Masǝŋ a vaŋno
1 Mo yiira mo syak ɓo Dǝɓlii,
Mo yiira mo syak ɓo mor 'yah lii ɓo ne gboŋgboŋ ɓo,
Mo yiira ru ka.
2 Za fiira ru Masǝŋ ɓii kẽne mor fẽene?
3 Masǝŋ man a no coksǝŋ,
A joŋ fan mai moo 'yahko.
4 Masǝŋ ma ɓǝǝ vãm solai ne vãm kaŋnyeeri yo,
Dǝfuu zyeɓ ra ɓo ne jolle.
5 Ara ne zahe, amma ka gak faara ɓǝ ya.
Ara ne nahnǝnni, amma ka kwanra cok ya.
6 Ara ne sokki, amma ka gak laara ɓǝ ya.
Ara ne võo, amma ka gak laara fuŋ fan ne ya.
7 Ara ne jolle, amma ka gak gbanra fan ne ya.
Ara ne ɓalle, amma ka gak syeera ne ya.
Dǝɓ ka gak laa kyaŋ ɓǝǝr a.
8 Ka za mai mo zyeɓra masǝŋ ki ɓo ne za mai mo soɓra suu ɓǝǝ wo ɓǝǝ daŋ mo yeara tǝgbana masǝŋ ki mai mo zyeɓ ra ɓo.
9 Za Israel, we soɓ suu ɓii wo Dǝɓlii,
Ako ye tǝ gbah jol ɓiiri, ko ye tǝ byak we.
10 Za joŋzahsyiŋ Masǝŋ, we soɓ suu ɓii wo Dǝɓlii,
Ako ye tǝ gbah jol ɓiiri, ko ye tǝ byak we.
11 Awe za mai we tǝ ɗuu Dǝɓlii daŋ,
We soɓ suu ɓii wol ahe,
Ako ye tǝ gbah jol ɓiiri, ko ye tǝ byak we.
12 Dǝɓlii tǝ foo ɓǝ mana,
A ga ẽe na.
A ga ẽe za Israel tǝkine za joŋzahsyiŋ Masǝŋ daŋ.
13 A ga ẽe za mai moo ɗuura ko,
Zaluu tǝkine wee nyee daŋ.
14 Dǝɓlii mo nyi wee nyi we tǝkine morsǝ̃ǝ ɓii daŋ.
15 Dǝɓlii mai mo joŋ sǝŋ ne sǝr mo ẽe we.
16 Coksǝŋ mǝ Dǝɓlii ye syak ahe,
Amma nyi sǝr ɓo nyi dǝfuu.
17 Wul ka yii Dǝɓlii ya,
Za mai mo kalra ge ɓo mor sǝr ka yiira ko ya.
18 Amma ana za mai na no ne cee,
Na ga joŋ osoko nyi ko daga zǝzǝ̃ǝko ŋhaa ga lii.
Na yii Dǝɓlii!
© Bible Moundang © Alliance Biblique du Tchad, 1996.
