1 Zwan yim a joŋ dǝɓ ciŋ pa faa ɓǝ lii tǝkine tǝgwĩi. Mo tǝ zwan yim ɓe, ka mo ye tǝgwĩi. 2 Kpãh goŋ a tǝgbana yee ɓolle, dǝɓ mo joŋ ko ɓaŋ kpãh ɓe, ka dǝɓ ah kyeɓ muŋ suu ah ɓo. 3 Dǝɓ ma tǝgwĩi ah a gak tǝŋ mor balle, amma dǝɓ matǝ goŋga ah ka zyii juu ɓǝ ah ya.
4 Pa pǝǝ 'wah ma vǝǝkoi ah mai mo ka ruu 'wah ah ne cok ah ya, ka lwaa fakpãhpǝǝ ne gwahl a ta. 5 Ɓǝ foo zahzyil dǝfuu a pǝɗǝk tǝgbana lak bii maɗǝk ahe. Amma dǝɓ ma ne tǝtǝl a gak bee gin lal ne ko. 6 Koo zune daŋ a kwan suu ah na dǝɓ tǝ goŋga, amma dǝɓ matǝ goŋga sye a kẽne? 7 Pah wee mo dǝɓ tǝ goŋga ye ɓe, moo joŋ fan masãh ah ɓe, wee ah a laa pǝ'nyahre.
8 Ne cok goŋ mo kaa tǝ fakal ka ŋgoŋ kiita ɓe daŋ mo kwo faɓe' ɓe, a hǝǝ tan faɓe' daŋ. 9 Azu yee gak faa zahzyil 'min njaŋ faɓe' ka wo 'min a ne? 10 Dǝɓlii syiŋ ɓǝ lee fan ne lii fan ma ne ɓǝ tǝ vǝrvǝr ɓo gŋ gwa daŋ. 11 Welaŋ a cuu suu ah ne fan joŋ ahe, mo gak tanne, we nyẽe wel o, a ga joŋ dǝfuu sãhe.
12 Dǝɓlii nyi nahnǝn nyi na ka na ẽe cok ne ko, nyi sok nyi na ka na laa ɓǝ ne ko. 13 Mo muŋ cok ɓo ne nanǝm ɓe, mo ga yea pǝsyakke. Mo pee suu ne joŋ yeɓ mbaŋ ɓe, mo ga lwaa farelle. 14 Dǝɓ ma lee fan a faa nyi pa fanne, ka pǝsãh ya, ka pǝsãh ya, amma mo kal ne ɓe, a so ga sãa ɓǝ ahe.
15 Mo tǝ mor ɓǝ mai mo tǝ faa ɓǝ ah ɓe, ka mo ne fan mai mo kal vãm kaŋnyeeri wala fãi masãh ah ɓo ne yǝk ɓe. 16 Dǝɓ ma tǝgwĩi ah a nyiŋ ɓǝ val dǝɓ ki kan ga tǝ suu ah ka sooni, a soɓ ɓǝ kyeɓ ma ka syak ah ka sooni. 17 Fan mai dǝɓ mo lwaa ne fahlii tǝ vǝrvǝr, a laa pǝ'nyah ne ren ah na farel ma'nyah ahe, amma fahfal ah nje ɓe, a ga ciŋ ɓǝ magaɓ wol ahe.
18 Mo kyeɓ gbah jol masãh ahe, mo ga yea ne pejii, mo ge zah sal bai zyeɓ ɓǝ ah kǝpel ka. 19 Dǝɓ mai moo myah ɓǝɓe' dǝɓ ki haihai, a faa ɓǝ ma tǝsyeɓ ah gin lalle. Dǝɓ moo faa ɓǝ pǝlli ɓe, mo gbǝ tǝbǝǝ ne ki ka. 20 Dǝɓ mo kal tǝǝ pah ah ne mah ah ɓe, kal ah wo sǝr ga vǝr tǝgbana pitǝrla moo rum pǝ cokfuu.
21 Joŋ mai mo lwaa pǝgaɓ ya, in zah ah ka ga joŋ fan sãh ya. 22 Mo faŋ val ɓǝɓe' ne suu ɓo ka, mo soɓ ɓǝ ah ge jol Dǝɓlii, ako ye ga joŋ ɓǝ ahe. 23 Dǝɓlii syiŋ ɓǝ za mai moo leera fan tǝkine lii fan ma ne fahlii tǝ vǝrvǝr ah ɓo.
24 Dǝɓlii ye pa ma syee ne dǝɓɓi, azu ye tǝ ɓǝ kal suu ah ɓo ne? 25 Mo foo ɓǝ kǝpel ɗǝ ka mo haa zah ne ɓǝ nyi fan nyi Dǝɓlii ba. Mo joŋ nai ya ɓe, maki mo so ga ɗii marvǝǝ ah fahfalle. 26 Goŋ ma ne tǝtǝl a ga tǝ dǝɓ ma joŋ faɓe', a ga ŋgoŋ kiita tǝl ah bai kwan syak tǝl ahe.
27 Dǝɓlii ye nyi ɓǝ foo tǝkine fatan zahzyil nyi na, a gak mgbaira ɓǝ mai mo pǝzyil dǝfuu pǝ muŋni. 28 Goŋ moo kwan syakke, moo joŋ fan njaŋ, mo ka joŋ za camcam ya ɓe, goŋ ah a nǝn ɗǝ. 29 Yǝk wee tǝbanna ye swah ɓǝǝra, yǝk zaluu ye vǝm fãi. 30 In mai syen ah moo dan ga pǝ zahzyil ryaŋryaŋ a nĩi ɓǝɓe' wo dǝɓ ga lalle.
© Bible Moundang © Alliance Biblique du Tchad, 1996.
