Fan daŋ mo yiira Masǝŋ
1 Na yii Dǝɓlii!
Fan mai mo no coksǝŋ daŋ, we yii Dǝɓlii.
2 Awe zapee ah ma coksǝŋ daŋ, we yii ko.
3 Com ne fĩi daŋ, we yii ko.
Ŋwǝǝmǝŋgai, we yii ko.
4 Coksǝŋ maɗǝkki, we yii ko,
Tǝkine bii ma mor masyiibam daŋ.
5 Ara daŋ mo yiira tǝɗii Dǝɓlii,
Mor Dǝɓlii faa ɓǝ, so joŋ ra ne ko.
6 Ako ye rǝk ra pǝ cok kal ɓǝǝ ne ɓǝ faa zah ahe,
Ka mo yeara gŋ ga lii ga lii,
Ka zǝǝra tǝ ɓǝ ah ya.
7 Fan ma wo sǝr nyee daŋ, we yii Dǝɓlii.
Fan maluu ma pǝ bii ne ma mor bii sǝŋ daŋ, we yii ko.
8 Sãh bamme, syaŋne, sum syaŋne, ne swãhe tǝkine zyak maswah mai moo laara zah ahe, we yii ko.
9 Waare ne geere, kpuu mai moo lee syẽmme tǝkine kpuu camcam daŋ,
10 Faɓal daŋ, ma yaŋ ne ma cokki, fan ma kwak ɓǝr tǝ sǝrri, tǝkine juu daŋ, we yii ko.
11 Awe za goŋ ne za daŋ, yerima ra tǝkine za ma ne swah manyeeki ah daŋ,
12 So wee tǝbanna tǝkine woi, ne za tamme tǝkine wee manyee daŋ, we yii ko.
13 Ara daŋ mo yiira tǝɗii Dǝɓlii,
Mor tǝɗii ah kal mǝ za ki ɓo daŋ.
Yǝk ah a tǝ sǝr nyee tǝkine coksǝŋ daŋ.
14 Ako ye joŋ zan ah ɓo pǝswahe,
So zan ah daŋ mo yiira ko,
Za Israel ara ye za 'yah ahe.
Na yii Dǝɓlii!
© Bible Moundang © Alliance Biblique du Tchad, 1996.
