Yeɓ za joŋzahsyiŋ ne Lewitien
1 Dǝɓlii faa nyi Aron: We zyak fahlii joŋ yeɓ pǝ cok matǝdaŋdaŋ ɓe, ka ɓǝɓe' ah a tǝtǝl ɓo ne wee ɓo tǝkine Lewitien daŋ. We zyak fahlii ah ma joŋ yeɓ pa joŋzahsyiŋ ɓe, ɓǝɓe' ah a tǝtǝl ɓo tǝkine wee ɓo to. 2 Amma mo ɗii wee pa ɓo ra ma morsǝ̃ǝ ban Lewi, ka mo joŋra yeɓ ne mo tǝkine wee ɓo, mo gbahra jol ɓii ne cok mai we tǝ joŋ yeɓ pǝ tal mbǝro ma taini. 3 Ka mo joŋra yeɓ nyi mo, so ka mo joŋra yeɓ ma ɓǝǝ daŋ pǝ tal mbǝro. Amma mo gera wo fan matǝdaŋdaŋ ah ra pǝ cok matǝdaŋdaŋ wala wo cok joŋ syiŋ gwari ka. So mo kal gera wol ah ra gwari ɓe, ara ne mo daŋ we ga wukki. 4 Mo joŋra yeɓ ne mo, so ka mo joŋra yeɓ ma ɓǝǝ daŋ pǝ tal mbǝro ma taini. Amma dǝɓ maki ah cam mo ge joŋko yeɓ ne we ka. 5 Amo, ne wee ɓo, we ye we joŋ yeɓ pǝ cok matǝdaŋdaŋ, tǝkine tǝ cok joŋ syiŋrĩ, mor ka me ɓaŋ kpãh tǝtǝl za Israel faɗa kao. 6 Ame ye syen wee pa ɓii Lewitien daga kǝsyil za Israel daŋ, ka mo yeara wo ɓii na fan ɗǝǝni. Nǝǝra suu ɓǝǝ ɓo mor ɓe, ka mo joŋra yeɓ ɓǝǝ pǝ tal mbǝro ma taini. 7 Amma amo ne wee ɓo, we joŋ yeɓ pa joŋzahsyiŋ tǝ cok joŋ syiŋrĩ ne pǝ cok matǝdaŋdaŋ, yeɓ mai yeɓ ma ɓii yo, mor me nyi fan ɗǝǝ ma joŋ yeɓ zahsyiŋ ɓo nyi we. Amma dǝɓ maki ah cam mo kal syee ge kah fan matǝdaŋdaŋ ah ra gwari ɓe, a ga ira ko pǝ wulli.
Zah faren za joŋzahsyiŋrĩ
8 Dǝɓlii faa nyi Aron: Ame nyi fan nyi mai daŋ za Israel moo nyira nyi me, mo ka mor joŋ syiŋ suŋwii ya daŋ ɓo nyi mo. Ame nyi ɓo nyi mo ne morsǝ̃ǝ ɓo, zah faren ma ɓii ye ga lii. 9 Kǝlii fan joŋ syiŋ mai mo ka joŋ syiŋ suŋwii tǝ cok joŋ syiŋ ya daŋ ma ɓii yo: farel mai moo nyira, ne fan ma nyi mor joŋ syiŋ ma ɓaŋ faɓe' ga lalle, tǝkine ma wǝǝ faɓe' tǝtǝl ɓii daŋ. Fan mai za Israel moo nyira nyi me daŋ, ma ɓo ye ne wee ɓo. 10 Fan ah ra a daŋdaŋ, sai mo re fan ah ra pǝ cok mai me nǝǝ ɓo to, za wǝǝ ye mo rera fan ah ra to.
11 So me nyi fan nyi manyeeki ah ra mai za Israel moo nyira nyi me ɓo nyi we, amo ne wee ɓo mawǝǝre, ne maŋwǝǝ daŋ ga lii ga lii. Koo zune kǝsyil za yaŋ ɓo mo vãhko suu ah ɓo ɓe, a gak re farel ah ra.
12 Ame nyi fakpãhpǝǝ masãh ah ma joŋ kǝpel mai za Israel moo nyira nyi me syii daŋ ɓo nyi mo: nǝmmi, bii lee kpuu vin, tǝkine sor daŋ. 13 Fan mai daŋ ma ɓo yo. Koo zune kǝsyil za yaŋ ɓo mo vãhko suu ah ɓo ɓe, a gak re farel ah ra.
14 Fan matǝdaŋdaŋ ah ra mai mo jol za Israel mo ma ɓe ye daŋ, ma ɓo yo .
15 Wel ma byaŋ kǝpelle, wala faɓal ma byaŋ kǝpelle, mai moo nyira nyi me daŋ, ma ɓo yo. Amma wel ma byaŋ kǝpelle, sai mo soɓ za mo soora tǝtǝl ah ne lakre, nai ta ne faɓal mai mee kwan ra na a ne 'nahm vaŋno vaŋno daŋ. 16 Mo soɓ za mo soora tǝtǝl we ɓǝǝ daga ka joŋ fĩi ɓo vaŋno to, lak ah a solai dappe na mai soo ah mo kan ɓo. 17 Amma wee dǝǝ ma bem kǝpelle, wee pǝsǝ̃ǝre, ne mǝ sǝgwii daŋ mo soora tǝtǝl ah ne fan ka, ma ɓe yo, a ga joŋra syiŋ ne ko, sai mo ŋgomra syim ah tǝ cok joŋ syiŋrĩ, mo hǝǝra nǝm ah tǝ wii, mor me laa fuŋ ah pǝ'nyahre. 18 Ka nǝǝ ah daŋ ma ɓo yo, tǝgbana fan mai moo gin ŋgoŋra joŋ syiŋ ne ko, pel nǝǝ ah ne ɓal ah ma jokǝsãh ma ɓo ye ta.
19 Fan nyi mai daŋ za Israel moo nyira nyi me, me nyi ɓo nyi mo ne wee ɓo mawǝǝ ne maŋwǝǝ daŋ ga lii. Mai gbanzah ma ga tǝ lii ah ye me gbǝ ɓo ne mo tǝkine morsǝ̃ǝ ɓo.
20 Dǝɓlii faa nyi Aron: Mo ka lwaa zah faren ma ɓo ya, mo ka yea ne sǝr ma syak ɓo kǝsyil za Israel a ta. Fan mai mo ne 'yah ah daŋ, ako ye me Dǝɓlii.
Faren Lewitien
21 Dǝɓlii faa: Patǝ jemma fan mai za Israel moo nyira nyi me daŋ, me nyi ɓo nyi Lewitien. Fan soo ɓǝǝ mor yeɓ mai moo joŋra pǝ tal mbǝro ma tai yo. 22 Za Israel mo gera kah tal mbǝro gwari ka, mo joŋra nai ya ɓe, a ga 'nahmra wul ge tǝ ɓǝǝ ne gwari. 23 Tǝŋ daga zǝzǝ̃ǝko, Lewitien mo joŋra yeɓ pǝ tal mbǝro ma taini. Mo joŋra ɓǝɓe' tǝ yeɓ ɓǝǝ ɓe, ɓǝɓe' ah ga yea tǝtǝl ɓǝǝra. Ɓǝ ah ɓǝ lai ma ga lii ah ye wo morsǝ̃ǝ ɓii ma fahfal ɓii ta. Lewitien ka lwaara zah faren ma ka syak ɓǝǝ kpik kǝsyil za Israel a. 24 Mor ame nyi zah ma ɓǝǝ ɓo nyi ra ne patǝ jemma fan mai za Israel moo nyira nyi me. Mor ah me faa, ka lwaara zah faren ma ka syak ɓǝǝ kpik kǝsyil za Israel a.
Patǝ jemma fanne
25 Dǝɓlii faa nyi Mosus: 26 Mo faa nyi Lewitien sye: Ne cok we nyiŋ patǝ jemma fan mai Dǝɓlii mo nyi ɓo nyi we jol za Israel ɓe, sai we ɓaŋ vaŋno gin pǝzyil jemma fan ah we nyi nyi Dǝɓlii. 27 A ga kee ɓǝ ah tǝtǝl ɓii tǝgbana fan nyi mai za ma pǝǝra 'wah moo nyira sor tǝkine bii lee kpuu vin ta. 28 Ne fahlii mai ka awe laŋ we nyi fan nyi ɓii nyi Dǝɓlii daga pǝzyil patǝ jemma fan mai wee nyiŋ jol za Israel. Ka we so nyi fan nyi ah mai we nyi ɓo nyi Dǝɓlii nyi pa joŋzahsyiŋ Aron. 29 Daga pǝzyil fan mai wee lwaa daŋ, ka we nǝǝ masãh ah gŋ we nyi nyi Dǝɓlii. 30 Ne cok we nyi masãh ah ra nyi Dǝɓlii ɓe, ka we kaa ne tǝcoŋ ah ra tǝgbana za ma pǝǝ 'wah mo nyira fan nyi ɓǝǝ ɓe, moo so kaara ne tǝcoŋ ahe. 31 Ka awe ne za yaŋ ɓii daŋ we re fan ah tǝgbana we 'yahe, mor fan soo ɓii tǝ ɓǝ yeɓ ɓii pǝ tal mbǝro ma tai yo. 32 We hǝǝ nǝǝ masãh ah ra we nyi nyi Dǝɓlii ɓe, we ka joŋ ɓǝɓe' ne ren tǝcoŋ ma jol ɓii ya. Amma we ɓeɓ fan nyi Dǝɓlii ne ren masãh kǝpel bai nyi nyi ko ɓe, we ga wukki.
© Bible Moundang © Alliance Biblique du Tchad, 1996.