ƊEREWOL PATƏ GWA AHE
Juupel dǝɓ mai mo pǝ cok mowoo ahe
1 Lǝŋ wee Kora.
2 Masǝŋ, ame ne koŋ ɓo
Tǝgbana nǝǝmin moo yea ma ne koŋ bii ma pǝ cok mawok ahe.
3 Ame ne koŋ ɓo, Masǝŋ ma ne cee, tǝgbana koŋ bii.
Me ga kwo zahpel ɓo Masǝŋ nekẽne?
4 Ame yeyee com ne suŋ daŋ,
Mĩi yee ciŋ farel ɓe ɓo.
Cẽecẽe za syiŋ ɓe a fiira me:
Masǝŋ ɓo sye kẽne?
5 Ne cok me foo ɓǝ ma fahfal ɓe, zahzyil nǝǝ me.
Ne cok me yea tǝ kal pel za pãa ga yaŋ Masǝŋ ne ko, a laara pǝ'nyahre,
A ɗǝǝra lǝŋ yii Masǝŋ ne ko.
6 Zahzyil ɓe, mo joŋ me swaa ɓǝ nai mor fẽene?
Byak fan ɓe ga uu tǝ Masǝŋ,
So me ga yii ko,
Ako ye pa ǝ̃ǝ ɓe ne Masǝŋ ɓe.
7 Zahzyil ɓe tǝ swaa ɓǝ,
Mor ah me ga foo ɓǝ Dǝɓlii pǝ cok mowoo ɓe pǝ sǝr
Yordan, gwari ne kah waa Hermon ne waa Mizar,
Me ga foo ɓǝ Dǝɓlii gŋ.
8 Masǝŋ joŋ ɓǝ swaa gin tǝ ɓe
Tǝgbana bii mabii moo wea ki
Tǝkine bii zahtǝsal mo tǝ ɗuu ɓe moo ciini.
9 Dǝɓlii, mo cuu 'yah lii ɓo mo ne ko ge lal zah'nan daŋ.
Ne suŋ daŋ me ga ɗǝǝ lǝŋ yii Masǝŋ mai mo nyi cee nyi me ne ko tǝkine juupel wol ahe.
10 Me tǝ faa nyi Masǝŋ ma byak ɓe:
Mo yaŋ me ɓo nai mor fẽene?
Mo soɓ me ga pǝ bone mai za syiŋ ɓe moo cuura nyi me mor fẽene?
11 Tǝǝ za syiŋ ɓe moo tǝǝra me a syen suu nyi me ne cok mai moo yeara ma ne fii ɓe:
Masǝŋ ɓo sye a kẽne?
12 Zahzyil ɓe, mo joŋ me swaa ɓǝ nai mor fẽene?
Byak fan ɓe ga uu tǝ Masǝŋ,
So me ga yii ko,
Ako ye pa ǝ̃ǝ ɓe ne Masǝŋ ɓe.
© Bible Moundang © Alliance Biblique du Tchad, 1996.
