Kyeɓra ka cak yeɓ Nehemias
1 Ne cok Sanbalat mo laa aru Yahuduen ru tǝ vuu ɓaale, ɓǝ ah sye zahzyil ah ɓaŋ kpãh tǝ ɓuu pǝlli . 2 Faa pel za ma ne ki, ne pel za sal Samaria daŋ: Yahuduen masyak rai a joŋra fẽe sye mai ne? A foora rǝ ga vuu yaŋ Jerusalem ne? A lǝŋra rǝ joŋ syiŋ ɓe, rǝ gak vǝr yeɓ ah pǝ zah'nan vaŋno ne? A gak vuura yaŋ ne tǝsal mai mo ɓaara wii nyi mo lea ge ɓo sǝŋ ciŋ gboŋ ɓo ne?
3 Tobiija Ammoniyo uu ɓo no gŋ kah ahe, faa: A vuura ɓaale mafẽe ah sye mai ne? Koo gyaori laŋ a woo hah ga sǝŋ!
4 Ame Nehemias, me juupel wo Masǝŋ me faa: Masǝŋ, mo laa syẽa ɓǝǝ mo tǝ syẽara ru ɗao, mo soɓ ɓǝ ah pii soo ge tǝtǝl ɓǝǝra. Mo soɓ ra yea na mowoo cok daŋ, mo gbahra ra na byak kal ge sǝr ki ne ko. 5 Mo rõm ɓǝɓe' ɓǝǝ mo joŋra ka, mo rwah faɓe' ɓǝǝ ge lal ka ta, mor tǝǝra ru za mai ru tǝ vuu ɓaale.
6 Aru tǝ ga pel ne yeɓ vuu ɓaale, nǝn pǝlli ya ba, raita ah vuu ɓe, mor za ne 'yah joŋ yeɓ ah pǝlli.
7 Amma ne cok Sanbalat ne Tobiija, ne za Araɓ ne za Ammon, ne za yaŋ Asdod mo laara, yeɓ vuu ɓaale yaŋ Jerusalem tǝ syee ga pel pǝlli, zah'wǝǝ ah ra laŋ rẽa ɓe, ɓaŋra kpãh pǝlli. 8 So taira zyeɓ ɓǝ ka gin ruu sal ne yaŋ Jerusalem, ka ɓǝ ah mo ɓeɓɓe. 9 Amma ru juupel wo Masǝŋ ɓuuru, ru woo za rǝk ka mo byakra ra com ne suŋ daŋ.
10 Za Yuda ara ne lǝŋ maki ah no a ɗǝǝra naiko:
Ana gaɓ ɓe, na ka tǝ gak ɓaŋ faswaa yao,
Hal ah laŋ a pǝ'manne, na ka tǝ gak woo ga lal a,
Na gak vuu ɓaale ah tǝ'nah suu ɗǝne?
11 Za syiŋ man a faara, na ka kwo ra ya, wala tǝ ɓǝ mai mo tǝ joŋra ya, rǝ gin dai kǝsyil man ɓwak rǝ ik na pǝ wulli, yeɓ man a i zahe. 12 Yahuduen mai mo kaara ɓo kǝsyil ɓuuru, pǝ cok com daŋ a gin faara ɓǝ mai za syiŋ ɓuu mo zyeɓra ɓo ka ɓuu nyi ru. 13 So me woo fan salle, kafahe, ne zǝǝ tǝkine saŋne, me wom nyi za uura ne fahfal ɓaale, ne morsǝ̃ǝ camcam, pǝ cok mai yeɓ ah mo ɓah vǝr a ba.
14 So me kwo za tǝ swaara ɓǝ, me so faa nyi ra ne zaluu ɓǝǝ tǝkine zaluu tǝsal ɓǝ: We ɗuu gal za syiŋ man ka. We foo, Dǝɓlii a pǝswahe, a pǝyǝkki, we ruu sal mor wee pa ɓii ne wee ɓii ne ŋwǝǝ ɓii tǝkine yaŋ ɓiiri. 15 Za syiŋ ɓuu laara, aru laa ɓǝ mai mo zyeɓra ɓo ka ɓuu ɓe, Masǝŋ laŋ so joŋ ɓǝ ɓǝǝ ciŋ ɓǝ kolle, so aru daŋ ru kal ge zah yeɓ ɓuu cok vuu ɓaale.
16 Daga cok ahe, raita za mai mo ne me a joŋra yeɓɓe, raita za laŋ a woora zǝǝ ne bal ne saŋ tǝkine mbǝro vãm a uura byak cok ne fahfal za mai mo tǝ vuura ɓaale. So zaluu gbahra jol za Yuda, 17 mai mo tǝ vuura ɓaale ah pǝlli. Za mai moo woora fan yeɓɓe, a joŋra yeɓ ne jol kǝki, a gbanra fan sal laŋ ne jol kǝki. 18 Koo zune daŋ mo tǝ joŋ yeɓ ɓe, a ɗah nǝǝ kafahe gban ne jol kǝki. Dǝɓ ma ul tǝsol sal uu kah ɓe. 19 Ame faa nyi za ne zaluu ɓǝǝ ne zaluu tǝsal ɓǝ daŋ: Yeɓ man nyẽe a pǝ'manne, cok ah ra laŋ ɗǝǝ ki ɓo, so na myah ɓo tǝ ɓaale ah myahe. 20 We laa cii tǝsol sal ɓe, ka we tai ge wo ɓe, Masǝŋ man ga ruu sal mor mana.
21 Zah'nan daŋ ru joŋ yeɓ ah dan suŋ gŋ, ŋhaa ŋwǝǝmǝŋgai sǝŋ pǝ̃ǝre. Raita ɓuu a joŋra yeɓ vuu ɓaale, raita ah laŋ a uura ne zǝǝ jol byak cokki. 22 Ne cok ah me faa nyi za: Awe ne za ma joŋra yeɓ ne we daŋ, we swah yaŋ Jerusalem, ka na byak yaŋ ah ne suŋni, ka na joŋ yeɓ ne zah'nanne. 23 Ame ne za ma ne me, ne za yeɓ ɓe, tǝkine za ma byak ɓe daŋ, ru wǝǝ mbǝro wo suu ɓuu ge lal ne suŋ ya, aru daŋ ru woo fan sal ɓuu jol uu ne ko.
© Bible Moundang © Alliance Biblique du Tchad, 1996.
