Lǝŋ kaa kacella zana
1 Lǝŋ David.
2 Masǝŋ, mo ur mo myah za syiŋ ɓo,
Ka za mai mo syiŋra mo ɓo mo ɗuura kalle.
3 Tǝgbana zyak mo ɓaŋ suŋwii kal ne ko,
Masǝŋ ga ɓaŋ ra kal ne nai ta.
Tǝgbana wii mo hǝǝ mǝŋgǝ̃ǝ, za faɓe' ga muŋra pel Masǝŋ nai ta.
4 Amma za matǝ njaŋ a ga 'nyahra suu tǝkine laa pǝ'nyah pel ahe.
5 We ɗǝǝ lǝŋ wo Masǝŋ,
We ɗǝǝ lǝŋ yii tǝɗii ah ne ko,
We zyeɓ fahlii nyi Dǝɓ mai mo yee kaa ɓo tǝ swãhe.
Tǝɗii ah ye Dǝɓlii,
We 'nyah suu pel ahe.
6 Masǝŋ mai mo kaa ɓo pǝ yaŋ ah matǝdaŋdaŋ ako yee byak syel tǝkine ŋwǝǝ wulli.
7 A nyi yaŋ nyi mabaidǝɓ kaara gŋ,
A wǝǝ za daŋgai pǝ daŋgai ɓǝǝ myahe,
A laara pǝ'nyahre.
Amma za ma ŋwoora kyaŋ a ga kaara pǝ gboŋni.
8 Masǝŋ, ne cok mo zaŋ za ɓo mo syee ne ra kǝsyicokki,
9 Sǝr cocoo,
Coksǝŋ soɓ bam tǝ ge sǝŋ,
Mor Masǝŋ ma tǝwaa Sinai, Masǝŋ Israel, tǝ ginni.
10 Amo soɓ bam tǝ ge sǝŋ pǝlli,
Mo so joŋ 'wah matãa ah soo fuu.
11 So za ɓo kaara yaŋ pǝ cok ahe,
Mor gboŋgboŋ ɓo mo joŋ ɓo ne nyi fan nyi za syakke.
12 Dǝɓlii kan ɓǝ lai,
So ŋwǝǝ pǝlli myahra ɓǝ ahe.
13 Faara: Za goŋ tǝkine za sal ɓǝǝ daŋ ɗuura kalle.
Ŋwǝǝ yaŋ womra fan mai mo nyiŋra zah sal ahe.
14 A kwan ra tǝgbana matǝvaa mai mo syeera vãm solai ɓo wo suu ɓǝǝra mai yee ɓǝǝ moo sãh na vãm kaŋnyeeri.
15 Ne cok Masǝŋ ma ne swah daŋ mo myah za goŋ tǝwaa Salmon,
Soɓ sum syaŋ tǝ ge pǝ cok ahe,
A kwan pǝfãi kaŋkaŋ.
16 Waa Basan mai tǝtǝl ah moo kwan camcam a pǝyǝk ɗii ne!
17 Mor fẽe mo syẽa waa mai Masǝŋ mo nǝǝ ɓo ka kaa gŋ ne?
Dǝɓlii ga kaa gŋ ga lii ga lii.
18 Masǝŋ pǝ̃ǝ gin tǝwaa
Sinai ne muŋta sal ah ujenere pǝpãa kal ge pǝ cok matǝdaŋdaŋ ne ko.
19 Yee kal ge tǝl ahe,
Woo byak mor jol kal ne ko,
Za ma ŋwoora kyaŋ nyira fan nyi ko.
Dǝɓlii Masǝŋ ga kaa gŋ ŋhaako.
20 Osoko wo Dǝɓlii mai mo tǝ ɓaŋ faswaa tǝtǝl man zah'nan daŋ,
Ako ye Masǝŋ mai mo tǝ gbah jol mana.
21 Masǝŋ mana ako ye Masǝŋ mai moo ǝ̃ǝ dǝɓɓi,
Ako ye Dǝɓlii man mai mo tǝ ǝ̃ǝ na gin zah wulli.
22 Masǝŋ ga dah tǝtǝl nyi za syiŋ ah mai mo ka tǝ zyii soɓra fahlii ɓe' ɓǝǝr a.
23 Dǝɓlii faa: Me ga woo za syiŋ ɓe gin Basan ge ne ko,
Me ga woo ra mor mabii ge ne ko,
24 Ka we syee tǝ syim ɓǝǝra,
Goo ɓii ga lahra syim ɓǝǝ kǝ̃ǝ tǝgbana zahzyil ɓǝǝ mo 'yahe.
25 Masǝŋ, ɓal syel dǝɓ swah ɓo mo tǝ syee fahfal mo kaa kacella, za daŋ kwora ɓe,
Kwora syel mai Masǝŋ goŋ ɓe mo tǝ syee ka ga ɓǝr yaŋ ah ne ɓe.
26 Za ma ɗǝǝra lǝŋ kalra pelle, za ma woŋ tǝnjuŋ fahfalle,
Wee maŋwǝǝ kǝsyilli a woŋra yuŋ ga ne ko.
27 We yii Masǝŋ pǝ cok tai zan ahe,
Awe morsǝ̃ǝ Israel daŋ, we yii Dǝɓlii!
28 Benyaamin kahkǝr ye kal ɓo pelle,
Fahfal ah zaluu Yuda ne za ɓǝǝ kalra ge gŋ,
So zaluu Zebulon ne mǝ Naftali gera fahfal ɓǝǝra.
29 Masǝŋ, mo cuu swah ɓo mai mo joŋ yeɓ ne mor ɓuu ge lalle.
30 Daga pǝ cok kal ɓo mo kaa ɓo yaŋ Jerusalem mai za goŋ sǝr moo ginra nyi mo ne fan nyi ɓǝǝ gŋ,
31 Mo lai Egiɓ mai mo tǝgbana faɓal mai mo pǝzyil nyãm zahbii,
Mo lai za sǝr daŋ mai ara mo na ŋgaɓ wǝǝ dǝǝ ne woi dǝǝ,
Ŋhaa ka ara daŋ mo keara ge sǝŋ pel ɓo ka nyira vãm solai ɓǝǝ nyi mo.
Mo myah za mai mo tǝ 'yahra ka ur salle.
32 Zapee ga gee sǝr Egiɓ ginni,
Etiopien ga woora jol ɓǝǝ ga sǝŋ ne juupel wo Masǝŋ.
33 Awe za goŋ wo sǝrri, we ɗǝǝ lǝŋ wo Masǝŋ,
We ɗǝǝ lǝŋ yii Dǝɓlii ne ko.
34 Ako ye Dǝɓ mai mo kaa ɓo zah maswãh sǝŋ, coksǝŋ matǝ ɓaaɓe.
We laa ɗao, tǝ ɓyaŋ ɓǝ ne kyaŋ pǝ'manne.
35 We cuu ɓǝ swah Masǝŋ ne yǝk ah mo ne tǝ za Israel tǝkine swah ah ma zah maswãh sǝŋ daŋ ge lalle.
36 Masǝŋ Israel a pǝyǝk pǝ cok kal ah no cam,
Ako yee nyi swah nyi zan ahe.
Osoko Masǝŋ!
© Bible Moundang © Alliance Biblique du Tchad, 1996.
