Yesu laɓ dǝɓ syemme
1 Comki Yesu ge yaŋ dǝɓlii Farisien maki ah ne com 'yak ka ren farel gŋ. Za mai ara mo cok ah a ẽera ko. 2 Dǝɓ mai suu ah mo fuu ɓo ge uu pel Yesu. 3 So Yesu fii za cuu ɓǝ lai ne Farisien faa: Ɓǝ lai man nyi fahlii ka dǝɓ mo laɓ syem ne com 'yak ne? Wala fahlii ah kǝka ne? 4 Amma zyiira ɓǝ ki zah ah ya. Yesu so ɓaŋ dǝɓ syemme, laɓ ko, so soɓ fahlii nyi kalle. 5 So Yesu faa nyi ra: Dǝɓ ki kǝsyil ɓii wel ah koo dǝǝ ah mo lee ge pǝ lak bii ne com 'yak ɓe mo ka hǝǝ ɓaŋ ga lal a, a no ne? 6 Gak zyiira ɓǝ ki zah ah ya.
Ɗii tǝ farel tǝkine kyeɓ cok kal masãhe
7 Yesu kwo za mai mo ɗiira ra ɓo tǝ farel a kyeɓra cok kal masãh ah ka hai gŋ. So faa ɓǝ kikiŋ mai nyi ra: 8 Dǝɓ mo ɗii mo ge cok ren farel ɓaŋ win fuu ɓe, mo kyeɓ cok kal masãh ah kaa gŋ ka, mor mo tǝ ya, maki ɗiira dǝɓ mai mo kal mo ɓo ne yǝk tǝ gin nyee ta. 9 So dǝɓ mai mo ɗii mo mo ge faa nyi mo, mo soɓ cok kal mai nyi dǝɓ maino, mo ge kaa fahfal ŋhaano ɓe, swãa ga re mo no cam. 10 Amma dǝɓ mo ɗii mo ge cok ɓaŋ win fuu ɓe, mo ge kaa fahfalle, so dǝɓ mai mo ɗii mo mo ge faa nyi mo, mo yee ge kaa pǝ cok ma sǝŋ masãh nyẽeno bai, ɓǝ ah mo joŋ nai ɓe, za mai mo kaara cok ren farel ne mo daŋ a ga yiira mo. 11 Mor koo zune moo kyeɓ yǝk ne suu ah daŋ a ga leere, amma dǝɓ mai moo wonsuu ah a ga yiira ko.
12 So Yesu faa nyi dǝɓ mai mo ɗii ko ta: Ne cok mo joŋ farel ka ɗii za ne ko ne lilli koo ne comme, mo ɗii bai ɓo ra koo wee pa ɓo ne zahzum ɓo tǝkine za jǝk ɓo makǝ̃ǝ ne ka. Mor a ɗiira mo ne farel comki ta. Mo joŋ nai ɓe, ka soora mo tǝ fan mai mo nyi nyi ra kŋ ɓe. 13 Amma mo tǝ joŋ fĩi ɓe, mo ɗii za masyakke, ne za matǝ jokri, lemme, tǝkine rǝ̃ǝ. 14 Mo ga laa pǝ'nyahre, mor ka lwaara fan ki ka soo mo ne ya. Masǝŋ ga soo mo ne cok mai za matǝ njaŋ moo ga urra pǝ wulli.
Ɓǝ kikiŋ farel malii
(Mt 22:1-10)15 Dǝɓ ki kǝsyil za mai mo kaara ɓo zah taabǝl mo laa ɓǝ ah naiko, so faa nyi Yesu: A pǝ'nyah wo dǝɓ mai moo ga kaa zah taabǝl ka ren farel pǝ Goŋ Masǝŋ.
16 So Yesu faa nyi ko: Dǝɓ ki no, joŋ farel malii ka ɗii za daŋ tǝl ahe. 17 So ne cok farel ah mo zyeɓ vǝr o, pee dǝɓ yeɓ ah ka faa nyi za mai mo ɗii ra ɓo tǝ farel ahe ka mo gera o, mor farel ah zyeɓ daŋ ɓe. 18 Amma zan ah tǝŋ joŋra vǝrvǝr ne ɓǝ ahe. Dǝɓ ma kǝpel ge faa nyi dǝɓ yeɓ ahe: Me lee 'wah ɓo, me ga ẽere, me pǝǝ mo, mo rõm me tǝ ɓǝ ahe. 19 Patǝ gwa ah ge faa: Me lea dǝǝ pǝǝ ɓo zahsol ki dappe, me ga lim ra, me pǝǝ mo, mo rõm me tǝ ɓǝ ahe. 20 Patǝ sai ah laŋ so faa: Me ɓaŋ mawin ɓo, me ka lwaa cok ga gŋ ya. 21 Dǝɓ yeɓ pii soo ge kee ɓǝ ah daŋ nyi pah yaŋ ahe. Pah yaŋ ɓaŋ kpãh ne ɓǝ ahe, so faa nyi dǝɓ ahe: Mo hǝǝ gwari, mo ge tǝ fahlii ma tǝgǝǝ yaŋ tǝkine cok cõo zana, mo ɗii za syak ne za matǝ jokri, lemme, tǝkine rǝ̃ǝ daŋ ge ne ra. 22 Fahfal ah nje, dǝɓ yeɓ ah ge faa: Mo ẽe ɗǝ dǝɓlii, me joŋ ɓǝ ah tǝgbana mai mo faa daŋ ɓe, so cok kal no soɓ ɓo kpǝ. 23 Dǝɓlii ah so faa nyi ko: Mo ge tǝ fahlii ma syee ne ɓal tǝkine fahlii pǝǝ daŋ, mo ɗii za gŋ ne swahe ka mo gera, ka dǝfuu mo baa yaŋ ɓe kǝrkǝrri. 24 Amma me tǝ faa nyi we, za mai me ɗii ra ɓe mo so zyii gera ya daŋ, koo dǝɓ vaŋno kǝsyil ɓǝǝ ka ga re farel ɓe ya.
Syel syee mor Yesu ma ne goŋga ahe
(Mt 10:37-38)25 Za pǝlli tǝ syeera ga ne Yesu. So cii fahfal faa nyi ra: 26 Dǝɓ mo ge wo ɓe ɓe, mo 'yah me kal pam ne mam ne mawin ah ne wee ah ne wee pah ah mawǝǝ ne maŋwǝǝ tǝkine suu ah daŋ ya ɓe, ka gak ciŋ dǝɓ syee mor ɓe ya. 27 Koo zune mo ɓaŋ kpuu ɓaa suu ah ka syee mor ɓe ne ya ɓe, dǝɓ ah ka gak syee mor ɓe ya. 28 Awe tǝ ɓe, dǝɓ mai mo 'yah ka vuu yaŋ mawahe, a kaa kee lak ga tǝ fan lee ah daŋ, a ẽere, ɗah a gak kii yeɓ ah no jol ah daŋ ne? 29 Mo so kal kpii mor ah amma mo gak joŋ yeɓ ah vǝr daŋ ya ɓe, za ma kwan ah daŋ a syakra ko, 30 a faara: Dǝɓ mai tǝŋ mor vuu yaŋ ah ɓe, so gak joŋ yeɓ ah vǝr ao. 31 Goŋ mai mo 'yah ka ga ruu sal ne goŋ maki ah mai mo ur ɓǝ ɓo ne ki ɓe, a kaa ẽe ɓǝ ah kǝpelle, ɗah zan ah mo ujenere jemma vaŋno a gak ga ruu sal ne goŋ ma ur ɓǝ ne ki mo ne za ujenere jemma gwa ne? 32 Mo ka gak ya ɓe, a ga pepee ga wo goŋ maki ah ka a pǝɗǝk ba, ka zyeɓ ɓǝ ne ki ka mo kaara jam. 33 Yesu so faa: Ɓǝ ah laŋ a nai ta, koo dǝɓ vaŋno kǝsyil ɓii ka gak ciŋ dǝɓ syee mor ɓe ya, sai ka soɓ fan ah mo ne daŋ myah ge lal ɓe.
Tǝm mai loŋ ah mo wuu ɓe
(Mt 5:13Mk 9:50)34 Tǝm a pǝsãhe, amma loŋ ah mo wuu ɓe, dǝɓ gak joŋ ne fẽe ka mo yea pǝloŋ faɗa ne? 35 Ka pǝsãh ka dǝɓ mo rǝk ge pǝ 'wah koo ka sõo cok ne laŋ ya, sai dǝɓ myah ga lalle. We ne sok laa ɓǝ no ɓe, we laa pǝsãhe. Pǝsãhm ma muŋni
© Bible Moundang © Alliance Biblique du Tchad, 1996.
