Na joŋ osoko nyi pa joŋ fanne
1 Mazwãhsuu ɓe, mo yii Dǝɓlii!
Dǝɓlii, Masǝŋ ɓe, mo pǝyǝkki.
Amo ɓoo yǝk ɓo ɓo tǝgbana mbǝro.
2 Amo ɓoo cokfãi ɓo tǝgbana mbǝro.
Mo ɓyak coksǝŋ ɓo tǝgbana laimaaru.
3 Dǝɓlii, mo zyeɓ cok kal ɓo ɓo sǝŋ tǝ bii,
Mo joŋ swãh bam ɓo na pǝr mor ɓo,
Amo syee pǝzyil zyakke.
4 Amo joŋ zyak ɓo na zapee ɓo,
Mo joŋ sãh bam ɓo na za yeɓ ɓo.
5 Mo joŋ sǝr uu ɓo tǝ kpii ahe, ka laŋ ya.
6 Mo yea rii ɓo ne mabii tǝgbana dǝɓ moo rii fan ne zyimmi,
Ŋhaa rii waa ne lii ah daŋ.
7 Ne cok bii mo laara kyaŋ ɓo ma na ɓyaŋ bamme, so ɗuura kalle.
8 Bii mo ǝŋ o, waa pǝ̃ǝra ge lalle,
So bii taira ge pǝ cok mai mo zyeɓ ɓo mor ɓǝǝra.
9 Mo ɗea zahsyee nyi bii ka mo zǝǝra gŋ ka mo rahra tǝ sǝr daŋ kao.
10 Amo ye joŋ ka lum mo yea,
Ka bii mo ɓal tǝgǝǝ waa maluuri,
11 Ka nǝǝ cok daŋ mo zwahra tǝkine korro cokki.
12 Juu ma zoo sǝŋ swahra tǝ kpuu kah ahe,
A ŋwaara yee ne zwǝǝ tǝ ɓer ah ra.
13 Daga cok kal ɓo sǝŋ mo ye joŋ ka bam mo tǝ ge sǝŋ.
Sǝr daŋ kǝ̃ǝ ɓo ne yeɓ sãh jol ɓo.
14 Amo ciŋ fãa mor faɓalle,
Tǝkine fakpãhpǝǝ mor dǝfuu daŋ.
15 A lwaara farel ne fazwan mor ka laa pǝ'nyahre
Tǝkine nǝm tah wo suu daŋ.
16 Dǝɓlii a sah bii nyi kpuu bah mǝ ah mai mo pea ɓo sǝr
Liban.
17 Juu a syiira kol ɓǝǝ gŋ,
Makãhgoŋ a syiira kol ɓǝǝ tǝl ahe.
18 Magwiiŋgaɓ a swahra pǝ gǝ̃ǝre,
Tǝkpiiwa a swahra tǝgǝǝ waare.
19 Dǝɓlii, amo joŋ fĩi mor ka woŋ cokki,
Com a tan cok dan ahe.
20 Amo ye soɓ cokfuu tǝkine suŋ fooni, ka nǝǝ cok mo kyãhra.
21 Wee ɓol a yera yee mor farel ɓǝǝ jol ɓo.
22 Com mo zoo ɓe, a jin ga swahra pǝ yii ɓǝǝra.
23 Amma ne cok ah dǝfuu a pǝ̃ǝra ga tǝ yeɓ ɓǝǝra,
A joŋra yeɓ ŋhaa dai lilli.
24 Dǝɓlii, fan mai mo joŋ ɓo a pǝlli,
Mo joŋ ra ɓo daŋ ne yella,
Fan sãh ɓo baa sǝr ɓo.
25 Mabii maluu no,
Syiŋ maluu ne manyee no mor ahe,
Dǝɓ ka gak kee ya.
26 Dah tǝ bii maluu a kyãhra gŋ ta.
Mo joŋ syii dah maluu ɓo ka mo joŋra kyẽm gŋ.
27 Nǝǝ marai daŋ a byakra farel ɓǝǝ gin jol ɓo,
Ka mo nyi nyi ra ne cok ahe.
28 Mo nyi nyi ra ɓe, a nyiŋra.
Mo nyi farel nyi ra ɓe, a kǝ̃ǝra.
29 Mo soɓ ra ɓe, a ɗuura galle.
Mo ŋgoŋ tǝ'yak ɓǝǝ ɓe, a wukra,
A jin ciŋra vuu faɗa.
30 Mo fee tǝ'yak tǝ ɓǝǝ ɓe, a so yeara ne cee,
So fan a bem wo sǝrri.
31 Na yii Dǝɓlii ga lii ga lii,
Ka Dǝɓlii mo laa pǝ'nyah ne fan joŋ ah ra.
32 Mo ẽeko sǝr ne nahnǝn ɓe, a laŋ ne lii ah daŋ.
Koo mo juuko waare, suŋwii pǝ̃ǝ gŋ gin lalle.
33 Me ga ɗǝǝ lǝŋ wo Dǝɓlii ne cok me no,
Ne zah'nan cee ɓe daŋ, me ga ɗǝǝ lǝŋ yii Masǝŋ ɓe ne ko.
34 Ka mo laako pǝ'nyah ne lǝŋ me tǝ ɗǝǝni,
Mor ako ye joŋ me tǝ laa pǝ'nyahre.
35 Za faɓe' mo vǝrra gin wo sǝrri,
Ka za maɓea mo yeara kao.
Mazwãhsuu ɓe, mo yii Dǝɓlii. Mo yii Dǝɓlii!
© Bible Moundang © Alliance Biblique du Tchad, 1996.
