1 Zaluu ma pel za ma morsǝ̃ǝ Giliat we Makir we Manasse we Yuseɓ gera wo Mosus ne zaluu manyeeki ahe. 2 Faara: Dǝɓlii nyi fahlii nyi mo, ka mo wom sǝr nyi za Israel ne cahcah. So nyi fahlii nyi mo ka mo nyi sǝr mǝ naa pa ɓuu Selofad nyi wee ah maŋwǝǝre. 3 Amma mo foo ɗao, ne cok mo kanra za zahban Israel maki ah ra ɓe, fan ɓǝǝ daŋ a ga ciŋ mǝ zao ko, ko ka zah fan ma ɓuu tǝ ga nǝǝ ga lalle. 4 Ne cok syii za Israel mo kiŋ ge dai ɓe, zah faren mǝ ŋwǝǝ rai a so ɓoo ga gŋ mǝ zahban mai mo kan ra ɓo, so ka ga yeara kǝsyil zahban ma ɓuu yao.
5 Dǝɓlii faa ɓǝ nyi Mosus, so Mosus faa nyi za Israel, faa: Ɓǝ mai za Manasse mo faara goŋga yo. 6 So Dǝɓlii faa, wee Selofad maŋwǝǝ ara no ne fahlii ka kan koo zune mai zahzyil ɓǝǝ mo 'yahe, amma sai mo kanra kǝsyil zahban ma ɓǝǝra. 7 Ka zah faren za Israel daŋ, mǝ ban moo mo yea kǝsyil ban ah sǝ. 8 Mawin mai mo re yaŋ ɓo kǝsyil ban Israel daŋ, sai mo kanko dǝɓ ma pǝ zahban mooko. Ne fahlii mai ka dǝɓ wala madǝwin Israel daŋ mo rera zah faren mǝ pa ɓǝǝ lii ra, 9 mor ka faren mǝ ban maki ah mo ciŋ mǝ ban maki ah ka. Ka zahban daŋ mo kaara ne faren ma ɓǝǝra.
10-11 So Maka, Tersa, Milka, ne Noa, wee Selofad maŋwǝǝ joŋra tǝgbana mai Dǝɓlii mo faa nyi Mosus, kanra wee naa pah pa ɓǝǝra. 12 Kanra wǝǝ kǝsyil morsǝ̃ǝ ban Manasse we Yuseɓ. Zah faren ma ɓǝǝ a kǝsyil zahban mǝ pa ɓǝǝ sǝ.
13 Ɓǝ lai mai Dǝɓlii mo faa nyi za Israel ne zah Mosus tǝbǝǝ Moab kah el Yordan nǝfah kǝmorcomzah'nan yaŋ Jeriko yo.
© Bible Moundang © Alliance Biblique du Tchad, 1996.
