Zah'nan gin Dǝɓlii
1 Dǝɓlii ma ne swah daŋ faa: We ẽe ɗǝ, zah'nan ah no ginni, ne cok ah za ma yii suu ne za ma joŋra faɓe' daŋ a ga syera wii tǝgbana tǝndǝŋni. Ne zah'nan ah wii ga sye ra tǝɗe', fan ki ka ga coŋ wo ɓǝǝr a. 2 Amma awe za ma laa zah ɓe, swah ǝ̃ǝ ɓe a ga zoo tǝ ɓii tǝgbana com moo zooni, swah ah a ga laɓ we, so we ga yea ne tǝtǝl ɓiiri, we ga laa pǝ'nyah ne zwǝǝ ne laa tǝpee tǝgbana wee dǝǝ mai moo pǝ̃ǝra gin ma pǝ jolle. 3 Ne zah'nan mai me tǝ ga joŋ yeɓ ne ko, we ga dah za faɓe' ne ɓal tǝgbana dǝɓ moo dah sǝr ne ɓalle.
4 We foo ɓǝ tǝ ɓǝ cuu dǝɓ yeɓ ɓe Mosus, ɓǝlai ne ɓǝ mai me nyi ɓo nyi ko, mai me cuu nyi ko tǝwaa Sinai mor ka za Israel daŋ mo syeera mor ɓǝ ahe.
5 Amma kǝpel ka zah'nan malii ne magaɓ mǝ Dǝɓlii ge ya ba, me ga pee profeto ɓe Elias ge wo ɓiiri. 6 A ga tai pah wee ra, ne wee ɓǝǝ ga wo ki faɗa.
© Bible Moundang © Alliance Biblique du Tchad, 1996.
