mai mo syiŋra na ɓo daŋ,
72 Ka cuu kwan syak ah mai mo kwo tǝ pa man lii ra,
Ka so foo ɓǝ gbanzah ah matǝdaŋdaŋ.
73 Mor Masǝŋ haa zah nyi pa man lii Abraham,
74 Ka wǝǝ na gin jol za syiŋ mana, ka nyi fahlii nyi na ka joŋ yeɓ mor ah bai galle,
75 Mor ka na yea daŋdaŋ tǝkine njaŋ pel ah pǝ zah'nan kal man wo sǝr daŋ.
76 So amo welle, a ga ɗiira mo ne profeto Masǝŋ Mayǝkki,
Mor mo ye ga syee pel Dǝɓlii ka zyeɓ fahlii ahe,
77 Ka cuu fahlii mai zan ah moo ga ǝ̃ǝ ne ko,
Tǝkine fahlii rwah faɓe' ɓǝǝ ga lalle.
78 Mor Masǝŋ man a kwan syak pǝlli tǝkine joŋ ɓǝ sãhe,
A ga sǝǝ cokfãi tǝ man tǝgbana cokfãi com moo zooni,
79 Ka sǝǝ cokfãi tǝ za mai mo kaara ɓo pǝ cokfuu tǝkine ɗuu gal wulli,
Ka na syee tǝ fahlii matǝ jam.
80 Wel ah joŋ dǝɓlii ne zahzyil swahe, kaa kǝsyicokki, ŋhaa dai zah'nan mai mo ge cuu suu ah pel za Israel taŋraŋ.
© Bible Moundang © Alliance Biblique du Tchad, 1996.
