Za ma ne 'nahmme
1 Dǝɓlii faa nyi Mosus: 2 Mo faa nyi za Israel mo nĩira dǝɓ mai mo ne syem fan suu, wala dǝɓ ma ne syem sompir zahjul ge lalle, ne dǝɓ mai mo juu wul ɓo mo ne 'nahm daŋ. 3 We nĩi za mai mee kwan ne 'nahm za wǝǝ ne ŋwǝǝ daŋ ge lalle, mor ka mo ɓeɓra zahjul mai me kaa ɓo gŋ kǝsyil za ɓe ka. 4 Za Israel joŋra na ɓǝ mai Dǝɓlii mo faa nyi Mosus, nĩira za mai Dǝɓlii moo kwan ne 'nahm zahjul daŋ ge lalle.
Soo faɓe'
5 Dǝɓlii faa nyi Mosus: 6 Mo faa nyi za Israel sye: Ne cok dǝɓ mo joŋ faɓe' wo Dǝɓlii ne joŋ ɓǝɓe' wo dǝɓ ki ɓe, 7 sai mo keeko faɓe' ah ge lalle, ka mo sooko soo pǝ'man nǝn ɓǝɓe' mai mo joŋko, ka mo so nyiko jemma gwa daga pǝzyil temere nyi dǝɓ mai mo joŋko ɓǝɓe' ɓo wol ah kpǝ. 8 Amma dǝɓ mai mo joŋko ɓǝɓe' ɓo wol ah mo wǝ ɓe, mo ka ne zum matǝ gwari ah ka mo soora ko mor ah ya ɓe, ka pa ma joŋ ɓǝɓe' mo nyiko fan ah nyi Dǝɓlii mor pa joŋzahsyiŋrĩ. Fan ah a ga yea na fan ma kan ga tǝ kǝbǝr mai pa joŋzahsyiŋ moo ga joŋ syiŋ ne mor ka rwah faɓe' pa ma joŋ ɓǝɓe' ga lalle. 9 So fan nyi mai za Israel moo nyira nyi Dǝɓlii daŋ, mǝ pa joŋzahsyiŋ mai moo gin nyira fan ah nyi yo. 10 Fan nyi mai moo gin nyira nyi pa joŋzahsyiŋ daŋ, ka mǝ pa joŋzahsyiŋ ah yo.
Dǝɓ mai mo ne syel pǝ zahzyil tǝ ɓǝ mawin ahe
11 Dǝɓlii faa nyi Mosus: 12-14 Mo faa nyi za Israel sye: Dǝɓ mo ne syel pǝ zahzyil tǝ ɓǝ mawin ah ŋ mawin ah joŋ ɓǝɓe' ɓo wol ah ge swǝ ɓo ne dǝwor ki ɓe, amma wor ah mo tǝ ɓǝ ah njaŋ ya, mor mawin ah muŋ ɓǝ ah ɓo muŋ, so pa syedowal ah laŋ kǝka, gbǝra mawin ah laŋ ɓo ka cok joŋ ɓǝǝ gǝrɗǝŋ ya, maki tǝwon ye ur ɓo pǝ zahzyil wor ah tǝkolle, mawin ah joŋ ɓǝɓe' laŋ ɓo ya, koo ɓǝ ah mo yea ɗǝne daŋ, 15 ka dǝɓ ah mo ɓaŋ mawin ah ge wo pa joŋzahsyiŋ ne ko, ka mo geko ne fan nyi mor mawin ah ta, mo fõoko sum tahsah vaŋno, amma ka mo rǝkko nǝm ne ɓǝrdi ge tǝl ah ka, mai fan nyi ma nyi mor ɓǝ tǝwon o, mor ka goŋga ɓǝ ah mo pǝ̃ǝ ge lalle.
16 Pa joŋzahsyiŋ mo zaŋko mawin nyẽe mo ge uuko pel Dǝɓlii. 17 So ka pa joŋzahsyiŋ mo beeko bii mai Dǝɓlii moo kwan pǝsãhe, mo rǝk ge pǝ ciiri, mo so fõo sǝr mai mo pǝ tal mbǝro ma taini, ka mo rǝk ge pǝ bii ahe. 18 So ka pa joŋzahsyiŋ mo syelko rĩi mai mawin ah mo jer ɓo tǝtǝl ge lalle, ka mo so ɓaŋko fan nyi ma joŋ syiŋ ne tǝ ɓǝ tǝwon nyi ge nyi mawin ah jolle. Amma pa joŋzahsyiŋ mo ɓaŋko cii mai bii mazwak mo ɓǝr ahe, mai moo ɗii tǝkẽawãk gin tǝ dǝɓ ne ko gbǝ jolle. 19 So pa joŋzahsyiŋ mo haako zah nyi mawin ah mo faa: Mo joŋ ɓǝǝr a ɓe, tǝkẽawãk mai bii mai moo ga ge tǝ ɓo ne ko, ka ga joŋ fan ki wo ɓo ya. 20 Amma mo joŋ ɓǝǝ ɓo ɓe, 21 Dǝɓlii ga pee tǝkẽawãk ge tǝ ɓo kǝsyil za ɓo, a ga joŋ suu ɓo ka ɗaŋ yao, a ga joŋ ɓǝr zaŋ mo ta. 22 Bii mai a ga dan ga ɓǝr masǝ̃ǝnyiŋ ɓo, a ga zaŋ ɓǝr nyi mo, a ga joŋ pel ɓo wǝ ta. So ka mawin mo zyii faa: Ame zyii ɓǝ ah ɓe, Dǝɓlii mo joŋko naiko.
23 So ka pa joŋzahsyiŋ mo ŋwǝǝko ɓǝ tǝkẽawãk maiko, ka mo so vãhko fan ŋwǝǝ ah mo ŋwǝǝ ɓo ge pǝ cii mai bii mazwak kŋ mo ɓǝr ahe. 24 Ka mo nyiko bii ah nyi mawin ah zwǝ ka mo ge ɓǝr ah mo sye ɓǝr nyi ko, 25 so ka pa joŋzahsyiŋ mo ɓaŋko fan nyi ma joŋ syiŋ tǝ ɓǝ tǝwon kŋ gin jol mawin ahe, ka mo nyiko nyi Dǝɓlii, mo so ge kan tǝ cok joŋ syiŋrĩ. 26 Pa joŋzahsyiŋ mo fõoko fan nyi ah gin gŋ, mo baa jol ahe, ka mo so tǝǝ ko tǝ cok joŋ syiŋrĩ, ka fahfal ah mo so nyiko bii kŋ nyi mawin ah zwǝ. 27 Mawin ah mo joŋ ɓǝǝ ɓo ɓe, bii mazwak kŋ a ga sye ɓǝr nyi ko, so ɓǝr a ga zaŋ ko, pel ah laŋ a ga wuu. Tǝɗii ah a ga yea na fan mai zahyee mo tǝl ah kǝsyil zan ahe. 28 Amma mawin ah mo ka ne ɓǝ ki tǝtǝl a ɓe, fan ki ka joŋ wol ah ya, a ga bem weere.
29 Ɓǝ lai matǝ ɓǝ tǝwon koiko. Ne cok madǝwin mo joŋ ɓǝǝre, 30 wala tǝwon ye mo ur ɓo pǝ zahzyil dǝwor mo tǝ foo ɓǝ ki cam tǝ mawin ah ɓe, ka mo zaŋko mawin ah ge uu ne pel Dǝɓlii, ka pa joŋzahsyiŋ mo joŋ wol ah tǝgbana ɓǝ ah mo faa ɓo nyeeko. 31 Ka ɓǝɓe' ka yea tǝ wor mawin yao, amma ɓǝɓe' mai mawin ah mo joŋ goŋga ɓǝ ah mo uu ɓe, ka mawin ah mo laako bone zahwaa faɓe' ahe.
© Bible Moundang © Alliance Biblique du Tchad, 1996.
