Sion yaŋ Masǝŋ
1 Lee wee Kora.
2 Dǝɓlii pǝyǝkki, a nǝn pǝkoŋ mai ka dǝɓ mo yii ko pǝlli,
Kaa ɓo yaŋ ah tǝwaa
Sion.
3 Sion, waa Masǝŋ yo,
A pǝwahe, a pǝsãh pǝlli.
Yaŋ goŋ malii yo,
A joŋ za sǝr daŋ laa pǝ'nyahre.
4 Masǝŋ cuu, kaa jam no ne ki ɓǝr ɓaale yaŋ ahe.
5 Za goŋ wo sǝr taira ki ka ruu sal ne waa Sion.
6 Ne cok mo ge kwora, kaara gǝriŋ,
Gal re ra, ɗuura kalle.
7 Gal re ra tǝkine swaa ɓǝ tǝgbana mawin mai mo tǝ yah byaŋni.
8 Masǝŋ nǝǝ zyak sǝŋ malii ah ɓeɓ dah Tarsus ne ko.
9 Ana laa ɓǝ fan mai Masǝŋ mo joŋni,
So zǝzǝ̃ǝko na kwo fan ah ɓǝr yaŋ Masǝŋ man Dǝɓlii mayǝk ne nahnǝn mana,
A ga byak yaŋ ah jam ga lii ga lii.
10 Masǝŋ, aru foo ɓǝ 'yah ɓo malii ɓǝr yaŋ ɓo.
11 Za yiira mo cok daŋ,
Tǝɗii ɓo myah ɓo wo sǝr ne lii ah daŋ.
Amo kaa goŋ ɓo ɓo ne goŋga.
12 Za Sion, we laa pǝ'nyahre,
Yaŋ Yuda maluu daŋ, we 'nyah suu,
Mor Dǝɓlii a ŋgoŋ kiita njaŋ.
13 We syee kiŋ kah waa
Sion daŋ ka we kee wǝǝdǝǝ ahe.
14 We foo ɓǝ korvuu ahe,
We ẽe ɓaale ahe,
Ka we kee ɓǝ mai nyi zahŋhǝǝtǝ̃ǝ ma fahfalle,
15 We faa: Masǝŋ ako ye Masǝŋ man ga lii ga lii,
A ga syee ne na ŋhaa zah'nan wul mana.
© Bible Moundang © Alliance Biblique du Tchad, 1996.
