Ɓǝɓe' dǝfuu
1 Lǝŋ David dǝɓ yeɓ Masǝŋ.
2 Faɓe' a faa ɓǝ nyi dǝɓ faɓe' pǝ zahzyilli,
So dǝɓ faɓe' a soɓ Masǝŋ,
Ka zyii ɗuu ko ya.
3 Mor a foo ɓǝ yii suu ah ne ko,
A lǝŋ Masǝŋ ka kwo faɓe' 'min ka ŋgoŋ kiita tǝ 'min ne ɓǝ ah ya.
4 Ɓǝ faa zah ah a pǝɓe', a gwah berre,
Ka ne tǝtǝl ma joŋ fan sãh ya.
5 Ne cok mo swǝ sǝŋ tǝ faswul ah ɓe,
A foo ɓǝɓe' mai moo ga joŋko,
Syel ah ka pǝsãh ya,
Ka gak soɓ faɓe' ya ta.
Ɓǝ sãh Masǝŋ
6 Dǝɓlii, 'yah ɓo a pǝ'manne, zyaŋ coksǝŋ ɓo ne lii ah daŋ.
Goŋga ɓo ge dai zah ma swãh sǝŋ ɓo gbǝm.
7 Njaŋ ɓo ka gak laŋ ya tǝgbana waa malii mo ka laŋ ya.
Kiita ɓo a pǝɗǝk tǝgbana paŋbii.
Dǝɓlii, amo byak dǝfuu tǝkine faɓal daŋ.
8 Masǝŋ, 'yah ɓo pǝ'man ɗii nai ne?
Dǝfuu a lwaara cok muŋ ɓǝǝ mor yee ɓo.
9 A joŋra fĩi malii ne farel ɓǝr yaŋ ɓo.
Amo nyi fazwan mai moo ɗuu gin pǝ el fan sãh ɓo nyi ra kǝ̃ǝ ɓo ne ko.
10 Amo yee nyi cee,
Aru lwaa kwan cok mor cokfãi ɓo.
11 Mo 'yah za mai moo 'yahra mo ge pelle,
Mo joŋ ɓǝ sãh wo za matǝ njaŋ.
12 Mo soɓ za ma yii suu ruura sal ne me ka,
Mo soɓ za faɓe' nĩi me ka ta.
13 Mo ẽe lee mai za faɓe' mo leera ɓo ɗǝ,
Ka gak urra sǝŋ ya.
© Bible Moundang © Alliance Biblique du Tchad, 1996.
