Toobii wala wulli
1 Ne cok ah ka za ki no gŋ, zan ah ge keera ɓǝ mai Pilatus mo ik Galilien manyeeki ah pǝ wul ne cok mo tǝ joŋra syiŋ wo Masǝŋ nyi Yesu. 2 Yesu zyii faa nyi ra: We lǝŋ Galilien mai mo ik ra pǝ wul ye za ɓea kal Galilien manyeeki ah ko ɓǝ mai joŋ wo ɓǝǝ mor ah ne? 3 Ɓǝ ah ka nai ya. Me tǝ faa nyi we, we zyii toobii tǝ faɓe' ɓii ya ɓe, we daŋ we ga wuk na ra ta. 4 Wala we lǝŋ za matǝ jemma tǝ nama mai korvuu yaŋ Siloa mo lee ik ra pǝ wul kalra za yaŋ Jerusalem daŋ ne ɓǝɓe' ne? 5 Ɓǝ ah ka nai ya. Me tǝ faa nyi we, we zyii toobii ya ɓe, we daŋ we ga wuk na ra ta.
Ɓǝ kikiŋ kpuu wuu ma bai zyii leeni
6 Yesu so faa ɓǝ kikiŋ mai nyi ra: Dǝɓ ki pee kpuu wuu pǝ 'wah ahe, dǝɓ ah a gin kyeɓ lee ahe, amma ka lwaa ya. 7 Dǝɓ ah faa nyi dǝɓ mai moo joŋ yeɓ 'wah ahe: Mo ẽe ɗǝ, syii sai ye nyẽeko me gin kyeɓ lee ahe, me ka lwaa fan ki gŋ ya. Pǝram mo ce ge lal o. Nyiŋ cok ɓo tǝkol mor fẽene? 8 Amma dǝɓ mai moo joŋ yeɓ 'wah ah zyii faa nyi ko: Dǝɓlii, mo soɓ syiiɗah ɗao faɗa, me ga cii kah ah ka me rǝk mǝr fan mor ahe. 9 Dǝɓ mo joŋ nai ɓe, maki a ga lee syii ki, mo lee ya ɓe, ka mo ce ga lal ba.
Yesu laɓ mawin ma ne syem tǝjuŋ ne com 'yakke
10 Comki Yesu tǝ cuu ɓǝ pǝ yaŋ kee ɓǝ Masǝŋ ne com 'yakke. 11 Mawin ki no gŋ ne syemme, kyaŋ ɓo ne syem ah syii jemma tǝ nama, tǝ'yak ɓe' ye gbǝ cel ɓo nyi, ko juŋ ɓo, ka gak uu sǝŋ jaŋjaŋ ya. 12 Ne cok Yesu mo kwo ko, ɗii ko faa: Mawinni, mo ǝ̃ǝ gin zah syem ɓo ɓe. 13 Yesu kan jol ge tǝl ahe, dǝǝ ne pel sǝraŋ sǝ, so kal tǝ joŋ osoko nyi Masǝŋ. 14 Amma swah byak yaŋ kee ɓǝ Masǝŋ ɓaŋ kpãh ne ɓǝ mai Yesu mo laɓ syem ne com 'yakke, so faa nyi zana: Tǝgǝǝ zah'nan yea dǝɓ gak joŋ yeɓ ne ko, we ge laɓ syem suu ɓii pǝ zah'nan ahe, amma we ge ne com 'yak ka. 15 Dǝɓlii zyii faa nyi ko: Awe ye za tǝ vǝrvǝrri, we ka wǝǝ dǝǝ wala korro ɓii ga nyi bii nyi ne com 'yak ya ne? 16 Mawin mai morsǝ̃ǝ Abraham yo, so Satan baŋ ko ɓo syii jemma tǝ nama ah ye nyẽeko, me ka wǝǝ sal baŋ ah ne com 'yak ya mor fẽene? 17 Ɓǝ mai Yesu mo faa nai swãa re za ma syiŋ ko pǝlli, amma kǝlii za pãa daŋ laara pǝ'nyah ne yeɓ mayǝk mai Yesu mo joŋ ɓo daŋ.
Ɓǝ kikiŋ nah foore
(Mt 13:31-32Mk 4:30-32)18 Yesu faa: Goŋ Masǝŋ jur ɓo ne fẽene? Me lii ne fẽe ɗah ne? 19 A tǝgbana nah foo dǝɓ moo ɓaŋ ruu pǝ 'wah ahe, a ciŋ joŋ kpuu ma'man ahe, juu moo so gbah kol tǝ jol ah ra.
Ɓǝ kikiŋ fan mbǝ̃ǝre
(Mt 13:33)20 Yesu so faa: Me so lii Goŋ Masǝŋ ne fẽene? 21 A tǝgbana fan mbǝ̃ǝ mai mawin mo ɓaŋ rǝk ge pǝ sum mai mo lii ɓo tahsah sai, sãa ne ko, ŋhaa ka sum ah daŋ mo urri.
Zahfah manyiŋ
(Mt 7:13-14Mt 21-23)22 Yesu kyãh cuu ɓǝ yaŋ maluu ne tǝluɓ lal daŋ, ka ɓaŋ fahlii ɓo tǝ ga yaŋ Jerusalem. 23 Dǝɓ ki ge fii ko faa: Dǝɓlii, za biŋ ye ga ǝ̃ǝ to ne? Yesu zyii faa nyi ra: 24 We joŋ suu ɓii ne swahe, ka we dan zahfah manyiŋ. Me tǝ faa nyi we, za pǝlli a ga kyeɓra ka danne, amma ka gakra ya.
25 Ne cok pah yaŋ mo ga ur coo zahfahe, we ga uu lalle, so we ga tǝŋ kǝ̃ǝ zahfah faa: Dǝɓlii, mo gbǝr zahfah nyi ru. A ga zyii zah ɓii faa: Me tǝ we ya. 26 We ga so faa nyi ko: Aru re farel tǝkine zwan fan cok vaŋno ne mo, mo cuu ɓǝ Masǝŋ nyi ru tǝ fahlii tǝgǝǝ yaŋ ɓuu ta. 27 A so ga jin faa nyi we: Me tǝ we ya, we zol gin wo ɓe kal pǝɗǝkki, awe ye za ɓeare. 28 Ne cok ah we ga kwo Abraham ne Isak ne Yakuɓ tǝkine profetoen kaara ɓo pǝ Goŋ Masǝŋ, amma ma ɓii a ga rǝkra we lalle, we ga yeyee tǝkine soŋ syelle. 29 Za ki ga gee fah morcomzah'nanne ne fah morcomlilli ne fahsǝŋ tǝkine fah morkǝsǝŋ ge, a ga kaara zah taabǝl vaŋno ne Abraham pǝ Goŋ Masǝŋ. 30 Amma zǝzǝ̃ǝ za mai mo pelle a ga ciŋ za fahfalle, za mai mo fahfal zǝzǝ̃ǝko a ga ciŋra za pelle.
Yesu yeyee tǝ yaŋ Jerusalem
(Mt 23:37-39)31 Ne cok moo, Farisien manyeeki gera wo Yesu, faara nyi ko: Mo zol gin nyee kal ge cok ki, mor Herodes tǝ 'yah ka in mo pǝ wulli. 32 Amma Yesu zyii faa nyi ra: We ge faa nyi cõi ŋhoo sye: me ga nĩi coksyiŋ tǝ za tǝkine laɓ syem za tǝ'nahko tǝkine tǝ'nan daŋ, zah'nan sai ah me ga vǝr yeɓ ɓe daŋ ne ko. 33 So me ga ɓaŋ fahlii tǝ'nahko ne tǝ'nanne tǝkine tǝ'nanŋhaa ka ga Jerusalem, mor ka profeto Masǝŋ mo wǝ lal bai wun Jerusalem ka.
34 Jerusalem, Jerusalem, amo ik profetoen pǝ wulli, mo ɓaa za mai Masǝŋ moo pee ra gin wo ɓo ne tǝsalle. Ɓal kǝɗǝne ɓe me kyeɓ ka tai za ɓo gin wo ɓe tǝgbana ma kãh moo tai wee ah ga mor yee ahe, amma we zyii ya. 35 We ẽe, yaŋ ɓii ga ciŋ fǝl kolle. We ka ga fǝ̃ǝ kwo me faɗa yao, ŋhaa ga dai zah'nan mai we ga faa: Masǝŋ mo ẽe dǝɓ mai mo tǝ gin pǝ tǝɗii Dǝɓlii.
© Bible Moundang © Alliance Biblique du Tchad, 1996.
