Juupel ma joŋ osoko
1 Lǝŋ David.
2 Me joŋ osoko nyi mo Dǝɓlii,
Mor mo ǝ̃ǝ me,
Mo soɓ za syiŋ ɓe syakra me ya.
3 Dǝɓlii, Masǝŋ ɓe, ame yeyee fii mo,
So mo gbah jol ɓe, mo laɓ me ɓe.
4 Dǝɓlii, amo ǝ̃ǝ me gin zah wul ɓe,
Me kal kǝnah ge ɓo pǝ cok mai za wul mo gŋ mor sǝr pǝɗǝkki,
Amma amo so soɓ me ɓo ne cee ba.
5 Awe za ma ɗuu Dǝɓlii daŋ, we joŋ osoko nyi ko,
We foo ɓǝ fan mai Dǝɓ matǝdaŋdaŋ mo joŋ,
We joŋ osoko nyi ko.
6 Kpãh ah a yea zah vaŋno nai to,
Amma ɓǝ sãh ah moo joŋ a yea ne dǝɓ ga lii.
Yee yea ne suŋni, amma ne zah'nan ɓe, ɓǝ 'nyah yee yeani.
7 Ame laa pǝ suu ɓe me pǝswahe,
Me so faa ne zahzyil ɓe:
Fan ki ka gak joŋ me ya syaŋsyaŋ.
8 Dǝɓlii, amo pǝ'nyah wo ɓe no cam,
Amo joŋ me ɓo pǝswah na waare.
Amma ne cok mo muŋ suu ɓo wo ɓe ɓe, me ɗuu galle.
9 Dǝɓlii, me yeyee ɗii mo,
Me pǝǝ mo ka mo gbah jol ɓe,
So mo gbah jol ɓe, me faa:
10 Me wǝ ɓe, a pǝ'nyah wo ɓo no ne?
Me ge pǝ pal ɓe, a ne reba no ne?
Za mai mo wukra ɓo a gak yiira mo no ne?
11 Dǝɓlii, mo laa yee ɓe,
Mo kwo syak tǝ ɓe,
Mo gbah jol ɓe.
12 Amo fer yee ɓe me tǝ yee so ciŋ ɓǝ 'nyah ma dǝdaa ɓo.
Amo wǝǝ mbǝro gban yel ɓe ge lalle,
Mo so ɓoo mbǝro ma laa pǝ'nyah nyi me.
13 Me ka kaa 'wa ya,
Me ga ɗǝǝ lǝŋ yii mo ne ko.
Dǝɓlii, amo ye Masǝŋ ɓe,
Me ga joŋ osoko nyi mo ga lii ga lii.
© Bible Moundang © Alliance Biblique du Tchad, 1996.
