Juupel ma soɓ suu ne mor jol Masǝŋ
1 Lǝŋ David.
Masǝŋ, mo byak me, mor me ɗuu ge muŋ ɓo wo ɓo.
2 Me faa nyi Dǝɓlii: Amo ye Dǝɓlii ɓe,
Fan sãh mai me ne daŋ amo ye nyi me.
3 Za Dǝɓlii ara pǝsãh ɗii ne!
Ame laa pǝ'nyah ne kaa kǝsyil ɓǝǝra .
4 Za mai mo kalra ge ɓo tǝ syee mor masǝŋ ki ra a 'namra bone magaɓ ah gin tǝ suu ɓǝǝ ne ko.
Me ka tai ne ra pǝ cok joŋ syiŋ ɓǝǝr a,
Me ka juupel wo masǝŋ ki ɓǝǝ ra ya ta.
5 Dǝɓlii, amo ye fan mai me ne daŋ,
Fan mai me ne 'yah ah daŋ amo yee nyi nyi me, cee ɓe jol ɓo.
6 Fan ɓo moo nyi nyi me daŋ a pǝsãh ɗii ne?
Fan ah ra pǝsãh no cam.
7 Me joŋ osoko nyi Dǝɓlii mor ako ye tǝ byak me.
Ne suŋ ɓe, fatan zahzyil ɓe a lai me.
8 Cẽecẽe me tǝ ɓe, Dǝɓlii no ne me,
A kah ɓe gwari, fan ki ka gak laŋ me ya.
9 So zahzyil ɓe tǝ laa pǝ'nyah pǝlli,
Cẽecẽe me tǝ ɓe, me kaa ɓo jam,
10 Mor mo ka soɓ me ga pǝ cok mai za wul mo gŋ ya,
Mo ka soɓ dǝɓ mai mo tǝ 'yah ko pǝ wul a.
11 Mo ga cuu fahlii mai mee ga syee gŋ ka lwaa cee ne nyi me.
Mo wo ɓe ɓe, me laa pǝ'nyah no cam.
Gbah jol mai mo tǝ gbah jol ɓe,
A pǝ'nyah wo ɓe ga lii ga lii.
© Bible Moundang © Alliance Biblique du Tchad, 1996.
