Juupel dǝɓ ma ne syemme
1 Lǝŋ David.
2 A pǝ'nyah wo dǝɓ mai moo foo ɓǝ tǝ pa syakke.
Ne cok gaɓ mo lwaa ko ɓe, Dǝɓlii ga gbah jol ahe.
3 Dǝɓlii ga byak ko,
A ga joŋ zah'nan cee ah nǝn wo sǝrri,
A ga joŋ ko laa pǝ'nyahre,
Ka ga soɓ ko ga mor jol za syiŋ ah ya.
4 Ne cok syem mo lwaa ko ɓe, Dǝɓlii ga laɓ ko.
5 Ame faa: Dǝɓlii, me joŋ faɓe' ɓo wo ɓo,
Mo kwo syak tǝ ɓe,
Mo laɓ zahzyil nyi me.
6 Za syiŋ ɓe a faara ɓǝɓe' tǝ ɓe,
A faara: A ga wǝ nekẽe ka za mo yaŋra ɓǝ ah ne?
7 Za mai moo ginra ka ẽe me, za tǝ vǝrvǝr ye ra,
A gin syiira sok laa ɓǝɓe' tǝ ɓe,
So a kalra ne ɓǝ ah a ga myahra cok daŋ.
8 Za mai mo syiŋra me ɓo daŋ a faara ɓǝɓe' tǝ ɓe kǝsyil ki,
A lǝŋra ɓǝ maɓe' ah tǝtǝl ɓe.
9 A faara: Syem wul lwaa ko ɓe,
Ka ur ao syaŋsyaŋ.
10 Koo bai ɓe masãh mai me gbǝ yǝk ɓǝ ah ɓo, moo ren farel ne me, syiŋ me ɓo.
11 Dǝɓlii, mo kwo syak tǝ ɓe, mo laɓ me.
Me ga faŋ val tǝ za syiŋ ɓe.
12 Ame ga tǝ, mo laa pǝ'nyah ne me,
Mor kaara kacella tǝ ɓe ya.
13 Mo ga gbah jol ɓe,
Mor me joŋ fan matǝ njaŋ,
Mo ga byak me pel ɓo cẽecẽe.
14 Za Israel, na yii Dǝɓlii, Masǝŋ Israel.
Na yii ko daga zǝzǝ̃ǝko ŋhaa ga lii. Amen! Amen!
© Bible Moundang © Alliance Biblique du Tchad, 1996.
