Njaŋ matǝ goŋga pel Masǝŋ
1 Faɗa wee pa ɓe, we laa pǝ'nyah ne ɓǝ Dǝɓlii. Me ka laa gaɓ ne jin faa ɓǝ mai me ŋwǝǝ ɓo nyi we kǝpel a, mor ɓǝ ah a ne yeɓ wo ɓiiri. 2 We byak suu ɓii wo za ma joŋra faɓe', we byak suu ɓii wo goo raiko, we byak suu ɓii wo za ma gban ɓǝ ŋgom suu ga lalle! 3 Za ma daakan matǝ goŋga ah sye ko ye ru, ako ye ka ra ya, mor ru juupel wo Masǝŋ ne Tǝ'yak ahe, aru laa suu ɓuu pǝ'nyah mor Yesu Kristu, ru gbǝ ɓǝ yǝk fan mai dǝfuu moo joŋra wo suu lal ɓo ya. 4 Ame laŋ me no ne fan ma joŋ wo suu lal ka me gak gbǝ yǝk ɓǝ ah ta. Koo dǝɓ mo lǝŋ azye no ne fan ma joŋ wo suu lal ka gban yǝk ɓǝ ahe, ame ne fan ah kal ko ɓe. 5 Mor me joŋ zah'nan nama, daara kan nyi me sǝ. Ame ye ban Israel, me morsǝ̃ǝ Benyaamin, ame ye byaŋ Yahuduyo matǝ ryakryakke. So ne fahlii ma syee mor ɓǝ lai Yahuduen ye laŋ, ame ye Farisiyo sǝ. 6 Ne tǝwon ah me ne ko, me foo mor eklesia. Ne fahlii mai dǝɓ moo kyeɓ ka yea njaŋ ne syee mor ɓǝ laini, lwaara ɓǝ ki tǝ ɓe ne ya.
7 Amma fan marai daŋ me yea tǝ kwan wo ɓe pǝyǝkki, zǝzǝ̃ǝko me kwan na fan makol ah mor ɓǝ Yesu Kristu. 8 Fan marai ye ka to laŋ ya, amma me kwan fan daŋ na fan makol ah mor ɓǝ masãh lii ah kal fan daŋ ako ye tan Yesu Kristu Dǝɓlii ɓe. Ame soɓ fan daŋ ge lal mor ahe, me kwan fan daŋ tǝgbana mǝrrĩ, mor ka me lwaa Kristu, 9 ka me tai ne ki vaŋno ne goŋga. Me ka tǝ kyeɓ ka yea njaŋ ne suu ɓe ne fahlii syee mor ɓǝ lai ya. Zǝzǝ̃ǝko ame njaŋ mor me nyiŋ Kristu ɓo, njaŋ mai gee wo Masǝŋ ge, ɓǝ ah uu ɓo tǝ iŋni. 10 Fan mai me ne 'yah ah kal fan daŋ: me 'yah ka tan Kristu ne swah ur pǝ wul ahe, ka me laa bone ahe, ka me yea tǝgbana ko ne wul ahe. 11 Mor ame ne suu ɓe, me tǝ byak ka me ge ur pǝ wul ta.
Paulus kyeɓ ka lwaa fan soo ahe
12 Me foo sõone me lwaa fan ah gbǝ ɓe wala ame njaŋ o ya, amma me tǝ ɗuu ganne, me kyeɓ ka me ge lwaa fan soo ahe, mor Yesu Kristu lwaa mǝ ah me gbǝ ɓe. 13 Wee pa ɓe, me foo sõone me lwaa soo ah ɓe ya, amma fan vaŋno me tǝ joŋni: me yaŋ ɓǝ fan ma fahfalle, me joŋ suu ɓe ne swahe, ka me ge dai mai mo no pel ɓe. 14 Me tǝ ɗuu njaŋ ka ga dai zahtǝmgboo ahe, mor ka me ɗǝǝ soo mai Masǝŋ mo tǝ ɗii na tǝl ah mor Yesu Kristu ka ga nyiŋ coksǝŋ.
15 Ana za mai na joŋ zaluu ɓo pǝ tǝ'yak daŋ, sai na yea ne ɓǝ foo tǝ vaŋno. So za ki mo ne ɓǝ foo ki cam kǝsyil ɓii ɓe, Masǝŋ ga cuu ɓǝ ah nyi we taŋraŋ. 16 Koo mo ɗǝne daŋ, sai na syee ge pel tǝ fahlii mai na lwaa ɓo na tǝ syee gŋ ŋhaa tǝ'nahko.
17 Wee pa ɓe, we daŋ we joŋ tǝgbana me. Aru cuu fahlii joŋ ah ɓe, so we ẽe za mai mo tǝ syeera tǝgbana fahlii ah mo cuu ɓo. 18 Me faa ɓǝ ah ɓo nyi we ɓal pǝpãa ɓe, so me tǝ faa nyi we zǝzǝ̃ǝ ne mĩi nahnǝn faɗa: za pǝlli syel ɓǝǝ cuu syiŋra ɓǝ wul Kristu tǝ kpuucee ɓo. 19 Ne cok in zah ɓǝǝ a gara pǝ cok wii, mor masǝŋ ɓǝǝ ye fan cwaa suu ɓǝǝra. A yiira suu ɓǝǝ ne fan ma ren swãa ah moo joŋra, a foora ɓǝ fan sǝr mai to. 20 Ma man ana ye za coksǝŋ, ana tǝ byak tǝkine cwaa pa ǝ̃ǝ man Dǝɓlii Yesu Kristu mai mo ga gee coksǝŋ ginni. 21 Ako ye ga fer suu man matǝtǝ̃ǝ ma wo sǝr mai ka ga yea tǝgbana suu mǝ ah mayǝkki. A ga joŋ ne swah ah mai moo gak ka tai fan daŋ gin mor jol ah ne ko.
© Bible Moundang © Alliance Biblique du Tchad, 1996.
