Yeɓ za ma morsǝ̃ǝ Kehat
1 Dǝɓlii faa nyi Mosus: 2 Mo kee Lewitien ma morsǝ̃ǝ Kehat ne morsǝ̃ǝ ɓǝǝ ne za yaŋ ɓǝǝra, 3 mo ŋwǝǝ za mai mo joŋ syii ɓo jemma sai ŋhaa mo dai jemma dappe, mai moo gak joŋra yeɓ pǝ tal mbǝro ma taini. 4 Me soɓ yeɓ byak fan yeɓ matǝdaŋdaŋ mayǝk lii ah ra daŋ jol Kehatien.
5 So Dǝɓlii faa ɓǝ mai nyi Mosus: Ne cok za mo tǝ ga zolra ka ga pǝ cok maki ah ɓe, sai Aron ne wee ah mo danra ge pǝ tal mbǝro ma taini, ka mo ge wǝǝra zyim mai mo saa ɓo zahpel sunduku gbanzahe, so ka mo riira sunduku ah ne ko. 6 Ka mo rǝǝra wak syiŋ malii ge tǝtǝl ahe, so ka mo jǝŋra zyim kǝrãhmo rii ne ko. So ka mo maara kpuu zǝǝ ah ra ka ɓaŋ sunduku ah ne ko.
7 Mo rǝǝra zyim kǝrãhmo tǝ taabǝl ma kan farel mai moo nyira nyi Dǝɓlii, so mo kanra tahsah maluu ah ra tǝl ah ne tǝkpel ma tǝǝ ɓǝrdi, tǝkine daŋ ma rǝk fan joŋ syiŋ ma sǝsǝǝ ah gŋ ka mo kanra farel tǝ taabǝl ah cẽecẽe. 8 Ka mo rǝǝra zyim masyẽ ah tǝ fan marai daŋ. So ka mo ɓaŋra wak syiŋ malii jǝŋ ge tǝtǝl ahe, ka mo maara kpuu zǝǝ ah ra mor ka ɓaŋ sunduku ah ne ko.
9 So ka mo ɓaŋra zyim kǝrãhmo ka mo riira cok kan pitǝrla ne ko, ne pitǝrla ah ra, ne tǝfẽare, ne fan woo sãhe, tǝkine tǝkpel ma rǝk nǝm pitǝrla ah mor ka kan wii. 10 Ka mo koora fan marai daŋ ne wak syiŋ malii, ka mo so ɓaŋra kan tǝ plaŋ ne ko.
11 Fahfal ah ka mo so riira zyim ma kǝrãhmo ge tǝ cok joŋ syiŋ ma vãm kaŋnyeeri, mo so ɓaŋra wak syiŋ malii jǝŋ ge tǝl ahe, ka mo maara kpuu zǝǝ ah ra ka ɓaŋ sunduku ne ko. 12 Mo woora fan yeɓ ma joŋ yeɓ pǝ cok matǝdaŋdaŋ, ka mo koora ne zyim kǝrãhmo, mo so rǝǝra wak syiŋ malii ge tǝl ahe, ka mo ɓaŋra kan ge tǝ plaŋ ne ko. 13 So ka mo woora sãh nǝm nǝǝ matǝ cok joŋ syiŋ ge lalle, mo so jǝŋra zyim syẽ ge tǝl ahe. 14 Mo rǝkra fan yeɓ ma joŋ yeɓ tǝ cok joŋ syiŋ ge tǝl ahe, tǝkpel ma tǝǝ ɓǝrdi, tǝlaŋne, pel, tǝkine tahsah maluu camcam daŋ. Ka mo so ɓaŋra wak syiŋ malii rǝǝ ge tǝl ahe, so ka mo maara kpuu zǝǝ ah ra ge wo cok joŋ syiŋ ka ɓaŋ ne ko. 15 Ne cok za mo tǝ ga zolra ka ga pǝ cok maki ah ɓe, ka Aron ne wee ah mo jǝŋra fan tǝ cok matǝdaŋdaŋ, ne tǝ fan ma joŋ yeɓ ɓǝr ah daŋ. So mo vǝrra yeɓ ah ɓe, ka morsǝ̃ǝ Kehat mo ge ɓaŋra, amma mo juura jol ge wo fan matǝdaŋdaŋ ah ra ka, a ga wukra. Yeɓ mai ka Kehatien mo joŋra pǝ tal mbǝro ma tai koiko.
16 Eleasar we pa joŋzahsyiŋ Aron ye lwaa ɓǝ tal mbǝro daŋ ɓo, ne ɓǝ nǝm wii ma rǝk pǝ pitǝrla, ne ɓǝ ɓǝrdi ne sor mai moo nyira, ne nǝm tahni, tǝkine fan manyeeki ah ra daŋ mai mo pǝ tal mbǝro mo nǝǝ rǝk ɓo mor yeɓ Dǝɓlii.
17 Dǝɓlii faa nyi Mosus ne Aron: 18 We byak morsǝ̃ǝ Kehatien pǝsãhe, 19 ka mo wukra gin kǝsyil Lewitien ka. Fan mai ka mo joŋra, ka mo yeara sǝŋ ne cee ɓǝǝ a naiko: mo gera wo fan matǝdaŋdaŋ tǝɗe' gwari ka, mor ka mo wukra ka, Aron ne wee ah ye mo danra ge gŋ kǝpelle, ka mo ɗiira vaŋno vaŋno, ka mo cuura zah yeɓ zune daŋ nyi ko, so ka mo cuura fan mai dǝɓ ah mo ga ɓaŋko nyi ko. 20 Amma Kehatien mo kal danra ge ɓǝr tal mbǝro ẽe fan matǝdaŋdaŋ mai za joŋzahsyiŋ mo tǝ zyeɓra ka zol ne ɓe, a ga wukra.
Yeɓ za ma morsǝ̃ǝ Gerson
21 Dǝɓlii faa nyi Mosus: 22 Mo kee Lewitien ma morsǝ̃ǝ Gerson, mo kee ra ne morsǝ̃ǝ ɓǝǝ tǝkine za yaŋ ɓǝǝra. 23 Mo ŋwǝǝ za ma joŋ syii jemma sai, ŋhaa dai ma joŋ syii jemma dappe, za mai moo gak joŋra yeɓ pǝ tal mbǝro ma taini. 24 Yeɓ mai ka Gersonien moo joŋra, mo woora fan yeɓ matǝdaŋdaŋ maraino: 25 mo woora fan ma jǝŋ tǝ tal mbǝro, zyim ma jǝŋ tǝl ahe, ne fan ma jǝŋ tǝl ah patǝ gwa ah mai mo ne wak syiŋ malii, ne godel ma ɓoo zahfah tal mbǝro, 26 ne godel ma ɓaa zah yaŋ mai mo ryaŋ tal mbǝro ne cok joŋ syiŋ ɓoo ɓo kǝsyilli, ne godel ma ɓoo zahfah yaŋ, ne suu ah ra, tǝkine fan yeɓ ɓǝǝ camcam daŋ. Ka mo joŋra yeɓ ne fan marai daŋ ne fahlii ahe. 27 Mosus ne Aron mo ẽera Gersonien cok joŋ yeɓ ɓǝǝra, ka mo ɓaŋra fan mai daŋ Aron ne wee ah mo cuura ɓo nyi ra ka ɓaŋni. 28 Yeɓ mai ka Gersonien mo joŋra pǝ tal mbǝro ma tai koiko. Dǝɓlii ɓǝǝ ye Itamar we pa joŋzahsyiŋ Aron.
Yeɓ za ma morsǝ̃ǝ Merari
29 Dǝɓlii faa nyi Mosus: Mo kee Lewitien ma mor Merari ne morsǝ̃ǝ ɓǝǝ ne za yaŋ ɓǝǝra. 30 Mo kee za ma joŋ syii jemma sai, ŋhaa dai ma joŋ syii jemma dappe, za mai moo gak joŋra yeɓ tal mbǝro ma taini. 31 Yeɓ mai ka mo joŋra a naiko: mo woora plaŋ tal mbǝro ne kpuu yil ah ra, ne wǝǝdǝǝ ah tǝkine ɓal ah ra, 32 so ka mo woora wǝǝdǝǝ ma ryaŋ zahpiicelle, ne ɓal ah ra, ne gaari ah ra, ne suu ah tǝkine fan yeɓ ɓǝǝ daŋ. We ɗii zune daŋ ne tǝɗii, ka we cuu fan mai ka mo ɓaŋko nyi ko. 33 Zah yeɓ mai ka Merarien mo joŋra ne tal mbǝro ma tai koiko. Dǝɓlii ɓǝǝ ye Itamar we pa joŋzahsyiŋ Aron.
Pãa Lewitien
34-48 Mosus ne Aron tǝkine zaluu ma pel za pãa joŋra tǝgbana mai Dǝɓlii mo faa ɓo, keera Kehatien, Gersonien ne Merarien ne morsǝ̃ǝ ɓǝǝ tǝkine za yaŋ ɓǝǝra. Ŋwǝǝra za mai mo joŋra syii ɓo jemma sai, ŋhaa dai za ma joŋ syii jemma dappe, za mai moo gak joŋra yeɓ pǝ tal mbǝro ma taini, ara naiko: Kehatien - 2.750. Gersonien - 2.630. Merarien - 3.200. Pãa Lewitien rai daŋ - 8.580. 49 Koo zune kǝsyil ɓǝǝ daŋ nyira zah yeɓ mǝ ah nyi ko tǝkine fan mai moo ɓaŋko tǝgbana mai Dǝɓlii mo faa ɓǝ ah ne zah Mosus. Ŋwǝǝra zune daŋ tǝgbana mai Dǝɓlii mo faa ɓǝ ah nyi Mosus.
© Bible Moundang © Alliance Biblique du Tchad, 1996.
