Juupel dǝɓ matǝ njaŋ
1 Lǝŋ David.
Dǝɓlii, mo faa ɓǝ sãh tǝtǝl ɓe,
Mor me joŋ fan matǝ njaŋ,
Me soɓ suu ɓe daŋ ɓo jol ɓo.
2 Dǝɓlii, mo mgbai me, mo lii me,
Mo lii zahzyil ɓe tǝkine ɓǝ foo ɓe daŋ.
3 Mor 'yah ɓo no ne me,
Mo tǝ joŋ gboŋgboŋ wo ɓe cẽecẽe.
4 Me ka tai zah ne za maɓea ya,
Me ka tai ki ne za matǝ vǝrvǝr a ta.
5 Ame syiŋ fahlii tai ki ne za ma joŋ faɓe' tǝkine za maɓea daŋ.
6 Dǝɓlii, ame vãh jol ɓe ne bii mor ka cuu me bai faɓe',
Me tǝ juupel syee kah cok joŋ syiŋ ne ko.
7 Me tǝ ɗǝǝ lǝŋ joŋ osoko ne tǝkine kee ɓǝ yeɓ ɓo masãh ah mai mo joŋ ɓo daŋ.
8 Dǝɓlii, me 'yah kaa ɓǝr yaŋ ɓo pǝ cok mai mo kaa ɓo gŋ ne yǝk ɓo.
9-10 Mo muŋ me ne za faɓe' ka,
Mo soɓ kiita za ma ik wul mai moo joŋra faɓe' zah'nan daŋ ge tǝ ɓe ka,
Mor a nyira lak nyi za ka zyii ɓǝ ga mor ɓǝǝ ne ko.
11 Amma ma ɓe me joŋ fan matǝ njaŋ ahe,
Mo kwo syak tǝ ɓe, mo ǝ̃ǝ me.
12 Ɓal ɓe uu ɓo tǝ fahlii matǝ njaŋ,
Me ga yii Dǝɓlii pǝ cok juupel kǝsyil za pãare.
© Bible Moundang © Alliance Biblique du Tchad, 1996.
