Lǝŋ ɓaŋ dǝr goŋe
1 Lǝŋ wee Kora ma ɗǝǝ ne ɓǝ 'nyahre.
2 Ɓǝ foo masãh ah baa ɓo zahzyil ɓe cyõ,
Me gee lǝŋ mai ɓo ka yii goŋ ne ko,
Tǝrĩi ɓe a tǝgbana bik dǝɓ ma ŋwǝǝ fan sãhe.
3 Amo pǝsãh kal dǝfuu ɓo daŋ,
Tǝkpuuzah ɓo faa ɓǝ pǝ'nyahre,
Masǝŋ tǝ ẽe mo cẽecẽe.
4 Goŋ mayǝkki, mo ɓoo kafahe ɓo ge kahlaa,
Amo pǝswahe, mo pǝyǝkki.
5 Mo yee tǝ yǝk ɓo tǝgbana dǝɓ moo yee pǝrri,
Mo kaa kacella ne ko,
Mor ka goŋga tǝkine ɓǝ tǝ njaŋ mo ge pelle.
Mo ga kaa kacella tǝ za ne swah ɓo malii.
6 Guu ɓo ga jwǝǝ za syiŋ ɓo gin zahzyilli,
Za sǝr ga leara ga sǝŋ mor ɓal ɓo.
7 Fakal goŋ mai Masǝŋ mo nyi ɓo nyi mo a yea ga lii ga lii,
Mo kaa goŋ ɓo ɓo pǝsãhe.
8 Amo 'yah ɓǝ masãh ahe,
Mo syiŋ ɓǝ maɓe' ah ɓo.
Mor ahe, Masǝŋ ɓo nǝǝ mo ɓo,
Syee nǝm 'nyah tǝ ɓo kal za daŋ.
9 Ɓǝrdi ma fuŋ 'nyah ah ne ma pǝzyil kpuu a fuŋ wo mbǝro ɓo,
Za woŋ tǝnjuŋ tǝ woŋra tǝnjuŋ pel ɓo ɓǝr yaŋ goŋ mai mo zyeɓ ɓo ne loŋ balle.
10 Kǝsyil ŋwǝǝ ma ɓǝr yaŋ goŋe, wee goŋ maŋwǝǝ no gŋ,
Nǝfah jokǝsãh fakal ɓo magoŋ uu ɓo gŋ,
Zyeɓ fangai masãh ah ma vãm kaŋnyeeri ɓo wo suu.
11 Magoŋe, mo laa ɓǝ faa ɓe:
Mo yaŋ ɓǝ za ɓo ne zahzum ɓo.
12 Sãh ɓo mai mo ne ko a ga joŋ goŋ cwaa mo,
Ako ye dǝɓlii ɓo,
Mo laa zah ahe.
13 Za sǝr
Tirus ga gera nyi mo ne fan sãhe,
Za joŋ a ga kyeɓra ɓǝ 'nyah wo ɓo.
14 Magoŋ a no yaŋ goŋe,
A pǝsãh ɗii nai ne!
Zyim mbǝro ah kaŋ ɓo ne gǝrǝǝji ma ne vãm kaŋnyeeri.
15 Ɓoo mbǝro maŋwǝǝ ah ɓo wo suu,
Zaŋra ko kal ge wo goŋ ne ko,
Wee maŋwǝǝ swǝra fahlii ahe,
Woora ra ge wo goŋ ne ta.
16 Danra ge yaŋ goŋ ne 'nyah suu tǝkine laa pǝ'nyahre.
17 Amo goŋ ɓe, mo ga bem wee pǝpãare,
A ga kaara pǝ cok pa ɓo lii ra,
Mo ga woo ra rǝk goŋ ne tǝ sǝr daŋ.
18 Lǝŋ ɓe mai a ga joŋ za ma fahfal daŋ yiira mo,
A ga foora ɓǝ ɓo ga lii ga lii.
© Bible Moundang © Alliance Biblique du Tchad, 1996.
