Wee Aron
1 Mai morsǝ̃ǝ Aron ne Mosus yo ne cok mai Dǝɓlii mo faa ɓǝ ne Mosus tǝ waa Sinai. 2 Aron ne wee nai: Nadaɓ ye wel ah malii, Abihu, Eleasar, ne Itamar. 3 Syeera nǝm tǝtǝl ɓǝǝra, woora ra rǝk tǝ yeɓ za joŋzahsyiŋrĩ. 4 Amma Nadaɓ ne Abihu wukra pel Dǝɓlii, mor ɓaŋra wii ma lal mai mo ka ne fahlii joŋ yeɓ ah ne ya ge pel ah ne kǝsyicok Sinai. Soɓra wee ya. So Eleasar ne Itamar joŋra yeɓ za joŋzahsyiŋ ne zah'nan pa ɓǝǝ Aron.
Woora Lewitien ka mo joŋra yeɓ za joŋzahsyiŋrĩ
5 Dǝɓlii faa nyi Mosus: 6 Mo ɗii ban Lewi ge, ka mo rǝk ra pel pa joŋzahsyiŋ Aron, mor ka mo joŋra yeɓ nyi ko. 7 Mo joŋra yeɓ pǝ tal mbǝro ma taini, mor za joŋzahsyiŋ ne za pãa daŋ. 8 Mo byakra fan ma joŋ yeɓ pǝ tal mbǝro, so mo joŋra yeɓ gŋ mor za Israel daŋ. 9 Yeɓ ma ɓǝǝ sai mo joŋra yeɓ nyi Aron ne wee ahe. 10 Amma mo rǝk Aron ne wee ah ka mo gbǝra yeɓ za joŋzahsyiŋrĩ, koo zune mo kyeɓ ka dan pǝ yeɓ ma ɓǝǝ ɓe, ka mo ira dǝɓ ah pǝ wulli.
11 Dǝɓlii faa nyi Mosus: 12 Ame nǝǝ Lewitien ɓo kǝsyil za Israel pǝ cok welii ɓǝǝ daŋ, zǝzǝ̃ǝko ciŋra ma ɓe ɓe, 13 mor welii daŋ ma ɓe yo. Ne cok me ik welii sǝr Egiɓ pǝ wulli, me nǝǝ welii za Israel daŋ ɓo mor suu ɓe. Welii dǝfuu ne mǝ faɓal daŋ ma ɓe yo. Ame ye Dǝɓlii.
Ɓǝ kee Lewitien
14 Dǝɓlii faa nyi Mosus kǝsyicok Sinai: 15 Mo kee Lewitien ne za yaŋ ɓǝǝ ne morsǝ̃ǝ ɓǝǝra, mo kee wee wǝǝ mai mo joŋra fĩi ɓo vaŋno, koo ma kal ahe. 16 So Mosus kee pãa ɓǝǝ tǝgbana mai Dǝɓlii mo faa nyi ko. 17-20 Lewi ne wee sai: Gerson, Kehat, ne Merari. Gerson ne wee gwa: Libni ne Syimai. Kehat ne wee nai: Amram, Jitzar, Hebron, ne Uziel. Merari ne wee gwa: Makli ne Musi. Za marai daŋ ara ye pa ɓǝǝ lii ma morsǝ̃ǝ ɓǝǝ mai mo ɗiira ra ɓo ne tǝɗii ɓǝǝra.
21 Morsǝ̃ǝ Gerson a gwa: Libnien ne Syimien. 22 Pãa za wǝǝ mai mo joŋra fĩi ɓo vaŋno, koo ma kal ahe, keera ra, ara 7.500. 23 Morsǝ̃ǝ mai a gbahra jul ɓǝǝ fahfal tal mbǝro ma tai nǝfah kǝmorcomlilli. 24 Eliasaf we Lael ye dǝɓlii ɓǝǝra. 25 Ara ye lwaa ɓǝ tal mbǝro ma tai ɓo, tǝgba faa, tal mbǝro, ne fan ma jǝŋ tǝtǝl ah nǝfah kǝɓǝr nǝfah kǝlalle, tǝkine godel ma zahfah ahe, 26 so ne ɓǝ godel ma ɓǝr yaŋ mo ryaŋ tal mbǝro ɓo ne ko tǝkine cok joŋ syiŋrĩ, ne godel ma zahfah yaŋ ahe, ne suu ah ra, tǝkine ɓǝ yeɓ ah ra daŋ.
27 Morsǝ̃ǝ Kehat ara nai: Amramien, Jitzarien, Hebronien, ne Uzielien. 28 Pãa za wǝǝ mai mo joŋ fĩi ɓo vaŋno, koo ma kal ahe, keera ra, ara 8.600 . 29 Morsǝ̃ǝ mai a gbahra jul ɓǝǝ kah tal mbǝro nǝfah morkǝsǝŋ ahe. 30 Elisafan we Uziel ye dǝɓlii ɓǝǝra. 31 Ma ɓǝǝ ara ye lwaa ɓǝ sunduku gbanzahe, ne taabǝl, pitǝrla ma ne cok gban jolle, cok joŋ syiŋ ra, ne fan yeɓ mai za joŋzahsyiŋ moo joŋra yeɓ ne pǝ cok matǝdaŋdaŋ mai Masǝŋ mo nǝǝ ɓo, ne ɓǝ godel ma zahfah ma ga pǝ cok matǝdaŋdaŋ tǝɗe', tǝkine ɓǝ yeɓ ah daŋ.
32 Dǝɓlii Lewitien ako ye Eleasar we pa joŋzahsyiŋ Aron, ako yee byak za mai moo joŋra yeɓ pǝ cok matǝdaŋdaŋ.
33 Morsǝ̃ǝ Merari a gwa: Maklien ne Musien. 34 Pãa za wǝǝ mai mo joŋra fĩi ɓo vaŋno, koo ma kal ahe, keera ra, ara 6.200. 35 Zuriel we Abihail ye dǝɓlii ɓǝǝra. Morsǝ̃ǝ mai a gbahra jul ɓǝǝ kah tal mbǝro nǝfah kǝsǝŋ ahe. 36 Ma ɓǝǝ laŋ lwaara ɓǝ plaŋ tal mbǝro ɓo, ne ɓǝ kǝndaŋ ah ra, ne wǝǝdǝǝ ah ra, ne ɓal ah ra, ne fan ah ra manyeeki ah tǝkine fan yeɓ ah ra daŋ. 37 So ne wǝǝdǝǝ ma ɓǝr yaŋ ahe, ne ɓal ah ra, ne gaari, tǝkine suu ah ra daŋ.
38 Mosus ne Aron tǝkine wee ah a gbahra jul ɓǝǝ kah tal mbǝro ma tai nǝfah kǝmorcomzah'nan ahe, a byakra ɓǝ yeɓ ma joŋ pǝ cok matǝdaŋdaŋ mor za Israel. Dǝɓ maki ah cam mo kyeɓ ka joŋ yeɓ ɓǝǝ ɓe, a inra dǝɓ ah pǝ wulli. 39 Pãa Lewitien za wǝǝ mai mo joŋra fĩi ɓo vaŋno, koo kalle, Mosus kee ra ne morsǝ̃ǝ ɓǝǝ tǝgbana mai Dǝɓlii mo faa, ara 22.000.
Keera pãa welii
40 So Dǝɓlii faa nyi Mosus: Mo ŋwǝǝ tǝɗii welii za Israel daŋ, mo tǝŋ daga mai mo joŋ fĩi ɓo vaŋno, koo ma kal ahe. 41 Ame ye Dǝɓlii, me nǝǝ Lewitien ɓo pǝ cok welii za Israel daŋ, so me nǝǝ welii faɓal Lewitien ɓo pǝ cok welii faɓal za Israel daŋ ta. 42 Mosus ŋwǝǝ tǝɗii wee wǝǝ mai mo bem kǝpel kǝsyil za Israel daŋ, tǝgbana mai Dǝɓlii mo faa nyi ko. 43 Tǝŋ daga mai mo joŋ fĩi ɓo vaŋno, koo ma kal ahe, pãa ɓǝǝ 22.273.
44 Dǝɓlii faa nyi Mosus: 45 Zǝzǝ̃ǝko, mo woo Lewitien ka mo yeara na zah fan ma ɓe zahwaa wee wǝǝ za Israel ma bem kǝpelle, mo so woo welii faɓal Lewitien ma bem kǝpel laŋ ka mo yeara na zah fan ma ɓe, zahwaa welii faɓal za Israel. Ame ye Dǝɓlii. 46 Amma welii temere gwa ne jemma rǝŋ tǝtǝl sai mai mo kal tǝ pãa Lewitien ɓo, sai mo soora tǝ ɓǝǝ ne lakre. 47 Mo nyiŋ vãm solai dappe tǝtǝl koo zune kǝsyil ɓǝǝ daŋ, tǝgbana mai mo kanra lak ma nyi mor yeɓ cok matǝdaŋdaŋ ɓo. 48 So ka mo nyi lak ah nyi Aron ne wee ahe. 49 Mosus laa zah Masǝŋ, nyiŋ lak ah ra, 50 a vãm solai 1.365, 51 so woo nyi nyi Aron ne wee ahe.
© Bible Moundang © Alliance Biblique du Tchad, 1996.
