Juupel ma mor ka Masǝŋ mo byak dǝɓɓi
1 Lǝŋ wee Kora.
2 Masǝŋ, aru laa ɓǝ ɓo ne sok ɓuuru,
Pa ɓuu lii ra keera ɓǝ yeɓ malii mai mo joŋ ne cok zah'nan ma ɓǝǝ daŋ nyi ru,
3 Faara amo nĩi za ki pǝ sǝr ɓǝǝ ge lalle,
Mo kan za ɓo pǝ cok ɓǝǝra,
Mo ŋgoŋ kiita tǝ zahban maki ah ra,
Amma mo so ɓoo za ɓo ge pelle.
4 Za ɓo rera sǝr ah ne kafahe ɓǝǝr a,
Kaara kacella ne swah suu ɓǝǝr a ta,
Amma fan ah joŋ ne swah ɓo,
Ɓǝ ah cuu amo tǝ 'yah ra.
5 Amo ye goŋ ɓe ne Masǝŋ ɓe.
Mo nyi swah nyi za ɓo.
6 Mo ne ru ɓe, ru ga nĩi za syiŋ ɓuuru.
7 Ame ka gbǝ yǝk ɓǝ saŋ ɓe ne kafahe ɓe ka me ǝ̃ǝ ne ya,
8 Mor amo ye ǝ̃ǝ ru gin jol za syiŋ ɓuuru,
Amo muŋ za syiŋ ɓuu tǝɗe'.
9 Ru ga yii mo cẽecẽe,
Ru ga joŋ osoko nyi mo ga lii ga lii.
10 Amma zǝzǝ̃ǝ mo soɓ ru myah ɓe,
Mo soɓ swãa re ru ɓe,
Mo ka tǝ zyii pǝ̃ǝ sal ne za sal ɓuur ao.
11 Mo joŋ ru ɗuu pel za syiŋ ɓuuru,
So za ma syiŋ ɓuu woora fan ɓuuru.
12 Mo soɓ ru myah ge ɓo tǝgbana gwii mai mo mor ŋgoŋni,
Mo myah ru ge ɓo kǝsyil za sǝr camcam.
13 Mo lea fan ne za ɓo ge lalle,
Mo joŋ lee ɓǝǝ pǝgwahe,
So mo lwaa reba tǝ ɓǝǝr a.
14 Za jǝk ɓuu kwora fan mai mo joŋ wo ɓuu ɓe,
A tǝǝra ru, a syakra ru.
15 So mo joŋ ru ɓo na fan ma cuu tǝcuu kǝsyil za sǝrri,
A cǝkra tǝtǝl ne ɓǝ ɓuu tǝkine syak ru.
16-17 Zah'nan daŋ swãa tǝ ren me,
Me ka gak ɓaŋ nahnǝn ga sǝŋ ya jol tǝǝ mai za syiŋ ɓe mo tǝ tǝǝ me.
18 Aru yaŋ mo ya,
Ru syel ɓǝ gbanzah mai mo gbǝ ɓo ne ru ya ta,
Ne daŋ laŋ fan mai daŋ joŋ wo ɓuuru.
19 Aru joŋ ɓǝɓe' wo ɓo ya,
Ru zǝǝ tǝ ɓǝ lai ɓo ya ta,
20 So mo soɓ ru myah kǝsyil nǝǝ cok pǝ cok mafuu tǝ piɓpiɓɓa,
Mo gbah jol ɓuur a.
21 Ru soɓ syee mor Masǝŋ ɓuu ɓo ɓe,
Ru so kal ɓo tǝ syee mor masǝŋ ki ɓe,
22 Mo ka tǝ ɓǝ ah ya ne?
Mor amo tǝ ɓǝ foo zahzyil dǝfuu ɓe.
23 Amma a zokra com wõi ne ik ru pǝ wul mor ɓo,
A joŋra ru tǝgbana pǝsǝ̃ǝ mai za mo tǝ ga cok ŋgoŋ ne ra.
24 Dǝɓlii, mo kpiŋ o,
Mo nǝnǝm ɓo ne ɓǝ ɓuu mor fẽene?
Mo kpiŋ o, mo soɓ ru ɓoo ge lal nai ga lii ka.
25 Mo muŋ suu ɓo wo ɓuu nai mor fẽene?
Mo yaŋ ɓǝ bone ɓuu ne gaɓ ɓuu ka.
26 Aru lea ge ɓo sǝŋ,
Ru swah ɓo gŋ baila baila,
Swah ka wo ɓuur a.
27 Mo urri, mo gbah jol ɓuuru,
Mo ǝ̃ǝ ru mor 'yah ɓo.
© Bible Moundang © Alliance Biblique du Tchad, 1996.
