Juupel dǝɓ ma pǝ bone
1 Lǝŋ David ma mor foo ɓǝ.
2 Dǝɓlii, mo ɓaŋ kpãh lai me ne ka,
Mo ŋgoŋ kiita tǝ ɓe ne kpãh ka.
3 Amo ŋgoŋ kiita tǝ ɓe,
Mo kan syim wo ɓe,
Mo woo me ɓoo ge sǝŋ.
4 Ame ne syem pǝ'man mor kpãh ɓo mo ɓaŋ ɓo tǝ ɓe.
Suu ɓe daŋ a ne syemme,
Mor faɓe' mai mo wo ɓe.
5 Faɓe' ɓe wea ge ɓo tǝtǝl ɓe sǝŋ pǝ'manne,
Ee me ge ɓo sǝŋ tǝgbana faswaa mayǝk ahe.
6 Nwãh wo suu ɓe daŋ sõo ɓo,
A fuŋ ndǝ̃ǝ mor tǝgwĩi suu ɓe.
7 Ame ɗǝŋ ɓo, swah vǝr ɓo wo ɓe belbelle,
Zah'nan daŋ me kaa ne 'meere.
8 Tǝtǝl 'wah tǝ 'wah me,
Ame ne syem pǝ'manne.
9 Swah suu ɓe vǝr ɓo,
Me joŋ ɓo pǝtǝtǝ̃ǝre,
Zahzyil ɓe tǝ laa gaɓɓe,
Me tǝ 'mee ne bone.
10 Dǝɓlii, amo tǝ fan mai me tǝ 'yah ɓe,
Amo laa 'mee ɓe daŋ ɓe.
11 Zahzyil ɓe tǝ ɗuu wesaŋlaŋne,
Swah ɓe pee ɓe,
Nahnǝn ɓe joŋ ɓo mgbǝ̃ǝrĩ.
12 Bai ɓe ra ne jǝk ɓe ra ka ginra wo ɓe gwari ya,
Mor nwãh mai mo wo ɓe, koo za ɓe laŋ ka kaara kah ɓe gwari ya.
13 Za mai mo tǝ kyeɓra me ka in pǝ wulli, saara mǝmmǝǝ pel ɓe.
Za mai mo tǝ cuura bone nyi me a 'yahra kǝnah ka muŋ tǝtǝl ɓe,
Zah'nan daŋ a foora ɓǝɓe' ka joŋ wo ɓe.
14 Amma me tǝgbana lǝr mai mo ka laa sok ya,
Tǝrĩi ah mo mgbãa ɓo.
15 Ame tǝgbana dǝɓ mai mo ka gak faa ɓǝ ya,
Mor ka laa sok ya.
16 Dǝɓlii, me soɓ suu ɓe ɓo wo ɓo,
Dǝɓlii, Masǝŋ ɓe, mo zyii zah ɓe.
17 Mo soɓ za syiŋ ɓe yii suu tǝ ɓǝ bone ɓe ka,
Mo soɓ ra yii suu tǝ ɓǝ lee ɓe ga sǝŋ ka.
18 Ame tǝ yah lee ga sǝŋ,
Fasyen no wo ɓe cẽecẽe.
19 Ame tǝ kee ɓǝ faɓe' ɓe nyi mo,
Ame tǝ swaa ɓǝ ah pǝlli.
20 Za syiŋ ɓe, suu ɓǝǝ jam, ara pǝswahe,
Za pǝlli syiŋra me ɓo tǝkolle.
21 Za mai moo faŋra val ɓǝ sãh ne ɓǝɓe' syiŋra me ɓo,
Mor me tǝ kyeɓ ka joŋ fan sãhe.
22 Dǝɓlii, mo soɓ me ɓoo ka,
Mo uu lal pǝɗǝk ka, Masǝŋ ɓe.
23 Dǝɓlii, mo gbah jol ɓe zǝzǝ̃ǝko, pa ǝ̃ǝ ɓe.
© Bible Moundang © Alliance Biblique du Tchad, 1996.
