Juupel ma fii ka Masǝŋ mo byak dǝɓɓi
1 Lǝŋ David.
2 Dǝɓlii, mo ǝ̃ǝ me wo za maɓeare.
Mo byak me wo za ma joŋra faɓe'.
3 Cẽecẽe a kyeɓra ɓǝɓe' ka joŋni,
Cẽecẽe a kyeɓra balle.
4 Tǝrĩi ɓǝǝ tǝgbana nãaguu sooyii ma in dǝɓ pǝ wulli,
Ɓǝ faa zah ɓǝǝ tǝgbana nãaguu lomme.
5 Dǝɓlii, mo byak me jol za faɓe',
Mo byak me wo za ma joŋra faɓe' moo 'yahra lee ɓe.
6 Za ma yiira suu saara mǝmmǝǝ tǝkine kpǝram tǝ fahlii pel ɓe ka gban me ne ko.
7 Me faa nyi Dǝɓlii: Amo ye Masǝŋ ɓe.
Dǝɓlii, mo laa yee ɓe me tǝ yee fii gbah jol ne wo ɓo.
8 Dǝɓlii, Masǝŋ ɓe, pa ǝ̃ǝ ɓe maswahe, amo ye byak me zah salle.
9 Dǝɓlii, mo nyi fan mai za faɓe' mo tǝ 'yah nyi ra ka,
Mo soɓ ɓǝ foo ɓe' ɓǝǝ mo foora ɓo joŋ ka.
10 Mo soɓ za syiŋ ɓe kaara kacella ka.
Mo joŋ ɓǝ foo ɓe' ɓǝǝ mo foora ɓo tǝ ɓe pii soo ge tǝ ɓǝǝra.
11 Mo soɓ yakwii syak ra,
Mo ɓoo ra ge pǝ lak maɗǝk ah ka mo yeera ge lal ka syaŋsyaŋ.
12 Za mai moo gwahra ber zah za ki mo soɓ ɓǝ ɓǝǝ mo joŋ ka.
Ka ɓǝɓe' mo ge tǝ dǝɓ ɓe' mo muŋ ko.
13 Me tǝ ɓe Dǝɓlii, amo ye pa cam tǝ za syak tǝkine mabaidǝɓɓi.
14 Za matǝ njaŋ a ga yiira mo,
A ga yeara ne cee pel ɓo.
© Bible Moundang © Alliance Biblique du Tchad, 1996.
