Nehemias ge yaŋ Jerusalem
1 Com maki ah ne fĩi Nisan, ka Artaserses kaa goŋ ɓo syii jemma gwa, ne cok ah me ɓaŋ fazwan ge nyi goŋ ne ko. Goŋ kwo cok nahnǝn ɓe fer cam na moo taa ya. 2 So fii me faa: Cok nahnǝn ɓo fer ɓo tǝ'nah cam nai mor fẽene? Mo ka ne syem laŋ ya, maki zahzyil ye ɓeɓ mo ɓo. So gal re me pǝlli. 3 Me zyii zah ah faa: Masǝŋ mo soɓ tǝ goŋe! Me ka foo ɓǝ ya suu ɗǝne? Yaŋ mai mo ciira pa ɓe lii ra gŋ, zǝzǝ̃ǝ mai so ciŋ gboŋ ɓo, so zahfah ah ra sye wii belbelle. 4 Goŋ fii me faa: Amo 'yah fẽene?
Ame juupel wo Masǝŋ ma coksǝŋ. 5 So me faa nyi goŋe: Goŋ mo zyii ɓe, moo joŋ fan mai me tǝ ga fii mo mor ah no ɓe, mo soɓ me ge sǝr Yuda, ka me ge yaŋ mai mo ciira pa ɓe lii ra ɓo gŋ, ka me ur gboŋ ah ra ge sǝŋ. 6 Goŋ kaa ɓo, mawin ah laŋ kaa ɓo kah ahe, fii me faa: Mo ga nǝn gŋ zah'nan kǝɗǝne? Mo ga pii soo nekẽne? Me so cuu nyi ko, so zyii laŋ ɓǝ fii ɓe me fii ko ta.
7 Me so fii ko faa: Goŋ mo zyii ɓe, mo nyi leetǝr nyi me jol ka me ge nyi govener ra ma pǝ sǝr ma morcomlil kah el Efrat ne ko ka mo faa ɓǝ gŋ mo soɓra me pǝ̃ǝ kal ge sǝr Yuda. 8 Me so fii ko ka mo nyiko leetǝr nyi me, ka me ge wo Asaf pa ma lwaa ɓǝ kpuu goŋ ne ko, ka mo faa nyi mo gbahko jol ɓe ne kpuu ka zyeɓ zahfah yaŋ maswah ah mai mo kah yaŋ Masǝŋ ne ko, so ka joŋ yeɓ ɓaale yaŋ ah ne ko, tǝkine yeɓ yaŋ mai me ga kaa gŋ daŋ. Goŋ nyi fan mai me fii ko mor ah daŋ nyi me, mor Masǝŋ no ne me.
9 Goŋ so pee zaluu sooje ne za pǝr swǝra fahlii ɓe kalle, me ge dai pǝ sǝr ma morcomlil kah el Efrat, me nyi leetǝr goŋ nyi govener ra mo no gŋ. 10 Amma Sanbalat ma yaŋ Bet-Horon ne Tobiija Ammoniyo mo laara dǝɓ ki ge ɓo no nyee ka zyeɓ ɓǝ mor jam za Israel, laara ɓǝ ah pǝ'nyahr a syaŋsyaŋ.
11 Me ge dai yaŋ Jerusalem, so me kaa 'yak zah'nan sai. 12 Me faa ɓǝ mai Masǝŋ mo kan ɓǝ foo ah pǝ zahzyil ɓe ka joŋ nyi dǝɓ vaŋno ya. So me ur ne kǝsyisuŋni, me ɗii za mai mo gera ɓo ne me. Ru ka ne faɓal maki ah ya, sai korro vaŋno mai me yee tǝl ah to. 13 Ka suŋ ye ba, aru pǝ̃ǝ zahfah ma pǝ cok ma tǝforoŋ nǝfah kǝmorcomlilli, ru syee ge nǝfah morkǝsǝŋ zahbii Dragoŋ, ka ga wo zahfah Ma Zahhalle. Ne cok me tǝ syee ganne, me ẽe ɓaale mai mo ryaŋ yaŋ ah ɓo ga ne ko, ne zahfah ah ra mo sye wii ɓo daŋ. 14 So me syee ge nǝfah kǝsǝŋ, me zoo ge zahfah Ma Zahbii, ne zahbii Goŋe. Korro mai me yee ɓo tǝl ah lwaa fahlii ka syee gŋ ya jol mai tǝsal mo gŋ. 15 Me so ɗǝr syee pǝ cok tǝforoŋ ne ɓal ka ẽe ɓaale ganne. Me so jin ɓaŋ fahlii mai me syee gŋ ge, me syee zoo zahfah ma fah kǝ pǝ cok tǝforoŋ kal ge yaŋ.
16 Zaluu mai mo no gŋ tǝra ɓǝ ga ɓe wala fan mai me joŋ ya. So laŋ me faa ɓǝ ah nyi Yahuduen ya, koo wo za joŋzahsyiŋrĩ, koo wo zaluuri, wala zaluu tǝsal ɓǝ, koo ne tǝcoŋ za ki mai mo tǝ ga joŋra yeɓ ah daŋ, me faa ɓǝ ah wo dǝɓ vaŋno ya. 17 So me faa nyi ra: We kwo gaɓ mai na dan ɓo gŋ ɓe ne? Mor yaŋ Jerusalem ne lii ah daŋ ciŋ gboŋ ɓe, zahfah ah ra daŋ ɓeɓ ɓe. We ge na vuu ɓaale yaŋ ahe, na soɓ za mo syẽara na ge lii nai kao. 18 Me so faa ɓǝ mai Masǝŋ mo no ne me, mo gbah jol ɓe, tǝkine ɓǝ mai goŋ mo faa nyi me daŋ nyi ra. So zyiira faa: Na tǝŋ mor vuu ah o. So zyeɓra suu ka joŋ yeɓ ahe.
19 Amma ne cok Sanbalat, Tobiija, ne Arabiyo no a ɗii ne Gesem mo laara ɓǝ fan mai ru tǝ joŋni, syakra ru ne ɓǝ ahe, syẽara ru. Faara: Awe joŋ fẽe sye mai ne? We kyeɓ ka ur ɓǝ ne goŋ ne? 20 Me zyii zah ɓǝǝ faa: Masǝŋ ma coksǝŋ a ga joŋ ru yea ne pejii. Aru ye za yeɓ ahe, ru ga tǝŋ mor vuu ɓaale. Amma awe ka ne faren pǝ ɓǝ yaŋ Jerusalem ya, we ka ne fahlii maa zah pǝ ɓǝ ah koo ka foo ɓǝ ah laŋ ya ta.
© Bible Moundang © Alliance Biblique du Tchad, 1996.
