Za Israel urra gin sǝr Egiɓ ka ga sǝr Moab
1 Tǝɗii cok mai za Israel mo gbahra jul ɓǝǝ gŋ ne cok mo pǝ̃ǝra gin sǝr Egiɓ, Mosus ne Aron mo kalra ɓo pel ɓǝǝra. 2 Mosus ŋwǝǝ tǝɗii cok ah ra daŋ, tǝgbana Dǝɓlii mo faa nyi ko.
3 Za Israel pǝ̃ǝra gin sǝr Egiɓ, ne fĩi patǝ vaŋno pǝzyil syii ah ne zah'nan jemma tǝtǝl dappe ahe. Ne zah'nan ma fahfal fĩi Paska patǝ vaŋno ahe, Dǝɓlii ye pa byak ɓǝǝra, pǝ̃ǝra gin yaŋ Ramse ne nahnǝn za sǝr Egiɓ daŋ. 4 Ne cok ah ka za sǝr Egiɓ tǝ ciira wul welii ɓǝǝ mai Dǝɓlii mo ik ra ɓo pǝ wulli. Ne fahlii mai Dǝɓlii mo joŋ naiko, cuu ako pǝswah kal masǝŋ ki cam za sǝr Egiɓ ɓe.
5 Za Israel urra gin yaŋ Ramse ge gbahra jul ɓǝǝ Sukot. 6 Urra gin Sukot ge ɗǝrra Etam ka soo ga nǝfah kǝsyicokki. 7 So urra gin gŋ pii soora nǝfal kal ge Pi-Hahirot, nǝfah tǝkǝsǝŋ Ba'al-Zefon, ge ɗǝrra kah Migdol. 8 Zolra gin Pi-Hahirot, ge yeera mabii Syẽ, kalra ge nǝfah kǝsyicokki, syeera kǝsyicok Etam zah'nan sai, so ge ɗǝrra Maara. 9 Urra gin gŋ kalra ge Elim, ge ɗǝrra gŋ, mor lak bii no gŋ jemma tǝtǝl gwa, kpuu dabonooje no gŋ jemma rǝŋ ta.
10 So urra gin Elim, ge ɗǝrra kah mabii Syẽ. 11 So urra gin gŋ kalra ge kǝsyicok Sin. 12 Urra gin kǝsyicok Sin gera Dofka. 13 Urra gin Dofka, gera Alus. 14 Fahfal ah urra gin gŋ gera Refidim, pǝ cok ah bii kǝka gŋ ka za mo zwah ya.
15-37 Urra gin Refidim ge kah waa Hor, ge gbahra jul ɓǝǝ pǝ cok maraiko: kǝsyicok Sinai, Pal Cwaa Fanne, Haserot, Ritma, Rimmon-Peres, Libna, Rissa, Kehelata, kah waa Safer, Harada, Makelot, Tahas, Tara, Mitka, Hasmona, Moserot, Bene-Jaakan, Hor-Gidgad, Jotbata, Abarona, Esion-Geber, kǝsyicok Zin (ako ye Kades), ne kah waa Hor ka ga nǝfah kah sǝr Edom.
38-39 Pa joŋzahsyiŋ Aron yee ge tǝwaa Hor tǝgbana Dǝɓlii mo faa, wǝ gŋ ŋhaako. Fahfal syii jemma nai mo pǝ̃ǝra gin sǝr Egiɓ, wǝ ne zah'nan vaŋno ma pǝzyil fĩi patǝ dappe. Aron joŋ syii temere ne jemma gwa tǝtǝl sai, so wǝ tǝ waa Hor.
40 Goŋ Kanaanien ma Arad pǝ sǝr Kanaan ma fah morkǝsǝŋ laa za Israel tǝ ginra.
41-49 Kǝsyil waa Hor ne kǝsyicok Moab, za Israel gbahra jul ɓǝǝ pǝ cok maraiko: Zalmona, Punon, Obot, tǝgboŋ Abarim pǝ sǝr Moab, Dibon-Gad, Almon-Diblataim kah waa Abarim gwari ne waa Nebo, so tǝbǝǝ Moab nǝfah tǝkǝsǝŋ el Yordan, kǝsyil Bet-Jesimot, ne cok tǝforoŋ Akasia ɓyaŋ ki ne yaŋ Jeriko jaŋjaŋ.
Ɓǝ lai ma kǝpel yee el Yordan
50 Kǝsyicok Moab kah el Yordan nǝfah kǝmorcomzah'nan yaŋ Jeriko, Dǝɓlii faa ɓǝ nyi Mosus gŋ, 51 ka mo faako nyi za Israel sye: Ne cok we yee el Yordan ge pǝ sǝr Kanaan ɓe, 52 sai we nĩi za mai mo kaara ɓo pǝ sǝr ah daŋ, we dah masǝŋ ɓǝǝ mai mo zyeɓra ɓo ne tǝsalle, ne mai mo ɓaŋra ɓo ne vãm syẽ, tǝkine cok juupel ɓǝǝ daŋ. 53 We re sǝr ah daŋ ka we kaa gŋ, mor ame nyi sǝr ah ɓo nyi we. 54 We wom sǝr ah kǝsyil ban ɓii ne morsǝ̃ǝ ɓii ra daŋ ne cahcah, morsǝ̃ǝ za moo mo pǝ'man ɓe, ka we nyi sǝr nyi ra pǝ'man ta, za mai mo pǝlaŋne, we nyi sǝr nyi ra pǝlaŋ nǝn ɓǝǝ ta. 55 Amma we nĩi za mai mo kaara ɓo sǝr ah daŋ ya ɓe, tǝcoŋ ɓǝǝ mo coŋra ɓo, a ga yeara wo ɓii tǝgbana fãa mai mo dan ge ɓo we nahnǝnni, wala tǝgbana waa mai mo kahlaa ɓiiri. A ga ruura sal ne we. 56 We nĩi ra ya ɓe, ka me ga muŋ we tǝgbana me foo ɓo ka muŋ ra ta.
© Bible Moundang © Alliance Biblique du Tchad, 1996.
