Masǝŋ no ne na
1 Lǝŋ wee Kora.
2 Masǝŋ ako ye pa byak man tǝkine swah mana,
Cẽecẽe ako ye tǝ gbah jol man pǝ cok gaɓ daŋ.
3 Koo sǝr mo coo gǝrgǝr waa mo lea ge pǝ mabii laŋ, na ka ɗuu gal a.
4 Koo mabii mo tǝ wea ne swahe,
Waa ma kah bii mo laŋ ne lii ah daŋ laŋ, na ka ɗuu gal a.
5 Bii no a ɗuu yaŋ Masǝŋ ŋhaako, bii ah a joŋ za yaŋ Masǝŋ laa pǝ'nyahre tǝkine cok matǝdaŋdaŋ mǝ Masǝŋ mayǝk a no gŋ ŋhaako.
6 Masǝŋ kaa ɓo yaŋ ahe,
Yaŋ ah ka gak lee ya.
Ne cok zahmor'nan ɓe, a ga gbah jol yaŋ ahe.
7 Za sǝr ŋwaara ɓǝ ne galle, coora coo.
Masǝŋ ɓyaŋ ɓǝ,
So sǝr ne lii ah daŋ hǝǝ mbelmbel.
8 Dǝɓlii ma ne swah daŋ no ne na,
Masǝŋ Yakuɓ ye pa byak mana.
9 We ge, we ẽe yeɓ mai Dǝɓlii mo joŋ ɓo,
We ge ẽe fan matǝ gǝriŋ ah mai Dǝɓlii mo joŋ ɓo wo sǝr ɗao.
10 A cak ruu sal wo sǝr ne lii ah daŋ,
A hah saŋ tǝkine zǝǝ ga lalle,
A ɓaa wii nyi bal ruu salle.
11 Dǝɓlii faa: We kaa 'wa, we tǝ, ame ye Masǝŋ.
Za wo sǝr daŋ a ga yiira me.
12 Dǝɓlii ma ne swah daŋ no ne na,
Masǝŋ Yakuɓ ye pa byak mana.
© Bible Moundang © Alliance Biblique du Tchad, 1996.
