Ɓǝ sãh mai Dǝɓlii mo joŋ wo zan ahe
1 Na yii Dǝɓlii!
We joŋ osoko nyi Dǝɓlii mor ako pǝsãhe, 'Yah ah a ga lii ga lii.
2 Azu ye gak kee ɓǝ yeɓ ah maluu mai mo joŋko ɓo ne?
Azu ye gak yii ko kii nǝn ah ne?
3 A pǝ'nyah wo za mai moo syeera mor ɓǝ lai ah tǝkine joŋ fan matǝ njaŋ ah cẽecẽe.
4 Dǝɓlii, ne cok mo tǝ gbah jol za ɓo ɓe, mo foo ɓǝ ɓe ta.
Ne cok mo tǝ ǝ̃ǝ ra ɓe, mo ǝ̃ǝ ra ne me daŋ.
5 Mo soɓ me kwo ɓǝ 'nyah mai mo joŋ wo za ɓo,
Ka me laa pǝ'nyah tǝki vaŋno ne ra,
Ka me lwaa yǝk mai moo ga yii za ɓo ne ta.
6 Aru joŋ faɓe' ɓo tǝgbana pa ɓuu lii mo joŋra ta.
Ru zyak fahlii tǝkine joŋ ɓǝɓe' ɓo na ra ta.
7 Pa ɓuu lii zyii ɓaŋra syiŋ yeɓ matǝ gǝriŋ mai Masǝŋ mo joŋ sǝr Egiɓ ya,
Cẽecẽe a yaŋra ɓǝ 'yah ah mai mo 'yah ra ɓo,
Ŋwoora kyaŋ ne ki zah mabii Syẽ.
8 Amma ne daŋ laŋ, ǝ̃ǝ ra tǝgbana ɓǝ faa ah mo faa ɓo,
Mor ka cuu swah ah ne ko.
9 Faa ɓǝ nyi mabii Syẽ, so bii ah yakke,
Zaŋ zan ah yee gŋ ne tǝgbana dǝɓ moo syee tǝ sǝr yakke,
10 Ə̃ǝ ra tǝkine wǝǝ ra jol za syiŋ ɓǝǝra.
11 Bii jǝŋ ge tǝ za syiŋ ɓǝǝra,
Koo dǝɓ vaŋno laŋ ǝ̃ǝ ya.
12 So zan ah nyiŋra ɓǝ faa ahe,
Ɗǝǝra lǝŋ yii ko ne ko.
13 Amma ne daŋ laŋ yaŋra fan mai mo joŋko gwari sǝ,
Zyii laara lai ah yao.
14 So zahzyil ɓǝǝ cwaa fan kǝsyicokki,
Liira Masǝŋ gŋ.
15 So Masǝŋ nyi fan mai mo fiira nyi ra,
So pee syem magaɓ ah ge kǝsyil ɓǝǝra.
16 Joŋra tǝwon ne Mosus ne Aron dǝɓ yeɓ Masǝŋ matǝdaŋdaŋ kǝsyicokki.
17 So sǝr ǝǝ zah sǝ̃ǝ Datan ne Abiram ne za yaŋ ah daŋ.
18 Wii gee sǝŋ ge tǝ za mai mo syeera mor ɓǝǝra,
Syak za faɓe' rai daŋ.
19 Za Israel coora we dǝǝ ne vãm kaŋnyeeri kah waa Sinai, juura pel wo foto ahe.
20 Ferra yǝk Masǝŋ, liira ne foto dǝǝ mai moo ren fãa.
21 Yaŋra Masǝŋ mai mo ǝ̃ǝ ra sǝr Egiɓ ne yeɓ magaɓ ah mai mo joŋko gŋ,
22 Tǝkine fan matǝ gǝriŋ ah mai mo joŋko zah mabii Syẽ.
23 So Masǝŋ faa zye ga vǝr za 'minni,
Amma Mosus dǝɓ yeɓ ah mai mo nǝǝ ko ɓo ge uu kǝsyil ah ne zan ahe,
Cak ko ka mo muŋ ra ka.
So Masǝŋ soɓ ɓaŋ kpãh ah mo ɓaŋ ɓo kǝnah ka muŋ ra.
24 Zyii ka gara pǝ sǝr masãh ah ya,
Mor nyiŋra ɓǝ faa Masǝŋ mo faa ɓo ya.
25 Haira pǝ tal mbǝro ɓǝǝ ne kyãh ɓǝ nyeere,
Zyii laara zah Dǝɓlii ya.
26 So Dǝɓlii lai ra ne swah faa zye ga soɓ ra wuk kǝsyicokki,
27 Zye ga myah morsǝ̃ǝ ɓǝǝ ga kǝsyil za gwǝǝre,
Zye ga soɓ ra wuk zah sǝr za ki.
28 So za Masǝŋ kalra ne juupel wo Ba'al ma Peor,
So rera nǝǝ ma joŋ syiŋ wo masǝŋ ma wul ah ra.
29 Kǝǝra zahzyil sye Dǝɓlii tǝ ɓǝ yeɓ ɓǝǝ moo joŋra,
So syem magaɓ ge kǝsyil ɓǝǝra.
30 Amma Fineas ur ŋgoŋ kiita tǝ pa ɓǝɓe' ahe,
So syem ah i zahe.
31 So daga cok ah ŋhaa tǝ'nahko a keera ko na dǝɓ sãhe,
So a ga keera ko na dǝɓ sãh ga lii ga lii.
32 Za Dǝɓlii joŋra ko ɓaŋ kpãh zahbii Meriba,
Mosus laa bone mor ɓǝ ɓǝǝra.
33 Joŋra ko ɓaŋ kpãh ŋhaa zah ah faa ɓǝ mai mo ka nǝn faa ya.
34 Zyii ka ikra za bai iŋ pǝ wul tǝgbana mai Dǝɓlii mo faa nyi ra ya.
35 Amma so kanra ki,
Syeera mor zahsyiŋ za sǝr kanaan.
36 Za Masǝŋ so kalra ne juupel wo masǝŋ ki ra,
Ɓǝ ah so ciŋ muŋ ɓǝǝra.
37 A woora wee ɓǝǝ mawǝǝ ne maŋwǝǝ joŋ syiŋ wo masǝŋ za sǝr kanaan ne ko.
38 Ikra wee ɓǝǝ ma wǝǝ ne ma ŋwǝǝ ma bai faɓe' ge lal pǝ wul ne joŋ syiŋ wo masǝŋ sǝr Kanaan.
So sǝr ɓeɓ mor ɓǝ ahe.
39 Ɓeɓra suu ɓǝǝ ne yeɓ joŋ ɓǝǝra,
Ciŋra za bai goŋga pel Masǝŋ.
40 So Dǝɓlii ɓaŋ kpãh tǝ zan ahe,
Zahzyil ah ka laa pǝ'nyah ne ra ya.
41 Soɓ ra ge mor jol za gwǝǝre,
Za syiŋ ɓǝǝ kaara goŋ tǝ ɓǝǝra.
42 Za syiŋ ɓǝǝ cuura syak nyi ra,
Ara mor jol ɓǝǝra.
43 Cẽecẽe Dǝɓlii a wǝǝ zan ahe,
Amma ne daŋ laŋ a so ŋwoora kyaŋ ne ki,
A danra pǝ faɓe' pǝ'manne.
44 So ne cok mo yera yee ɓe, Dǝɓlii laa yee ɓǝǝra,
A foo ɓǝ bone ɓǝǝra.
45 Dǝɓlii so foo ɓǝ gbanzah ah mo gbǝ ɓo ne ra,
Tǝkine 'yah lii ah mo ne ko, So fer ɓǝ foo ahe.
46 So joŋ za mai mo gbahra ra ɓo na daŋgai ka mo kwora syak tǝ ɓǝǝra.
47 Dǝɓlii, Masǝŋ ɓuuru, mo ǝ̃ǝ ru,
Mo tai ru gin kǝsyil za ki ge sǝr ɓuuru,
Ka ru yii tǝɗii ɓo matǝdaŋdaŋ,
Ka ru laa pǝ'nyah ne joŋ osoko nyi mo.
48 Na yii Dǝɓlii, Masǝŋ Israel,
Na joŋ osoko nyi ga lii ga lii. Za daŋ mo faara: Amen!
Na yii Dǝɓlii!
© Bible Moundang © Alliance Biblique du Tchad, 1996.
